Japan Mungdan Nawku Hpung Masha Ni, Asak Hpe Makawp Let Simsa Lam Gaw Gap Gaw De Lu Na Matu Yaw Shada Let Nhtoi (10) Ya Tup Akyu Hpyi Na Nhtoi Masat

Daining a matu ga manoi hpe “Asak yawng hpe makawp maga let simsa lam gaw de na” ngu masat hkap la let Hiroshima hte Nagasaki hta neuclear hta bawm kapaw ai majaw n nga mat sai wenyi ni hte dai tsi-yam hkrum sha nga ai ni a matu, laksan akyu hpyi nhtoi hpe August 6-15 lapran masat akyu hpyi sa wa na matu Janpann Mungdan Nawku Hpung masha ni masat da ma ai lam July 27 ya shani Vatican Shiga Dap kaw nna ndau da ma ai.

Ndai ga baw ga manoi gaw Wa Sarabyin Francis, 2019, November 23-26 nthoi ni hta Japan Mungdan de sa du kawan ai shaloi Wa Sarabyin hkum nan lang woi lai wa ai ga manoi re ai lam, neuclear majan byin na hkrit tsang hpa gaw daini na nhtoi ni hta mung naw nga nga ai ngu Wa Sarabyin Francis hkum nan tsun shadum lai wa ai lam, Japan Mungdan Kahtawlik Saradaw Hpawng Hpa-awn Ningbaw, “the president of the Bishops’ Conference of Japan (CBCJ), Nagasaki Saradaw Giwang Up Wa Saradaw Joseph Mitsuaki Takami a mungga hta tsun da nga ai.

Rawt jat galu kaba sai mungdan ni rai nga ai United States hte Miwa Mungdan lapran, hku hkau prinem lam n nga taw ai majaw katsi majan maga de woi yawng lu nga ai; anhte ni hpa n lu galaw ai raitim, Mungdan kaba ni lapran shada myit galu kaba, hkam sharang hkat let man hkrum hkrum shaga let prinem htingram, hku hkau masa hpe gaw de sa wa lu mu ga n-gun jaw shadum jahprang gaw mai nga ga ai ngu Wa Saradaw Takami tsun shadum da nga ai.

Mungdan law law a lapran, Nuclear laknak hpe hkum htuk shapraw na matu myit hkrum ga sadi hkam masat masa ni galaw ma sai raitim, mungdan nkau ni dai hta n shang lawm ma ai sha laknak kaba ni hpe matut grin shalat htuk shapraw ding yang rai ma ai majaw simsa lam hpe jahkrit sama taw nga ai rai nga ai, ngu mung shadum jahprang da nga ai.

Myanmar mungdan, Afghanistan mungdan ni zawn re ai mungdan law law ni hta mung, laknak lang atsam kaba hpung ni, shanhte a arawng power, sut masa lam a matu madung da nna, shimlam la ga baw ginlam hkam la let dawsa ai, gumshen ai myit hte, mung shawa masha ni a ahkaw ahkang hte simsa lam hpe jahten sharun nga ma ai, ngu mung Wa Saradaw madi madun da nga ai.

Anhte a mungkan gaw galum kahkyin gumding myit hkrum myit ra lam nga ai mungdan tai nga ra ai. Grau nna ya na Covid-19 chyam bra ana tsin-yam hkrum ten, grau pyi galum kahkyin gumding nga ra ga ai, ngu matut tsun jahpra sang dang da nga ai.

2019 shaning, Wa Sarabyin Francis a encyclical, “Fratelli tutti” “shinggyim nau na myit majing hte tsaw ra hku hkau garum shingtau hkat nga na lam hpe mung madi nna shadum da nga ai.

Simsa lam a matu shi (10) ya tup laksan akyu hpyi ai lamang hpe lai wa sai 1982 shaning February 25 ya shani hta Wa Sarabyin Yawhan Pawlu II Japan mungdan de sa du gawan ai hpang mung Japan Mungdan, Kahtawlik Nawku Hpung masha ni galaw lai wa sai lam chye lu ai.

Vatican Shiga Shapoi Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-07/papua-new-guinea-bishops-migrants-refugees-australia.html