Brazil Mungdan, Kahtawlik Matut Mahkai Hpung Ni Prinem Htingram Lam Hpe Gaw Sharawt Na Hpe Wa Sarabyin Hpyi Shawn

July 27, bat 2 ya shani, Wa Sarabyin Francis, Brazil mungdan na Kahtawlik matut mahkai hpung ni gaw garan ginhka hkat ai lam byin nga ai Brazil mungdan kata prinem htingram lam hte galum kahkyin gumding lam galaw ai ni tai nga na matu n-gun jaw da nga ai.

Brazil Mungdan Saradaw Hpawng Kaba, “the Brazilian Bishops Conference (CNBB)” kawn woi awn lajang ya ai Brazil Mungdan Kahtawlik matut mahkai hpung ni a (12) lang ngu na zuphpawng “Mutirao de Comunicacao” malawm ni hpang de Wa Sarabyin Francis hkrang mu nsen video message hte hkrum shaga dat ai hta, Hkristan masha ni gaw myit mada shara hte galum kahkyin gumding lam a matu shaga la hkrum ai ni rai ga ai lam, hkrungrawt sai Yesu Madu gaw Shi a sape ni hte prat htum ten du hkra rau rai nga ai (Mt 28:20) zawn shanhte hte mung rau rai nga ai hpe kam sham myit kaba tawn da na matu shadum da nga ai.

Matut nna mung shi la shi htawn ndau ai media mahkrun lam hpe, grau nna chyam bra ana zingli hkrum sha nga ai aten ladaw ndai aten hta, “fratelli tutti, ngu ai nau na myit majing hte ningnan re ai Kahtawlik matut mahkai lam hpe shatsawm jahtuk ladat shaw masin jahkrat tatut magam bungli gun hpai shaja nga ra ai, ngu mung n-gun jaw da nga ai lam Vatican Shiga Dap kaw nna ndau da ma ai.

https://www.vaticannews.va/en/pope/news/2021-07/pope-brazil-message-catholic-communicators-meeting.html