Mungkan Hta Hkristan Hpung Masha Wan 300 ram Zingri Zingrat Hkrum Sha Nga

“Aid to hte Church in Need” ngu ai Nawku Hpung hte seng ai garum ningtum wuhpung a sawk sagawn tang madum dat ai sum tang laika hta, Hkristian Nawku hpung gaw Mungkan hta zingri zingrat hkrum dik htum ai makam masham uhpung re, nga nna tsun dat nga ai.

“Hkristian ni wan 300 daram, lachyum gaw Hkristian ni marai 7 hta langai mi gaw zingri zingrat galaw ai, rim jahkrit ai, shinggyim ahkaw ahkawng tawt lai ai mungdan ni hta shanu nga ra ai ni rai ma ai.

Mungkan masha yawng a tsa htam shadang 61 daram gaw makam masham hte seng ai wang lu wang lang ahkaw ahkang pat shing dang hkrum ai masa hta nga pra nga ra ma ai” nga nna “Aid to the Church in Need” uhpung a sawk sagawn sumtang laika hta tsun dat nga ai.  

UN Mungkan rapdaw kaw nna myit hkrum jahkrat matsun da ai makam masham hte seng ai wang lu wang lang ahkaw ahkang hpe kade daram hkap la hkan sa nga ma ai kun, ngu ai lam hpe Mungdan 196 hta sawk sagawn dinglik ai lam ni galaw nna ya na zawn tang madun dat ai lam rai nga ai.

2016 ning June shata kaw nna 2018 ning June shata laman du hkra sawk sagawn lam galaw nna tang madun dat ai sumtang hta, makam masham hte seng ai wang lu wang lang ahkaw ahkang hpe laja lana tawt lai lam galaw nga ai Mungdan 38 nga ai, ndai mungdan 38 hta na Mungdan 17 tha, makam masham hte seng nna lachyen ginghka ai lam sung sung nga nga ai, mungdan 21 hta gaw shanhte a Mungdan na nlaw ai makam masham uhpung ni hpe laja lana zingri zingrat lam ni galaw ai.

 Shara nkau mi hkan si ai du hkra zingri lam ni galaw nga ma ai, Islam makam masham hpe ladu shalai ru jung lam galaw ai Mungdan ni hkan kaga makam masham ni hpe zingri ai lam ni galaw ai lam nga ai zaw, nkau Mungdan ni hta gaw jahte tam amyu ai amyu sha myutsaw myit jasat ni a majaw kaga makam masham wuhpung ni hpe zingri ai lam ni galaw ai.

 Ndai zawn re ai Mungdan ni hta Mi wa gunsan Mungdan, India, Dingdung Korea, Myanmar, Vietnam hte Kyrgyzstan Mungdan ni lawm nga ai, nga nna “Aid to the Church in Need” uhpung kaw nna tang madun dat nga ai lam Ucan shiga dap kaw nna shana dat nga ai.   

Source :UCANNEWS