Karai Kasang A Mungga - Pran Wan Ladaw Laban 17

Pranwan Ladaw (17), Shaning B, 2021

Shani shanang anhte ra ai lu sha

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (17) ngu na laban rai nga ai.

Yesu Madu n shangai shi ai BC 150 daram aten hta Israel myu sha ni hta Eliah ngu mying ai mying kaba ai Myihtoi langai paw pru lai wa yu ai.

Israel Hkawhkam Ahhab gaw tara maigan hkawhkam a kasha Yezebela hpe shi a madu jan shatai la ai. Dai Yezebela gaw myit masin n hkru n kaja ai hkawhkam jan rai nga ai. Dai hkawhkam jan a majaw Israel myu sha law law wa Bala nat Karai hpe nat jaw wa ma ai.

Eliah gaw dai zawn re ai Israel myu sha ni Yawel arai Kasang hpang de bai gayin wa na matu shi a prat tup shakut lai wa ai. Shi a shakut shaja ai hta Karai Kasang hpung dagu jaw ya let garum ya lai wa ai.

Eliah si wa mahka hta shi a hkinghtawng hpe matut gun hpai na matu Karai Kasang sut su nga mai ai hkauna madu Elisha lata san da na matu lam matsun ya lai wa ai. Elisha hpe Eliah a hkinghtawng kumla rai nga ai ntsa palawng Elisha hpe jahpun ya ai shaloi Karai Kasang a wenyi shi a ntsa yu hkrat wa nna anga nga ai. Dai shaloi jang Elisha gaw dumsu ala lahkawng la nna, shi man man hkungga nawng jau ai lam hpe galaw ngut jang madu lu ai sut gan yawng hpe tawn kau da let shi a sara Myihtoi Eliah a hpang hkan nang mat ai, (1Hk.Hk 19:19-21).

Gade nna yang Myihtoi Eliah sumsing lamu de shalun la hkrum ai rai nna, Eliah a ntsa palawng ga de hkrat wa ai. Elisha mung dai ntsa palawng hpe hta hpun ai hte shi sara a daru magam n-gun atsam hte hpung dagu shi hta shang nga taw ai. (2Hk.Hk 2:1-25).

Elisha madun ai hpung dagu a lam ndai laban na chyum daw langai hta anhte na la lu saga ai. Hkauna la langai mi shi shu la dan la lu ai muk-yaw mam muk tawng hkun (20) hte nsi naisi nnan loi mi la sa nhtawm Elisha hpe hkungga nawng jau na matu hpyi shawn ai. Hkungga nawng jau ai hta sa du ai masha manga tsa (500) daram rai ma ai. Dai ni hpe daw jau na matu hkauna la wa la sa ai malu masha gaw law htam na n rai nga ai.

Elisha gaw shi a shangun ma ni hpe dai masha manga tsa daram sha na matu law htam ai malu masha hpe lajang da shangun ai. Shi a shangun ma ni mung dai ram law ai masha ni hpe daw jau na sha hpa n nga ai re majaw n mai byin na re lam shi hpe tsun ma ai. Raitim, shi shanhte hpe lu hkra lajang shangun ai. Kaja wa sha nan dai masha latsa jan malu masha sha ngut ai hpe naw ngam nga ai.

Ndai mabyin gaw anhte na lu ai Kabu Gara Shiga hta na Madu Yesu muk tawng hte nga hpe shalaw nna shawa masha ni hpe jaw sha ai a shingdu labau mabyin hku madun da nga ai.

Messiah Hkyela Madu gun sa ya ai kumhpa gaw Ga Shaka Dingsa prat na kumhpa ni hta htam grau law nga ai. Elisha gaw masha manga tsa daram hpe muk tawng hkun (20) hte law hkra jaw sha lai wa ai. Yesu Madu gaw muk tawng manga (5) hte masha hkying manga (5,000) hpe law hkra jaw sha ai.

Yesu Madu Shalaw Jahtam Ai Muk Ni

Shawng na lang - (Mt 14:13-21; Mk 6:32-44; Lk 9:10-17; Yh 6:1-15)

Kaga mabyin langai - (Mt 12:32-39; Mk 8:1-10)

Yesu Madu nni nkri hkam si hkam ai a laning mi ram jau nna byin ai mabyin lanngai rai nna, Paska aten hta byin ai mabyin rai nga ai.

Ndai mabyin gaw Capernaum mare hta sa du sharin shaga na shawng na laban hta byin ai mabyin rai nga ai. Muk hpe shalaw nna hkum hkrang a matu lusha jaw sha ai mabyin gaw Madu Karai a wenyi lusha hpe hkap la lu mu ga matu shajin shachyip ai mung rai nga ai.

Yesu Madu gaw Shi a kashu kasha ni yawng a hkum hkrang ra kadawn ai lam hpe myit lawm myit ya ai.

Masha wuhpawng hpe lusha hte daw jau na matu Yesu hpe kadai mung hpyi shawn lai wa ai. Shanhte a hkum hkrang a matu ra kadawn ai lusha hpe Yesu hkum nan lajang hpang ai rai nga ai. Dai ram law ai masha ni a matu lusha ma mi sha na hpe yu maya masha langai mi laning mi tup shabrai hte n law ai rai nga ai.

Shinggyim masha ni n galaw lu ai hpe Yesu galaw ai lam mung rai nga ai. Shi a matu gaw dai zawn n galaw lai wa ai. Shi a hpang hkan ai ni hte shingdaw dat yang shi a matu n myit ai sha shi hpang hkan ni a matu sha myit ai hpe mu lu ai. Lusha gam ladaw hta anhte myit dum ai mabyin: Yesu Madu nam maling hta lusha gam akyu hpyi ai shaloi shi a matu malu masha n galaw ai; Satan gung lau nna nlung hpe muk tawng shabyin shangun ai ten shi galaw lu ai rai tim n galaw ai.

Yesu madu lusha hpe muk tawng n lawm ai sha kaman kaw na hpan dat lu ai. Raitim, muk tawng manga hte nga kachyi myi hpe akyu jashawn nna hpan ai.

Shanhte yawng sha ngut ai hpang ngu Chyum laika sara mali hte tsun ai gaw Yesu madu a masat shadang/ shadawn shadang n tawn da ai gam jaw ya mayu ai shawang myit kaba ai hpe shadan shadawng ai rai nga ai.

Chyum laika mali hte kaw, “lusha ngam hpe bai zing mahkawng na matu Yesu kasa ni hpe hkang da ai” gaw Karai Kasang jaw ai chyeju hpe manu shadan ai hpe madun nga ai.

Karai Kasang gaw anhte shinggyim masha ni a hkum hkrang matu ra kadawn ai lusha hpe myit lawm ya ai. Marai hkum shagu lusha grung grung lu sha na hpe ra sharawng ai. Kadai hpe raitim kaw si na n ra sharawng ai.

Anhte maga hku nna mung Karai kasang a hpung dagu hte lusha jaw na hpe n mai myit mada ai. Karai Kasang gaw nga da chyalu lusha hpe hkam la lu hkra anhte hkum nan shakut nna shalaw la na hpe ra sharawng ai. Shi anhte hpe jaw da ai myit nyan hpaji atsam marai ni hpe lusha shabyin nna lu sha na hpe ra sharawng ai.

Karai Kasang anhte hpe jaw da ai chyeju ni hpe kaman lila n galaw kau ai sha atsawm sha jai lang na hpe ra sharawng ai. Grau nna Madu lajang ya ai chyeju lusha hpe kaman lila n mai galaw kau ai.

Nang ngai kadaw lu su nga mai ai raitim, anhte lu sha ai malu masha gaw Karai Kasang jaw ya ai chyeju kumhpa rai nga ai. Madu Yesu sharin ya ai akyu hpyi ga hta “shani shanang anhte ra ai lusha, daini anhte hpe jaw rit,” ngu hpyi ga ai (Mt 6:11). Anhte buga ginra hta muk (bread) a malai shat lusha ngu yang grau chye na ga ai.

Mungkan Hta Kaw Si Hpang Gara Ai Mang Hkang

Anhte mungkan shinggyim prat shagu hta kaba dik ai mang hkang langai gaw lusha taw nna kaw si hpang gara ai mang hkang rai nga ai. hkying mun hku re ai ma ni si htum mat ma ai. N si ai raitim kaw si hpang gara ai a majaw yak hkak jam jau lam amyu myu hpe hkrum sha nga ra ma ai. Kanu kawa ni ma n lu bau na tsang ai majaw kasha la ai hpe sharam nna sha la chye ma ai.

Kaja wa nga yang ndai mungkan hta Karai kasang jaw chyeju gaw anhte mungkan masha ni lu sha na matu law htam hkra nga ai. Raitim, dai hpe law hpa myit hte n jaw n ang ai hku jai lang ai ni law nga ma ai majaw yawng a matu law htam ai ngu galoi mung n nga taw ai she rai nga ai. Kadai kaw mara nga ai kun?

Lusha taw nna kaw si hpang gara ai gaw mara a majaw rai nga ai. Adam yan Eve a mara a majaw hte anhte hkum nan shut hpyit ai mara a majaw, bai mungkan ga na n hkru n kaja ai lam yawng a majaw rai nga ai.

Tinang myit myit ai ni, grau nna sut su na lam chyu tam ai ni gaw matsan ni a majaw grau grau lu su sahti wa chye ma ai. Tinang tingkyen a matu shakut ai raitim, Karai Kasang ra sharawng ai lam rai nga ai, kaga masha ni hpe garum na hpe gaw malap mali da chye ma ai; garum na ra ai hpe dum tim, mu tim, n garum chye ma ai.

Kaw si hpang gara ai gaw anhte hkum nan a mara majaw mung rai nga ai. Kaw si hpang gara ai gaw masha kaga ni a majaw re ngu sha n mai tsun ga ai; mara hta taw tim akyu n pru ai. Anthe tinang hkum tinang hpe mung mara shagun ra ga ai. Tsun ga nga yang anhte ni myit su ai Karai Kasang a kashu kasha ni hku n nga ga ai. Anhte kaw si hpang gara hkrum jang, yak hkak jam jau hkrum jang she Karai kasang hpe dum chye ga ai; nga ngwi nga pyaw aten hta shi hpe n dum ga ai. Anhte kan bau bungli hpe atsawm sha masin jahkrat nna n galaw chye ga ai.

Kanu kawa ni ya tsun mat sai lam ni a majaw kashu kasha ni hpe kaw si hpang gara shangun ai rai yang mara kaba tai nga ai.

Grau nna mungdan up hkang ai ni a mara majaw mung shawa masha ni kaw si hpang gara hkrum chye nga ai.

Mungdan law law kaw yu dat yang mung shawa masha ni nga mu nga mai na matu nga nna ma shaprat ai lam hpe shayawm masin masat let mang hkang hpe hparan chye ma ai. Raitim, dai Asuya ni mungdan makawp maga mying hte hpyen laknak ni hpe ra ai hta jan nna gumhpraw ni wan kaba jai lang ma ai. Mung shawa masha akyu ara matu ngu na hta, hpyen hpung hte daru magam makawp na matu jai lang ma ai. Laknak a matu jai lang ai ja sut gan, gumhpraw kaji kajaw hte pyi mungkan hta kaw si hpang gara hkrum nga ai hpe hparan sa wa lu na madang rai nga ai. Up hkang rung ni hta lit ang ai ni tingkying myit kaba ma ai majaw matsan jam jau ai ni a matu garum ningtum ni hpe pyi du ra ai ni kaw n du shangun ma ai.

Nawku Hpung Hta Kahkying Gumdin Lam Gaw Anhte A Wenyi Lam A Matu N-Gun Atsam Tai Ai Sha N-Ga, Galoi Mung Matsan Hku De N Shang Shangun Ai.

Chyum mungga daw lahkawng hta San Pawlu anhte hpe myit hkrum myit ra ra ai lam sadi jaw da ai. Anhte myit masin kaw nna nan myit hkrum kahkying gumdin ra ga ai: bung pre ai makam; bung ai Karai; bung ai kashin kamun; bung pre ai wenyi chyeju ni anhte hta nga ga ai. Anhte ni yawng gaw Karai Kasang a kasha ni rai nga ai rai nna, lani mi na nhtoi hta hpang jahtum bandung sumsing mungdan de shaga la hkrum ai ni hkrai rai ga ai.

Prat hta yak hkak jam jau ai lam ni hpe hkam jan lu na matu anhte shada da myit hkrum kahkying gumdin nga na hpe Karai Kasang ra sharawng ai. Hku hku ai lam zawn re ai bung pre ai mayak mang hkang ni hpe hparan sa wa lu na matu hte hkam jan lu na matu Hkristan n re ai ni a matu kasi tai nga ra ga ai. N ju n dawng ai lm, n kam hkat ai lam, bungli hparan ai hta gumhpraw zawn re ai sut gan hte seng ai hta n san n seng ai myit ni nga ai rai yang prat hta hkrum ang ai yak hkak jam jau lam ni hpe hkam jan lu na n rai ga ai.

Ndai laban a Kabu Gara Shiga hta na mabyin hta ramma kasha wa shawang myit n rawng ai rai yang dai shawa masha ni lusha n lu sha na ma ai. Lama na dai ramma kasha wa, “ngai kaw nga ai ndai ma hkra rai sai; nu a matu shana shat jaw ra ai; ngai nanhte hpe jaw kau yang nu gaw hpa sha sana ma,” ngu tsun na ningdang kau ai rai yang? Dai shara kaw nang rai yang gara hku sumru na.

Akyu hpyi saga

Wa Karai Kasang e, shani shanang anhte ra ai lu sha dai ni anhte hpe jaw rit. Anhte hkam la lu ai lusha ra kadawn ai ni hpe garan jaw chye ai ramma kasha a myit masin anhte hta jaw bang ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (17) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – 2Hk.Hk 4:42-44

Chyum Mungga Daw (2) – Ehp 4:1-6

Kabu Gara Shiga – Yh 6:1-15

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.