Cardinal Charles Bo: Ginlung Kahkying Gumding Ai Hta Anhte Sak Hkrung Nga Pra Lu Ga Ai

Cardinal Charles Bo: Ginlung Kahkying Gumding Ai Hta Anhte Sak Hkrung Nga Pra Lu Ga Ai, Garan Ginhka Ai Rai Yang Gaw Hkying, Mun, Sen Re Ai Mung Shawa Masha Ni A Asak Hpe Jasum Kau Ra Na

July 19, bat langai ya shani, Cardinal Charles Bo kawn Maynmar mung shawa masha ni hte mungdan kata na wuhpung wuhpawng ni hpang de hpyi shawn laika “Statement” hpe shapraw dat nga ai.

Laknak lang hpyen gasat nga ai Myanmar Hpyen Asuya hte kaga lanak lang hpyen gasat nga ai wuhpung ni yawng laknak ni hpe jahkrat da nna, yawng a hpyen rai nga ai chyam bra ana Covid 19 hpe myit hkrum myit ra let jawm gasat ga ngu hpyi shawn da nga ai.

Myanmar hpyendap kawn mungdan daru magam ahkang aya hpe zing hkang la ai hpang, Covid 19 ana masum lang ngu na numdaw hku mungdan kata, grai sawng ai hku kalang bai chyam bra nga sai rai nga ai. Oxygen n lu mai ai mayak manghkang ni mung Myanmar mungdan kata hta nga taw ai.

Share shagan ni a nhtoi

Cardinal Charles Bo a hpyi shawn laika hpe share shagan ni sat hkrum ai nhtoi hta ka ndau da ai rai nga ai. Labau hte maren, Myanmar Mungdan Gumsan Magam Awng San hte rau share shagan ni hpe 1947, July 19 ya shani gumshen ai ni e sat kau hkrum ai rai nga ai.

Covid ana tsin-yam kaw nna makawp maga n lu byin nga ai majaw myit ru myit tsang kaba hte jam jau hkrum nga ai ya na aten hta, share shagan ni hpe shakawn shagrau ai masat dingsat hku myit la let mungdan masha yawng ginlung kahkying gumdin ai hte dai chyam bra ana kanu hpe rau jawm gasat ga; Mung masa n ru n ra byin nga ai lapran ana ningnan bai n shabyin, n shakap u ga, rau jawm makawp maga, rau jawm gasat ra ai aten rai nga ai ngu Cardinal, share shagan ni a nhtoi masat dingsat mahkrun hku hpyi shawn da nga ai.

Kahkyin gumdin ai rai yang asak hkye lu na, garan ginhka ai rai yang asak hpe jasum kau na

Ya na aten hta n hkrum n ra ai lam ni, dawsa ai lam ni, gumshen ai lam ni, hpyen gasat ai lam ni hpe jahkring kau da saga ngu akroi anoi hpyi shawn da ai hte yawng a hpyen rai nga ai chyam bra ana kanu hpe rau jawm gasat na matu mung hpyi shawn da nga ai.

 Majan byin shangun nna, hpyen yen tsin-yam hkrum ai mung shawa ni grau grau law jat wa na hpe ndai aten hta bai n shabyin na matu hte ya ten kaja wa hkyak hkyak ra kadawn taw nga ai tsi mawan ni, tsi lajang arung arai ni hkum tsup law htam ai hte ap nawng tsi lajang ya ai ni hpe ana kanu kap machyi hkrum nga ai ni hpang de sa du tsi lajang ya lu hkra hparan sa wa na matu mung hpyi shawn da nga ai.

Mungdan a ana zinli tsin-yam kaw nna rau jawm makawp maga jawm gasat ai hta hkamja dap magam gun ni hte ramma ni shimlum lam nga ai masa lam hku shang lawm lu na hpe lajang ya na matu seng ang ai daru magam ahkang aya lu ai ni hpe mung hpyi shawn tawn da nga ai.

“Kahkyin gumdin ai rai yang asak law law hpe hkye lu na, garan ginhka, hka bra ai rai yang gaw hkying, mun, sen re ai mung shawa asak hpe jasum kau ra na. Matsan dum lama myit n rawng ai rai yang labau gaw dai ni hpe tara jeyang na ra ai”, ngu mung sadi jaw shadum da nga ai.

Hpang jahtum hta “Myit hkrum myit ra let mayak manghkang ni hpe mungdan langai hku rau hparan lai wa saga ai hte maren matut nna mung rau jawm hparan sa wa na matu, rau ta gindun let htani htana simsa lam hte bai htingram prinem ai lam de hkawm sa ai gaw tau nau jaw ai lamik kum la rai nga ai lam, dai myit masin majing hte hkawm sa lu ai atsam marai Karai Kasang matsan dum myit kaba hte jaw ya na hpe kam sham let ana tsin-yam hpe rau jawm gasat nga ga,” ngu Cardinal Charles Bo Myanmar Mung Shawa masha ni hte Mungdan kata na wuhpung wuhpawng ni hpe hpyi shawn da nga ai lam Vatican Shiga Shapoi Dap hte RVA English Website ni kaw nna mung ndau da ya ma ai.

By Fr. Patrick Gawmaw Hkawng Yae

https://www.vaticannews.va/en/church/news/2021-07/myanmar-bo-peace-appeal-covid-conflict-economy.html

https://www.rvasia.org/asian-news/myanmars-cardinal-bo-calls-unity-fight-surge-coronavirus-cases