Myanmar Mung Shawa masha ni hte Mungdan kata na wuhpung wuhpawng ni hpang Cardinal Charles Bo a hpyi shawn dat ai lam

Cardinal Charles Bo A Ndau Laika

Yawng A Akyu Ara Matu Asak Ni Hpe Rau Hkye Mawoi Ga!

Ginlam: Myanmar Mung Shawa masha ni hte Mungdan kata na wuhpung wuhpawng ni hpang Cardinal Charles Bo a hpyi shawn dat ai lam

Hkristu hta,

Ngai tsaw ra dik ai Myanmar mung dai daw ai mung shawa masha hpu nau ni e,

Covid ana tsin-yam gaw anhte Myanmar mung shawa masha ni n hkrum ga ai, ja dik ai jahten shaja adawt nga ai hpe hkrum nga saga ai. Hkying kaba re ai mung shawa masha ni hta ana kap chyam bra nga ai majaw myi pri si ni hte rau rai nga ga ai. Tara mungga madat hkam la na aten pyi n lu rai nga saga ai. Tsa kaba re ai moi mang ni hpe lup ding lup wa de hkrap myi pri ni hte sa lup makoi ra taw nga sai. Asak hkye Oxygen lu la na matu shani shana, myit tsan myit li hkrap myi pri ni hte, lam ntsa pru nna ala dingda nga ra ma ai hpe myit n pyaw hpa mu lu nga ai.

July 19 ya shani gaw “share shagan” ni a nhtoi rai nga ai. Kanu mungdan a matu shanhte ni sai hkaw sak jaw ap nawng lai wa masai. Covid ana tsin-yam kaw nna makawp maga n lu byin nga ai majaw myit ru myit tsang kaba hte jam jau hkrum nga ai ya na aten hta, share shagan ni hpe shakawn shagrau ai masat dingsat hku myit la let, mungdan masha yawng galum kahkying gumdung ai hte dai chyam bra ana kanu hpe rau jawm gasat ga. Mung masa n ru nra byin nga ai lapran ana ningnan bai n shabyin, n shakap u ga, rau jawm makawp maga, rau jawm gasat ra ai aten rai nga ai.

Chyeju hte n hkrum n ra ai lam ni, dawsa ai lam ni, gumshen ai lam ni, hpyen gasat ai lam ni hpe jahkring kau da saga ngu akroi anoi hpyi shawn nngai. Anhte rau jawm gasat ra ai gaw, anhte a myi hte n mu lu ai, rawt jat nga sai mungdan ni pyi n mu lu shi ai, n makawp maga lu shi ai, n gasat dang kau lu shi ai, dai ana kanu hpe rai nga ai. Majan byin shangun nna, hpyen yan tsin-yam hkrum mung shawa ni grau grau law jat wa na hpe ndai aten hta naw shabyin na ahkang jaw gring a ni? Ya aten, kaja wa hkyak hkyak ra kadawn taw nga ai gaw tsi mawan ni hte tsi tsi hkam lam ai hte seng ai arung arai ni hkum hkum tsup tsup law htam ai hte ap nawng tsi lajang ya ai wuhpung wuhpawng ni hpe ana kanu kap machyi hkrum nga ai ni hpang de sa du tsi lajang ya lu na matu she rai nga ai.

Shawng na lang hte lahkawng ngu na lang Covid ana zingli hta ai maning na aten ni hta anhte ni myit hkrum myit ra let rau jawm gasat lai wa saga ai. Tsawra matsan dum lama myit kaba rawng ai Myanmar mung shawa masha ni yawng yak hkak jam jau hkrum nga ai ni yawng hpe garum shingtau lai wa saga ai. Ramma ni gaw tsi tsi lajang ai tsi rung tsi gawk ni hte Quarantine Center ni hta ap nawng lai wa sai rai nga ai. Hkamja Dap magam gun ni a share ninghkring myit masin ni gaw, dai aten ni hta kabu myit dik myipri ni lwi hkrat lai wa sai rai nga ai.

Ya aten gaw, arau myit hkrum galum kahkyin gumding let anhte a jawm pawng n-gun madun na aten rai nga sai. Dai zawn myit hkrum kahkyin gumding, rau jawm galaw lu ai atsam, tsawm htap labau hpe ka masat matsing lu ai atsam anhte hta nga ga ai.

Mungdan a ana zingli tsin-yam kaw nna rau jawm makawp maga jawm gasat ai hta hkamja dap magam gun ni hte ramma ni shimlum lam nga ai masa lam hku shang lawm lu na hpe lajing lajang ya na matu seng ang ai daru magam ahkang aya lu ai ni hpe mung hpyi shawn nngai. Kahkyin gumdung ai rai yang asak law law hpe hkye lu na, garan ginhka, hka bra ai rai yang gaw hkying, mun, seng re ai mung shawa asak hpe jasum kau ra na. Matsan dum lama myit n rawng ai rai yang labau gaw dai ni hpe tara jeyang na ra ai.

Myit hkrum nga ga. Mayak manghkang ni hpe mungdan langai hku rau hparan lai wa saga ai. Matu nna mung rau jawm hparan sa wa ga. Rau ta gindun ga ai rai yang, htani htana simsa lam hte bai htingram prinem ai lam de hkawm aa ai tau nau lamik kum la rai mai nga ai.

Dai myit masin majing hte hkawm sa lu ai atsam marai Karai Kasang matsan dum myit kaba hte jaw ya u ga. Ana tsin-yam hpe rau jawm gasat nga ga.

Akyu hpyi ga hte rau myit mada lam tawn da let,

Cardinal Charles Bo

Hpa-Awn Ningbaw - Myanmar Mungdan Saradaw Hpung Kaba

Hpa-Awn Ningbaw – Asia Dan Saradaw Hpung Kaba

Tingyang Up – Myanmar Mungdan Makam Masham Hpung Shagu A Simsa Hpung

Ningtau Hpa-Awn – Mungkan Makam Masham Hpung Ni A Simsa Hpung

By Fr. Patrick Gawmaw Hkawng Yae