Pranwan Ladaw (15), Shaning B, 2021

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (15) ngu na laban rai nga ai.

Ga Shaka dingsa prat hta Myihtoi kaba mali (4) hte Myihtoi kaji shi lahkawng (12) a myihtoi laika ni lawm ai lam lai wa sai laban hta anhte na lu saga ai. Ndai laban hta Myihtoi kaji 12 hta na langai mi rai nga ai Myihtoi Amos a myihtoi ga hpe na lu ga ai.

Salomon Hkawhkam si mat ai shaloi shi a mungdan daw lahkawng garan mat ai. Israel myu lakung lahkawng chyu sha Solomon hkawhkam a kasha Rohabun hpe ga sadi hkam ma ai. Israel Myu lakung 10 hte gaw mungdan kaga hpe gaw de la ma ai. Yuda myu lakung lahkawng a mungdan daju mare gaw Yerusalem rai nga ai. Israel myu lakung 10 a mungdan daju gaw Samaria mare rai nna dai mare hpe mare ningnan hku gaw gap la ma ai.

Law malawng gaw Israel hte Yuda mundan lahkawng lapran hpyan n gasat jang ning dang kalang hkat ai lam nga ma ai. Mungdan lahkawng yan a matu Yerusalem gaw nawku daw jau shara daju rai nga ai. Yuda hkawhkam gaw dai zawn kaga mungdan masha ni mung dai shara kaw nawku daw jau lam sa galaw ai a marang e htawm hpang de mungdan langai sha tai wa nna shi a hkawhkam aya jasum kau na hkrit tsang nga ai.

Dai zawn re ai masa hpe makawp maga la na matu Bethe kaw htingnu langai mi gaw gap nna tinang a myu sha ni hpe nawku daw jau shangun ai. Bethe ngu ai lachyum gaw “Karai a nta” ngu lachyu rawng ai. Shebawethny gaw Israel ni a matu manu shadan dik htum shara rai nga ai. Ahbram shi hpe ga sadi tawn da ya ai buga de du ai shaloi, dai shara kaw nawku daw jau lai wa ai (Np. Nhp 12:8). Dai hte maren Yaku mung shi a kahpu Esau hprawng mat ai shaloi (Np. Nhp 28:18) bai shi a kahpu hte prinem htingram lam lu ai hpang kun dinghku masha ni hte rau bai wa ai shaloi (Np. Nhp 35:6-7) nawku daw jau lai wa ai shara rai nga ai.

Amazia Hte Emaw Ni Bawngban Ai Lam

Bethe gaw Yuda hkawhkam ni a tara shang nawku daw jau shara rai nna, dingdung maga na myu sha lakung 10 a daju shara tai wa ai. Hkingjawng ni a matu hkrat ang ai kumhpa ni hpe hkawhkam e hkam ya ra ai. Dai hta Amazia ngu ai wa mung lawm nga ai.

Myihtoi ni hta lai nna “myihtoi ni a kahpu kanau ni” mung nga ma ai. Dai ni hta na lahkawng gaw nawku htingnu hte ni ai makau grupyin hkan dam hkawm let makam mying hte kan bau let Karai Kasang a mying ningsang hta hkaw tsun ai ngu hkam la ma ai. Law malawng gaw shanhte ni Myihtoi shaje ni rai ma ai. Anhte kaw du sa chye ai ta maka yu ai ni madang sha rai ma ai.

Karai Kasang gaw dingdung mungdan Yuda kaw na Ahmot hpe lata la nna, Israel mungdan de sa du hkaw tsun na matu shangun dat ai. Ah mot mung Karai Kasang hpe madat mara let, hkawhkam wang daju rai nga ai Bathel kaw lawan dik sa du hkaw tsun ai.

Shi ndai zawn sa du hkaw tsun ai hta yak hkam lam kaba lahkawng nga ai. (1) mungdan n bung ai, dingdung maga mungdan na sa du ai mungdan kaga masha rai nga ai, (2) dai teng hta Israel mungdan gaw rawt jat galu kaga magang sai rai nna, ningbaw ningla ni hte mung shawa masha ni Yaweh karai kasang a matsan mayan jam jau hkam shiga hpe madat hkam la na myit n lawm ma ai.

Ahmot a hkaw tsun ai lam hpe madung ninghkap ai ni gaw Bethel kaw na hkingjawng agyi ni rai ma ai. Shanhte gaw Hkawhkam a madi shadu garum ya ai lam ni hte nga mu nga mai taw ai ni rai ma ai.

Amazia kaw nga ai Ahmot gaw ndai laban na chyum daw langai hta ninghkap gasat ai a mabyin hpe chye na da ai wa rai nga ai.

Shinggan masha n mai shang ai; nang n lu lu n lu sha matsan taw yang mung na a hkawhkam kaw wa hpyi sha u; ndai shara gaw anhte a hkawhkam up ai shara she re; na a n re ai; n kaja ai mungga hkum sa hkaw tsun u ngu shanhte ni tsun na ma ai.

Ahmot mung teng man jaw ang ai ai hpe htuk manu ai hku bai htai ai. Ngai gaw tara mungga hkaw nna kan bau magam galaw sha ai wa n rai nngai; Yaweh Karai kasang ngai hpe tara hkaw na matu n shangun yang, ndai shara de galoi mung sa du n n rai nngai; ngai a mungga madat n pyaw, na n shang ai raitim, Karai kasang a teng man shiga rai nga ai, ngu bai htai ai.

Kabu Gara Shiga Gun Sa Ai Ni A Lamang Mahkyen

Yesu Madu hkum nan Kasa 12 hpe lata la ai. Kawa karai kasang hpang de lung wa ai shaloi, dai kasa 12 hpe Shi a sasana magam hpe matut gun hpai na matut lit shatsam da ai.

Yesu Madu gaw shanhte hpe lani hte lani myit galu kaba ai hte sharin shaga ya lai wa ai. Shi hte rau nga ai hpang shanhte hpe mare buga ni hta tara hkaw na matu shangun dat ai. Kabu Gara Shiga hpe atsawm sha hkaw tsun lu na matu mauhpa hpung dagu madun lu ai atsam shanhte hpe jaw da ai. Tara mungga hkaw tsun hkawm ai a marang e shawng lam sasana a matu shajing shachyip da na ai rai nga ai.

Yesu Madu shanhte hpe shangun dat ai shaloi, ahkyak dik matsun masum jaw da ai. (1) Shanhte gaw Karai Kasang Kasang a Ja mungdan ni wa magang ra ai lam ndau ya nna, shinggyim masha yawng a mara dat hkyam sa hpe hpyi shawn let Karai kasang a up hkang ai npu de shanu shingbyi wa na matu saw shaga ra ai. (2) Shanhte tara mungga hkaw tsun ai shaloi, shinggyim masha ni jai lang ai arung arai, arawng power, hte mungkan sut gan ni hpe n mai machyu ai. Shanhte hpe shangun dat ai Yesu madu gaw shanhte hte rau nga nga na rai nna, Karai Kasang a hpung dagu gaw shanhte hpe a jaw nga na rai nga ai. (3) Shanhte gaw machyi makawp ai ni hpe ahkyak madung da ra na; Shanhte a machyi makawp ana ahkya ni hpe shamai shatsai ya ai lam gaw Karai Kasang e shanhte a wenyi hpe shamai shatsai ya ai kumla ni rai nga ai.

Karai Kasang gaw ndai yaw shada lam ni hte shanhte hpe shangun dat ai rai nga ai. Ndai gaw prat shagu na tara mungga hkaw tsun ai ni yawng hte shanhte a marang e tara mungga madat hkam la ai ni a matu manu dan dik ai len la shara, kasi ningli la shara rai nga ai.

Kabu Gara Shiga hkaw tsun ai ni hpe Karai kasang hkum nan lata la ai rai nga ai. Karai Kasang Ahmot hpe lata lai wa ai. Shi gaw laika n chye hti n chye ka ai wa rai nga ai. Karai kasang gaw hpaji n chye ai nga hkan masha ni hpe kasa hku lata san da ai. Tsun mayu ai gaw, Karai Kasang gaw lu su ai ni hte hpaji ningtawng ai ni hpe Kabu Gara Shiga hkaw tsun na matu n lata lai wa ai. Masha ni a ningmu hta manu n dan ai wa hpe lata ai a marang e Shi Karai kasang a hpung dagu hpe grau shadan shadawng, jahtoi shalen na matu rai nga ai.

Masha hkum shagu malu masha kan bau magam a matu Tara Hkaw Sara n mai tai ai. Jau, Deacon, Ma Ma ni hte Tara Hkaw Sara ni, bai Kabu Gara Shiga hkaw tsun ai hta lawm ai ni gaw kaga masha ni zawn prat a matu ra kadawn ai lam ni nga na ma ai. Shanhte tara mungga hkaw tsun ai lam hta garum shingtau ya ra ai. “Amu galaw ai wa gaw shi a shabrai/ shahpa lu la ging nga ai,” (Mt 10:10). Gum hpraw a matu tara mungga hkaw tsun ai ni gaw sut masa lam galaw ai, myihtoi masu ni sha rai nga ai.

Kabu Gara Shiga hkaw tsun ai ni gaw machyi makaw ai ni hpe kaja wa tsaw ra ai ni rai ra ai. Anhte ni bum ga hte mare hkan sasana gawan hkawm yang shawng ningnan machyi makaw re ai ni kaw sa du kawan ra ai. Dai zawn galaw yang nawku hpung hpe kadai mung mara tam, jahpai ai lam n lu galaw ai. Sasana galaw ai ni tsi du ni n rai ma ai raitim, chye da ai hpaji yawng hte machyi makaw ai ni hpe yu lakawn ya ai.

Kabu Gara Shiga hkaw tsun ai ni gaw masha ni a mayak mahkak lam ni hte hkam sha lam ni hpe madat ya ai gaw Karai Kasang a Kabu Gara Shiga hpe gun sa ai lam rai nga ai. Anhte a buga ginra ni hta na Jau Ma Ma n tai shi ai gaw myit n pyaw hpa rai nga ai. Lai wa sai aten anhte a buga ginra ni hta htaw grai tsan ai maigan mungdan na sasana jau ma ma ni e sasana galaw lai wa ma ai. Ya shiga madat taw nga ai wa e, ngai a buga na jau ma ma tai ai masha nga sai kun, ngai a nta masha ni hta na jau ma ma tai ai masha nga sai kun bai sumru san la nga ga. Anhte a ginra buga hta sasana shang ai kade na sai rai kun?

Anhte a buga ginra ni hta sasana galaw jau ma ma ni n law la nga ai. mungdan nkau ni hta nga yang sasana jau ma ma ni Covid-19 ana tsin-yam a majaw law law si htum mat masai. Lai wa sai April shata htum maga hte May praw maga, laban bat masum lapran India mungdan kata hta sha jau marai 160, lani mi marai mali (4) madang si mat ai shiga hpe na na masai.

Sasana ginra nkau ni hta Jau ni n law ai majaw kaga buga na Jau ni Kabu gara shiga hkaw tsun na matu sa garum ra ma ai. Anhte a buga ni hta mung dai hta lawm nga ai. Jau n law ai majaw Tara Hkaw Sara law law tawn da ra ai. Raitim, Nawku Hpung masha ni a matu Jau ni sha galaw mai ai magam ni galaw ai hta ningra ai lam ni anhte a buga ginra ni hta byin nga ai.

Anhte hta myit rawng ga ai rai yang, mungdan n bung ai kaw na ni sasana sa galaw ai raitim, Ahmot hpe zawn ninghkap ga ai rai yang nawku hpung kata dingbai dingna tai nga ai.

Ra Kadawn ai shara ni hta sasana magam hpe sa du garum na mung anhte a matu grai ahkyak nga ai. Myit mada lam mung rai nga ai.

Karai Kasang a Kabu Gara Shiga gun ai ni gaw anhte zawn sha gawng kya ai lam ni law law nga na ma ai. Raitim, dai lam ni a majaw Shanhte ni gun sa ai Kabu Gara Shiga hpe hkap la ai hta dingbai dingna n mai shatai la ga ai.

Kabu Gara Shiga hkaw tsun ai ni gaw Hkristu madu a prat hpe kasi ningli hkam la lu hkra shakut ra ai. Shanhte gaw dai lam hpe shakut nna hkan shatup ma ai raitim, n hkum n tsup ai hta sha n ga, mara hpe pyi galaw shut ma ai.

Raitim, Karai Kasang a mying ningsang hta shanhte jaw ai kaba gara shiga hpe hkap la hkam la ai hpe gaw pat shingdang ninghkap ai lam n mai galaw ga ai. Hka hpe lu ai shaloi, Hka shinggat, shing n rai, hka pipe a kaji kaba madang hpe n sum ru ai sha, lwi hkrat wa ai hka san ai, n san ai hpe sha madung sumru jep yu nna lu ga ai.

“Nanhte hpe hkap hkalum la ai wa kadai mung, ngai hpe hkap hkalum la ai wa rai nga ai; ngai hpe hkap hkalum la ai wa kadai mung ngai hpe shangun dat ai wa hpe hkap hkalum la ai wa rai nga ai,” (Mt 10:40).

Anhte gaw kam sham lam hte dai hpe gun sa ya ai ni a matu Karai kasang hpe chyeju dum shakawn ra ga ai. Chyum mungga daw lahkawng gaw Hkarai Kasang hpe chyeju dum shakawn ai gaw pyaw ngawn ai nsen rai nga ai lam tsun da ai. Mungkan ga hpe hkye la ai Kabu Gara Shiga jaw na matu Kawa Karai Kasang Shi a Kasha shingtai hpe mungkan ga de shangun dat ai. Anhte kashin kamun hkam la ai shaloi mara hta na shalawt ya ai. Anhte hpe Karai Kasang a kashu kasha ni shatai ya ai Wenyi a chyeju rai nga ai. Karai Kasang jaw ya ai asak hte ngwi pyaw lam hpe sumsing mungdan hta hpring tup hkam sha lu na ga ai. Ndai lam ni yawng a matu Karai Kasang hpe chyeju dum shakawn ra ga ai. Dai chyeju ni hpe hkam la lu na matu Kabu Gara Shiga gun sa ai sasana galaw ai ni a matu mung Karai Kasang hpe Chyeju dum ra ga ai.

Karai Kasang a chyeju kumhpa ni anhte tai na matu Karai Kasang a kabu gara shiga gun sa ai ni hpe anhte ni galoi mung ra kadawn nga ga ai.

Akyu hpyi saga

Wa Karai Kasang e, Nang Madu a Kabu Gara Shiga anhte hta gun sa ai ni a matu nang madu hpe chyeju dum ga ai. Anhte hpe mung Nang Madu a Kabu Gara Shiga gun ni shatai la rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (15) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Am 7:12-15

Chyum Mungga Daw (2) – Ehp 1:3-14

Kabu Gara Shiga – Mk 6:7-13

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.