San Columban  Cathedral Nawku Htingnu Kata Misa Tawn Gram Lajang Ai Lam Galaw Nga

Myitkyina Sasana a Cathedral Nawku Jawng kaba rai nga ai San Columban Nawku Jawng kata na Misa tawn maga de nnan bai gram lajang ai lam galaw nga ai hpe chye lu ai.

Misa nawng ya ai Nawku tawn hte Jau ni, tara tau ni dung ai shara  npu daw de hpun pyen nep da ai rai nna shaning na wa sai hte rau hpun pyen ni tsam mat sai hte ntsa kaw nep da ai kawzaw ni mung waw jet mat taw nga sai re majaw bai gram lajang ai re lam chye lu ai.

“ Ndai nawku tawn maga de hpun pyen nep da ai re majaw shaning na wa ai hte tsam wa nna hten taw sai hte kawzaw ni mung waw wa ai,  dai re majaw Covid byin nna Nawku Jawng pat da ai laman ngang hkra grau tsawm htap hkra galaw mat na re”

Ndai gram lajang galaw ai lam woi awn galaw ai Myitkyina Ginwang up Wa Jau John  Galang La RawTsun ai hta, “ Ndai nawku tawn maga de hpun pyen nep da ai re majaw shaning na wa ai hte tsam wa nna hten taw sai hte kawzaw ni mung waw wa ai,  dai re majaw Covid byin nna Nawku Jawng pat da ai laman ngang hkra grau tsawm htap hkra galaw mat na re” nga nna tsun ai.

Ndai Misa tawn gram lajang na matu garum ya ai alu madu mung nga sai rai nna ra ai daw hpe hpung masha ni garum madi shadaw ai alu gumhpraw ni hte galaw mat na re lam, npu daw de masala wut nep nna Maisak hpun pyen nep nna galaw na re, ngut kre ai du hkra galaw na matu gumhpraw sen 77 ram ma na re lam Wa Jau matut tsun mat wa ai.

“ Ya du hkra rai yang Nawku jawng galaw na matu sen 60 jan rai sai, Laksama Engineer ni hte jahkrum yu yang sen 77 ram ma na nga tsun ai, sen 10 jan sha ra sai re, alu madu ni yawng hpe Karai Kasang shaman ya u ga”

nga nna Wa Jau La Raw tsun ai.

Hpung masha ni hpyi shawn hpaji jaw ai lam ni nga ai majaw Nawku tawn hpe mung loi mi (5 or 6 inches ram ) shatsaw jat na re lam Wa Jau La Raw tsun ai.

Nawku jawng kata gram lajang ai lam hpe Covid byin ai hpang Nawku Jawng pat da ai ten kawn galaw ai hta, Nawku Jawng shawng hpang, shinggan wang ting tsi chya shatsawm ai lam, Mara raw dung hkum ni, Tara tau ni palawng galai ai gawk hte dingsi tower gram shatsawm ai lam ni mung galaw lu sai rai nga ai.

Matut nna San Columban Nawku Jawng wang kata mawn shatsawm ai lam hpe Wa Jau John Galang La Raw woi awn let galaw ai hta Nawku Jawng ndaw pai hkra nampan  hte tsing du hkai shatsawm ai lam, marang ta ten Nawku Jawng wang kata hka ung ai lam ni nnga na matu kattaya lam kaba nep ai lam, Mawdaw cycle tawn Car Parking shara galaw jahtuk ai lam ni hpe matut galaw nga ai rai nga ai.

San Columban Nawku Jawng kaba hpe Colubam Sasana Jau ni lai wa sai 66 ning hkan gap da ya ai rai nna 1955 ning March shata 17 ya shani dingshawn shang shamna hpaw hpang ai rai nga ai.

Thomas