Wa Sarabyin Francis kaw nna, Sak Kung Kaji Kawoi Ni A Poi Nhtoi Hta Hpringtsup Ai Indulgences Chyeju Hkam Nhtoi Masat Ya Na Shiga

“The first World Day of Grandparents and the Elderly” shawng ningnan lang na Mungkan Kaji Kawoi Poi Nhtoi hpe 2021 July 25 ya shani galaw hpang na re lam chye lu ai. Dai nhtoi hta “Plenary Indulgences” Hpringtsup Indulgences chyeju hpe hkam la lu hkra Wa Sarabyin masat lajang da ya na re lam, June 22, bat lahkawn sha shani, Vatican Shiga Dap kaw nna ndau da ma ai.

Dai Nhtoi hta myit lawm hkawm lawm ai hte teng man myit malai lam hkam la, alu atan, mai kaja magam bungli galaw sa wa ai a marang e dai chyeju hpe hkam la mai na rai nga ai.

Plenary Indulgence hpe mara raw sakramentu hkam la nna, Misa Hkungga nawng jau ai hta shang lawm, chyoi pra hkum hkam, akyu hpyi let Wa Sarabyin a yaw shada lam a matu akyu hpyi nna hkam la mai ai lam matsun jaw da magang da nga ai.

Bai, machyi masha ni hpe kawan yu lakawn, kabai da hkrum ai ni hpe lakawn lanawn, n hkum n tsup ai ni, n tai n mai ai masha ni zawn re ai ni hpe yu lakawn ai a marang e mung dai chyeju hpe hkam la lu mai na lam mung matsun jaw da nga ai.

Masa lam kaba ni a majaw tinang a dum nta kaw shanu nga ra ai ni mung, online social media, television, hte radio ni hpe yu madat let akyu hpyi ai a marang e mung dai chyeju hpe hkam la mai ai lam mung matsun da ma ai.

Ndai zawn Mungkan kaji kawoi ni a poi nhtoi hta Nawku Hpung masha ni Indulgences chyeju hkam la lu na matu Cardinal Kevin Farrell, Prefect of the Dicastery for Laity, Family and Life, e hpyi shawn tang shawn da ai majaw Wa Sarabyin Francis kawn hkap la ai re lam mung chye lu ai.

Ndai Mungkan kaji kawoi poi nhtoi hpe July shata a mali ngu laban bat hta shaning shagu galaw na matu lai wa sai January 31 shani, Pranwan Ladaw mali ngu na laban, “Madu a Lamu Kasa Akyu Hpyi” ngut ten, Wa Sarabyin Francis hkum nan ndau da ai rai nga ai. San Joachim hte Anne Poi nhtoi hpe kanu kawa poi ngu masat da ai rai nna dai nhtoi hte ni htep dik htum nhtoi hpe lata da ai mung rai nga ai. Nhtoi hpe gaw hkrak n masat ai rai tim, July shata a mali ngu na laban nhtoi hpe masat da ai rai nga ai.

Ndai poi nhtoi gaw Madu Yesu a kaji kawoi San Joachim hte San Anne a poi nhtoi hte grai ni htep dik ai nhtoi mung ang ai re majaw yaw shada let masat da ai rai nga ai. Ma Yesu hpe Nawku Htingnu hta sa ap ai hta poi nhtoi hta asak kaba sai Simeon hte Anna gaw Ma Yesu hte hkrum lu ma ai rai nna, dai Ma Yesu gaw Messiah re ai hpe dum chye ma ai. Chyoi Pra ai Wenyi gaw daini na aten ni hta mung Karai Kasang a hpaji byan-ya hpe asak kung dinggai dingla ni hku nna asak kaji grau ai ni a ntsa ru bang ya nga ai.

Asak kung sai ni a nsen gaw grai nan manu dan ai. Hpa majaw nga yang dai nsen gaw Karai Kasang hpe shakawn shagrau ai hte shinggyim masha ni a ru pawt madung hpe mung makawp maga hting hkang da ya ai. Asak kaba sai ni kaji kawoi ni gaw sak naw ram shi ai ni a matu shinggyim prat ban shagu a mahkrum madup ni hpe matut mahkai ya nga ai re ngu Wa Sarabyin Francis sang lang da nga ai.

Asak kung kaji kawoi ni hpe n mai malap da ai. Shinggyim masha law malawng gaw asak kaba sai kaji kawoi ni hpe malap dap chye ma ai. Ndai asak kaba sai kaji kawoi ni gaw sak ram ramma ni a matu Karai Kasang kaw na lu la ai chyeju kumhpa re ai hpe myit dum ra ga ai. Kaji kawoi ni hte kashu kasha ni lapran hta shada chye na hkat na gaw grai nan ahkyak ai. Hpa majaw nga yang, Myihtoi Joel tsun ai hte maren, kaji kawoi ni gaw shanhte a kashu kasha ni a yup mang shingran bandung hpe mu chye ya ai hte shaman ya lu ai , lam woi ya lu ai. Kashu ramma ni gaw kaji kawoi ni a myithtoi ga, shaman ga, hte lam matsun ya ai a marang e shawng lam bandung de du dep lu na rai nga ai ngu mung Mungkan kaji kawoi ni a poi nhtoi masat ai shani Wa sarabyin Francis tsun sang lang da nga ai.

Wa Sarabyin hkum nan mung dai shani San Peter Nawku Htingnu hta Misa hkungga nawng akyu hpyi woi na re lam chye lu ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-06/plenary-indulgences-apostolic-penitentiary-world-day-grandparent.html

https://www.vaticannews.va/en/pope/news/2021-01/pope-establishes-world-day-for-grandparents-and-the-elderly.html