Jam Jau Hkrum Myanmar Mung Shawa Masha Ni Hpe Garum Ya Na Matu  Salum Chyinghkra Hpaw Ya Ga Nga Nna Wa Sarabyin Hpyi Shawn

June 20, laban ya shani, “Madu A Lamu Kasa Akyu Hpyi” ngut ten, Wa Sarabyin Francis Myanmar Mungdan Na Saradaw Ni A Ndau Laika nsen hpe shalai ndau ya let Myanmar mung shawa masha hkying, mun, seng re ai htawt sit hkawm ai ni hte kaw si hpang gara hkrum ai ni hpe garum shingtau ya na matu hpyi shawn da ya nga ai. Hpyen yen masha ni a matu salum chyinghka hpaw da let garum shingtau ya na matu mung matut manoi hpyi shawn da ya nga ai.

Cardinal Charles Bo kawn akroi anoi hpyi shawn dat ai lam hpe nhtoi, 25 May 2021 hta “Shinggyim masha sari sadang hte Myanmar mungdan kata mung shawa masha hte seng ai nawku daw jau shara ni rai nga ai nawku jawng ni hte hpung shagu hte seng ai nawku daw jau shara ni hta shanu shingbyi nga ai mara n nga mung shawa masha yawng hpe manu shadan ya na matu hpyi dawn ai lam” ngu ai ga baw hte seng ang ai ni yawng hpe hpyi shawn ndau da ai.

Madi nna ka ai gaw 2021 May 23 ya shana yuptung ten Loikaw Saradaw Ginwang, Kayantharyar mare hta nga ai, Yesu A Salum Ningsang Nawku Jawng hta Myanmar Hpyen hpung kawn laknak kaba gap ya ai a majaw dai nawku jawng hta shanu nga ai mara n lu mung shawa masha marai mali (4) si hkrum mat ai hte hkala masha law law nga nna, hprawng yen hkawm mat ra ai mung shawa masha ni law law nga ai majaw ndai hpyi shawn ndau laika hpe ndau dat ai lam rai nga ai.

2021 June 11 ya shani hta mung Myanmar mungdan na Kahtawlik Saradaw hpawng a hpyi shawn ndau laika hpe bai shapraw da ma ai rai nga ai. Ndai Hpyi shawn ndau laika gaw Mung shawa masha ni yawng hpang de hpyi shawn ai laika mung rai nga ai.

Ga hpaw hku nna “Kahtawlik Saradaw ni gaw mung masa galaw ai ni n rai ga ai raitim, hpung woi hpa-awn ni hku nna mung shawa masha ni hte rau rai nga ga ai” lam ga hpaw da ma ai.

Majan byin nga ai shara ni hte gumshen ai lam, dawsa ai lam ni byin nga ai shara ni hta na asak kung sai dinggai dingla ni hte sasana ma kaji ni tsan ai shara, yak hkak jam jau ai bung lang hkaraw ni hkan hprawng makoi hkawm ra nga ma ai. Dai zawn re ai mara n lu masha ni a matu myit tsang shara kaba, myit n pyaw lam kaba rai nga ai. Shanhte hpe lawan ladan, ya hkyak hkyak garum la ya na matu hpyi shawn da ma ai. Dai zawn yak hkak jam jau hkrum nga ai ni gaw anhte a hpu nau ni hkrai rai ma ai, ngu sang lang ga hte rau hpyi shawn da ma ai.

Nawku daw jau lam hte seng ai shara ni hte seng nna mung, lai wa sai aten ni hta byin ai lam ni a majaw mung shawa masha ni nawku jawng ni hta shanu shingbyi ai lam ni galaw ma ai; dai zawn galaw ai hta gumshen ai ni e shanhte shanu shingbyi ai nawku jawng ni hpe jahten sharun ya ai lam ni nga nga ai. Makam hte seng ai mungkan ting e hkap la da ai tara upadi ni hpe hkan shatup na matu mung hpyi shawn da ma ai. Hkristan nawku jawng ni sha n rai, makam lu ai hpung shagu a nawku daw jau shara ni hpe n  jahten na matu mung hpyi shawn da ma ai.

Kahtawlik hpung masha ni hpe mung shadum jahprang da ma ai. Anhte a Myanmar Mungdan ngwi pyaw simsa wa lu na matu tinang nga ai Jau Ginwang, mare buga ni hta yaw shada lam kaba tawn da let shani shagu Misa Hkungga nawng jau ai hta shang lawm, Chyoi Pra Hkum Kawan ai lam galaw, Rosary hti akyu hpyi, Novena galaw ga ngu hpung masha ni yawng hpe saw shaga da ma ai.

Hpang jahtum hta lai wa sai sani shaning (70) ning hta simla lam n lu ai; myi pri si ni hte hkrit tsang myit kaba hte myit ru jam jau lai wa sai hte hkrat sum lam kaba ni hpe bai htang sumru nna shawng lam prat galu, htani htana ngwi pyaw simsa lam a matu yaw shada let shinggyim sari sadang hpe simsa ai ladat hte sha gaw de sa wa lu ai hpe dum hprang nna dai teng man jaw ang ai simsa lam hta hkawm sa ga ngu mung shawa masha yawng hpe shadum n-gun jaw ndau da ma ai rai nga ai.

Ndai ndau laika ni hpe Wa Sarabyin Francis, Laban shani, Madu a lamu kasa akyu hpyi ngut ten mungkan masha yawng hpe ndau ya let Myanmar mung shawa masha ni hpe garum shingtau ya na matu hpyi shawn dat ai rai nga ai.

“Hkristu a Salum Ningsang gaw yawng a masin salum hta nga nga u ga hte dai salum ni gaw Myanmar mungdan simsa lam hpe jaw ya ai salum ni rai u ga,” ngu Wa Sarabyin Francis akyu hpyi da let, “the United Nations’ World Refugee Day” masat dingsat hku “anhte rau shamai hkam la ga, rau sharin hkam la ga, rau htoi tu nga ga,” ngu matut saw shaga da nga ai.

Dai gaw “htawt sit hkawm ai ni, Hpyen yen masha ni, matsan jam jau ni yawng a matu salum hpe hpaw da ga ngu ai rai nga ai nga nna Wa Sarabyin tsun ai lam Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews #rvakachinservice

Source : Vatican News