Laudato Si Hpe Madi Shadaw Ai Hku Nna Hpun Hkai Hpang Ai Lam Myitkyina Sasana Hta Nawku Hpung Woi Galaw Nga Sai

Mungkan ga bai tsit tsawm wa na matu Wa Sarabyin Francis a matsun laika rai nga ai Laudato Si hpe madi shadaw ai hku nna kabu gara hpun hkai hpang ai hpe Myitkyina Saradaw ginwang hta nawku hpung woi galaw nga sai. 2021 ning June shata 12,bat 6 ya shani  Myitkyina Saradaw Ginwang,Aung Myin Thar mare na  Nawku hpung madu ai  sun wang  hta shaning galu hpun hpan rai nga ai (Man Jan Charle ) ngu ai hpun bawng ( 11000 ) mi hpe masing jahkrat hkai hpang da sai rai nga ai.Matut nna Masala hpun ( 1000 ) mi hpe  mung hkai jat mat wa na rai nga ai.

Ndai lamu ga sun wang gaw ( Eka ) 80 daram dam ai rai nna,Wa Saradaw Francis Daw Tang a matsun hte hpun hkai masing hpe galaw hpang taw sai rai nna ya  ten dai lamu ga sun wang hta  Aung Myin Thar mare buga masha ni htingaw ( 37 )  hte PLN  hpyen yen camp na  htinggaw ( 20 ) ni hpe 2 ning yi galaw sha na matu nawku hpung ahkang jaw tawn da ai re.

Htawng hpang de  ndai shara hta kaga shaning galu hpun ni,hpun kaja ni  hte namsi namsaw hpun ni law law hkai jat mat wa na masing nga ai lam, ban sa shara ginra nta ni,nawku hpung hte seng ai lam ni hpe mung gawgap mat wa na masing nga ai lam  Myitkyina Saradaw Ginwang rung a amu madu Wa Jau Dr.Joseph Gawlu Yung Wa tsun dan ai.

Wa Jau Joseph Gawlu Yung Wa tsun mat wa ai hta 

Anhte a mungkan ga gaw hpun kran nna htum sai,ja htu,nlung htu nna lamu ga ni yawng hten mat wa ai.

Ja htu ai ni ja htu ngut jang hpun hkai mu,lung seng htu ai ni lung seng htu ngut jang hpun bai hkai mu,hpun kran ai ni hpun kran ngut jang hpun bai hkai mu!

Anhte a Wunpawng buga hpe moi na hta grau nna tsit tsawm wa hkra gaw sharawt na matu anhte yawng kaw lit nga ai.

Wunpawng Buga hpe gawgap ga,Nawku Hpung hpe gawgap ga  nga nna RVA hte san htai lamang hta shiga madat ni hpe n gun jaw tsun shadum dat nga ai.

Dai shani na hpun hkai ai lamang hpe Wa Saradaw Francis Daw Tang a matsun  hte  Saradaw ginwang ginjaw  rung na amu madu Wa Jau Joseph Gawlu Yung Wa,Saradaw ginwang rung a kunhting Wa Jau Robert Hpau Yam La Wawm,Saradaw ginwang ginjaw rung  Lamu Ga Yu Reng komiti ni woi awn nna  Wa Jau Mama ni,Tara Hkaw sara/num ni,Tanghpre Jau Ginwang,Alam Bum Jau Ginwang,PLN jau ginwang, Shatapru jau ginwang na nawku hpung masha ni,Myitkyina Karuna rung na magam gun ni marai ( 60 ) jan hte masha marai ( 300 ) jan daram sa du shang lawm lai wa ma ai.

Shiga  tang madun ai - Julia Ja Ing