Yesu A Salum Ningsang Poi Laban Mungga

Hkristu hta tsaw ra ai nu wa hpu nau ni e, ndai laban gaw Yesu A Salum Ningsang Poi Laban rai nga ai.

 

Lai wa sai laban hta Yesu Madu a Hkum hte Sai Poi hpe galaw saga ai. Chyoi Pra Hkum Sakramentu chyeju kumla gaw Karai kasang shinggyim masha ni hpe kaga chyeju kumhpa ni zawn sha, mara a majaw hkraw hkrun mat ai anhte a salum hta Karai Kasang hte ni htep ai ni hpe tsaw ra ai a marang e, lwi yawng nga ai hka shi ni hte bung nga ai.

 

Hka shi ni gaw tsaw ai bum kaw nna nyem ai pa layang de lwi yawng nga ai rai nna, dai gaw anhte hpe simsa myit pyaw lam hpe jaw nga ai. Dai hka shi ni a hka hku de sagawn lung wa yang grai nan san seng ai hka gaw nlung lapran ni a lapran kaw nna hka hpawk ni lwi pru nga ai hpe mu lu na ga ai.

 

Dai hte maren sha, Kanu Nawku Hpung gaw, daini, Karai Kasang a tsaw ra ai hka shi gaw Yesu A Salum Ningsang hka hpawk kaw na rai nga ai hpe anhte ni sagawn du lu na matu anhte hpe saw shaga nga ai.

 

Anhte galaw nga ai poi a lachyum hpe chye na hkau chyap na gaw ahkyak dik la nga ai. (1) Yesu Madu a Salum Ningsang hpe kaga hkum chyan ni hpe zawn manu shadan daw jau ga ai raitim, mu mada ai hkum hkrang hte seng ai hpe hkung ga shakawn ai poi gaw n rai nga ai. (2) Ndai laban anhte poi galaw ai yaw shada lam gaw, Salum hpe hkrang shapraw ai Yesu Madu a “matsan dum lama ai tsaw ra myit” hpe hkung ga shagrau ai poi rai nga ai.

 

Dai majaw Yesu Madu a Salum Ningsang poi hpe “kaba la ai matsan dum tsaw ra lanu lahku ai poi” ngu tsawm htap ai hku shamying shaga mai nga ai. Anhte buga ga hte chye na ai hku tsun ga nga yang “myit masin salum” ngu tsun chye ga ai.

Myit pyaw ai, Myit ru ai; myit dik ai, myit n dik ai; myit malang ai, myit hten ai; myit yawn ai, myit machyi ai, myit ra ai, myit ndawng ai, myit su ai, myit n su ai, ngu “myit” ngu ai ga si hpe jai lang ga ai.

 

Ndai ga si gaw anhte mu lu ai hkum hkrang hta lawm ai “masin salum” hkam sha lam ni re ngu anhte hkam la ga ai. Ga shadawn tsun ga nga yang, hkrit kajawng nna myit a hkam sha lam gaw grai lawan wa ai majaw anhte ni a masin salum htuk htak (gumhtawn) madang gaw grai lawan wa ai. Masin salum htuk htak madang yawm ai masha gaw asak sum na hpe sadi jaw ai; Salum gumhtawn lam hkring mat jang si mat sai rai nga ai.

 

Ndai laban na Chyum mungga gaw Karai kasang a tsaw ra matsan dum lama ai hpe tsun dan nga ai.

 

Israel myu sha ni a ntsa Karai Kasang a matsan dum lama ai myit

Chyum mungga daw langai gaw Myihtoi Hosea laika hta na shaw da ai rai nna, Israel myu sha ni a ntsa Yaweh Karai Kasang a matsan dum lama ai myit hpe madun da ai. Akyang lailen hten run taw nga ai ma langai hpe Karai kasang hkap la chye na ya ai lam hpe madun da ai. Israel myu sha ni a matu mung Yaweh Karai Kasang gaw kanu langai zawn rai nna ma hpe pawn da nna lam hkawm chye hkra sharin ya ai zawn, lakawn lanawn let shat bawt ya ai zawn, hkrang shala da ai.

 

Israel myu sha ni maga hku nna myit n su ai ma langai zawn chyeju dum chyeju htang n chye ai raitim, Shi a matsan dum lama ai hpe Yaweh Karai Kasang la kau na n re ai lam Myihtoi hkaw da ai rai nga ai.

 

Israel myu sha ni gaw Adma hte Zeboim mare ni zawn mung, Sodom hte Gomora zawn mung kau da hkrum na, shing nrai, jahten kau hkrum na madang nga ai rai nga ai (Nhp.Nhp 10:19-28). Raitim, Yaweh Karai Kasang gaw Israel myu sha ni hpe matsan dum lama ai majaw n jahten lai wa ai. “Nye a masin kahtep ai majaw ngai nanhte hpe ari jaw na n rai; Ngai gaw Israel hpe bai jahten kau na n rai. Hpa majaw nga yang, ngai gaw masha n rai; Karai kasang rai nga nngai,” (Hos 11:9). Tsun mayu ai gaw, shinggyim tsaw ra ai lam gaw shadawn shadang nga ai, masat jarit nga ai. Shinggyim masha a masin salum gaw kaji la ai rai nna, htum ngu n nga ai Karai Kasang a matsan dum lama ai hpe hpring tup chye na lu na n rai nga ai.

 

Shinggyim masha ni a matu Karai Kasang tawn da ai matsan dum lama ai lam Yesu Hkristu hta jan shingkang zawn htoi tu nga ai hpe mu lu nga ai.

 

Ga Shaka Dingsa Chyum Laika gaw Karai Kasang shinggyim masha ni a ntsa tawn da ai tsawra matsan dum lama ai lam hte shinggyim masha ni dai tsawra matsan dum lama ai hpe n law n la chyeju htang ai lam ni hpe ka da ai rai nga ai. Raitim, Yaweh Karai Kasang gaw Israel myu sha ni hpe hkam sharang ai hte matsan dum ai lam Yesu Madu hkum nan yu sa wa nna madun dan ai lam n nga yang shinggyim masha ni Karai Kasang a tsawra matsan dum lama ai hpe chye na hkau chyap na n rai nga ai.

 

Yesu Madu mungkan ga hpe tsun ai Kabu Gara Shiga gaw, (1) Karai Kasang nanhte hpe tsaw ra ai, (2) Karai Kasang nanhte hpe galoi mung aten shagu tsaw ra ai, (3) Karai Kasang nanhte hpe shadawn shadang n nga ai sha tsaw ra ai; masat jarit, masat shadang n nga ai sha tsaw ra ai, ngu ai rai nga ai.

 

Kawa Karai Kasang shinggyim masha yawng hpe hkye la na matu Shi a Kasha shingtai hpe shangun dat ai gaw hpang jahtum du hkra tsaw ra ai majaw tawn da ai tsawra matsan dum lama ai lam re ai hpe Yesu Madu Nikodimus hpe tsun dan lai wa ai.

 

“Kaning rai nme law, Karai Kasang a Kasha hpe kam sham ai ni nlang hte gaw, hten bya n hkrum ai sha htani htana asak lu la mu ga nga, Karai Kasang gaw shi a kasha shingtai hpe jau kau ai kaw du hkra mungkan ga hpe grai tsaw ra wu ai. Karai kasang gaw shi a Kasha hpe mungkan ga de shangun dat ai gaw, mungkan masha ni hpe tara dara na matu n rai, shi a marang e hkye hkrang la ai hkrum na she, shangun dat wu ai,” (Yh 3:16-17).

 

Yesu Madu gaw anhte a matu, shi a matsan dum lama ai hpe ngang grin dik sakse rai nga ai wudang ntsa si hkam ai a marang e madun dan lai wa ai. “Jinghku ni a matu tinang a asak hpe nawng kau hkra tsaw ra ai myit hta grau kaba ai tsaw ra myit ngu ai gaw n nga sai,” (Yh 15:13).

 

Shawng na Hkristan ni gaw, Yesu Madu a salum ningsang kaw nna lwi hkrat wa ai hka hte asai hpe Kashin Kamun chyeju kumla hte Chyoi Pra Hkum chyeju kumla re ngu hkam la kam sham ma ai. Kaja wa mung, wudang ntsa si hkam nna anhte a matu kashin kamun hkam la ai hte hkum shan sai hkam la ai Chyoi Pra Hkum chyeju kumla hta Wenyi e jaw bang ya ai chyeju kumhpa mung rawng nga ai.

 

Anhte a matu jaw da ai Yesu Madu a tsaw ra matsan dum lama ai gaw shinggyim atai hte Karai atai kaw nna rai nga ai.

 

Dai gaw Yesu Madu a ahkyak dik ai matsan dum lama ai lam hpe madun ai rai nga ai. Yesu Madu gaw Karai atai hte anhte hpe matsan dum lama myit kaba hte tsaw ra ai. Shi a matsan dum lama ai gaw anhte shinggyim masha ni zawn shinggyim masha a tsaw ra ai lam mung rai nga ai.

 

Chyum laika hpe hti sumru ai shaloi, Yesu Madu anhte shinggyim masha ni hkam sha ai zawn sha hkam sha ai hpe myit kahpra na zawn mu lu ga ai.

 

Madu hpe masha wunawng kaba tam ai hpe chye ai shaloi shanhte ni Yesu a ntsa kaja wa sha matsan dum myit rawng ma ai. Yesu gaw, dai ni hpe sagu rem wa n nga ai sagu ni hte shingdaw da ai, (Mk 6:34).

 

Madu gaw manggang kap ai wa hpe matsan dum ai (Mk 1:41). Kasha shingtai hpe jasum kau ai, Na-in mare kaw na, gaida num hpe matsan dum ai, (Lk 7:13).

 

Lazaru si mat ai shaloi Madu Yesu yawn nna hkrap lai wa ai, (Yh 1:41). Hpang shani Yerusalem hten run na hpe mu nna hkrap ai, (Lk 19:41).

 

Gesemani sun hta akyu hpyi let sai she pru hkra hkrap ai, (Lk 22:44).

 

Yesu Madu anhte zawn sha kabu pyaw lam hpe mung hkam sha lai wa ai. Dingman dinghpring ai wa gaw Kawa Karai Kasang a Kabu Gara Shiga hpe shawng na la ai majaw kabu pyaw lai ai, ngu Lk 10: 21 hta tsun da ai.

 

Anhte chye da ra ai lam langai gaw Yesu Madu kabu pyaw hpa hkrum ai ten hta kaja wa sha kabu pyaw ai; Yawn hpa hkrum ai shaloi kaja wa sha yawn hkyen ai. Sin dawng kahtep ai ten hta kaja wa sha masin pawt ai. Shi a myit hpe n dang hting hkang na daram re ai aten hta anhte zawn sha myit n pyaw ai rai nga ai.

 

Raitim hkum tsup dik ai shinggyim hkum madu ai wa rai nga ai. Si hkam ai hpang Kasa ni kaw sa dan ai shaloi, lagaw lata hpri dip hkang ni hte hpyen la e nri hte galun waw da ai garep kaw nna nma hkang hpe madun dan ai. Bai hkrung rawt ai hpang lusha sha n ra sai raitim, kasa ni hte rau sa nga ai shaloi shinggyim hkum naw rai nga ai aten, sha ai zawn sha lusha hpe sha dan ai, (Lk 24:39-42).

 

Yesu Madu a matsan dum lama ai gaw shinggyim masha langai hku sha n rai nga ai; Karai atai hku mung rai nga ai. Raitim masha atai hku mung, Karai atai hku mung, matsan dum lama ai lam gaw langai sha rai nga ai; kaga ga n rai nga ai. Sumsing lamu de lung wa ai shaloi masha hkum hte nawng lung wa ai rai nga ai. Raitim, hpung shingkan hte htoi tu ai hkum hkrang rai nna, shinggyim masha zawn n-gun yawm ai, kaw si ai, matsan jam jau ai hte si na gaw n rai sai.

 

Sumsing lamu ntsa hta karai atai masha atai hku Kawa Karai Kasang a hkra maga e hkaw dung nga ai. Anhte ni bai hkrung rawt ai shani mung Yesu Madu zawn hkum hkrang hte wenyi nawng sumsing lamu de du lu na rai ga ai. Yesu madu a salum ningsang gaw anhte shinggyim masha a salum zawn naw hkrung taw nga ai.

 

San Pawlu mung salum ningsang poi a yaw shada lam anhte hpe tsun dan nga ai.

 

Chyum mungga daw lahkawng, San Pawlu Ehpesu hpung masha ni hpang de shagun dat ai laika hta, Hkristu a matsan dum lama ai hpe chye na lu na wa mu ga Ehpesu hpung masha ni a matu akyu hpyi ya lai wa ai. Hkristu Madu a matsan dum lama ai mungsung lam hpe shadawn na matu saw shaga ai. Shadawn n lu ai, shadawn n mai ai re hpe chye tim, lani hte lani wenyi a woi awn myi jahpaw ya ai a marang e sung sung myit sumru la lu na matu ra sharawng ai majaw saw shaga ai rai nga ai.

 

Hkristan ni yawng hpe tsawra myit hta ru jung gring nga shangun mayu ai majaw rai nga ai (Ehp 3:17). Tsun mayu ai gaw Hkristan ni a tsawra myit gaw Yesu Madu a tsawra myit hta n-gun la na matu rai nga ai. Ndai gaw anhte Kahtawlik Nawku Hpung galaw nga ai ndai laban na poi a yaw shada lam rai nga ai.

 

Akyu hpyi saga

Wa Karai Kasang e, Yesu Madu a Salum Ningsang hta na lwi hkrat wa ai tsawra matsan dum lama ai hpe anhte hkam la nna, shinggyim masha ni yawng hpe garan kachyan sa wa lu na chyeju anhte hpe jaw ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Yesu A Salum Ningsang Poi Laban rai nga ai.

 

HTI ANG AI JA CHYUM MUNGGA NI GAW

Chyum Mungga Daw (1) – Hos 11:1, 3-4, 8-9

Chyum Mungga Daw (2) – Ehp 3:8-12, 14-19

Kabu Gara Shiga – Yh 19: 31-37

 

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.