Chyoi Pra Ai Trinita Laban Mungga

Hkristu hta tsaw ra ai nu wa hpu nau ni e, ndai laban gaw Chyoi Pra ai Trinita Poi Laban rai nga ai.

Anhte ni wudang masat galaw shagu Kawa, Kasha, Chyoi Pra ai Wenyi a Mying ningsang hta, Amen ngu tsun ga ai.

Kashin kamun hkam ya ai Jau gaw kashim kamun hkam ai wa a kahtan hta shaman da ai kashin kamun hka jaw bun let, “Kawa, Kasha, Chyoi Pra ai Wenyi a mying ningsang hta ngai nang hpe hka hte kashin kau ya ai,” ngu tsun ai.

Jau gaw mara sakramentu hkam ya ai shaloi, “Kawa, Kasha, Chyoi Pra ai Wenyi a mying ningsang hta na a mara hpe dat ya nngai,” ngu tsun ai.

Kawa, Kasha, Chyoi Pra ai Wenyi Karai Kasang gaw Atai masum Karai langai Karai Kasang rai nga ai.

Ndai laban gaw Atai masum hte hpe shakawn shagrau ga ai. Kawa, Kasha, Chyoi Pra ai Wenyi ni gaw atai kaga ga re ai ngu tsun ga tim, kaga san san rai nna garan ginhka da ai gaw n re ai ngu Karai hpaji ninghkring ni sang lang da ai hte maren Kahtawlik Hpung a Dogma makam kaba nan rai nga ai. Langai hte langai atai kaga ga raiti mung, bung pre ai hpaji byan-ya, maren mara re ai mai kaja lam hte hpung dagu ni nga nga ai. Tsun mayu ai gaw shanhte ni Karai masum n rai ma ai, Langai sha re ai Karai Kasang rai nga ai.

Ndai gaw shinggyim masha ni hte lamu kasa ni hkrak tup n chye na lu ai mungsung ga sung re ngu Nawku Hpung hkap la da ai.

Ndai mungsung ga sung makam hpe chye na na matu tara laika sharin ai ni ndai hku sang lang dan chye ma ai. Moi, Africa dingdung maga hta hpaji grai ningtawng ai saradaw langai nga ai. Shi a mying gaw Augustine ngu mying ai. Shi gaw Kawa, Kasha, Chyoi Pra ai Wenyi atai masum Karai langai a lam sumru let aten ni grai shama kau ai. Lani mi, dai saradaw gaw panglai hka hkingau hta atai masum Karai langai a lam sumru let lam hkawm nga yang, ma kasha langai mi zaibru jang hta ginsup nga ai hpe mu ai. Dai ma gaw zaibru jang hta nhkun kasha langai htu nna panglai hka hpe dai nhkun hta htawk bang nga ai. Saradaw Augustine gaw, “ma e, nang hpa galaw nga ai rai,” ngu san ai shaloi, dai ma gaw, “panglai hkyet hkra hka hpe ndai nhkun kaw htawk bang na ngu le,” ngu bai htan ai. “Ma e, dai hku galaw ai gaw n mai byin ai bungli re n chye i,” ngu Saradaw Augustine tsun ai shaloi, “Saradaw sumru ai mung dai hte maren sha re. Karai Kasang gaw Panglai hte bung ai. Saradaw a bawnu gaw ngai htu taw nga ai nhkun hte maren sha re. Saradaw sumru ai lam hpe asum jaw kau u. Karai langai atai masum mungsung hpe galoi mung chye na na n re” ngu dai ma bai htan ya ai.

Chyoi Pra ai Trinita Karai Kasang gaw mungkan ting hpe hkye hkrang la ai rai nna, anhte marai hkum shagu hpe matut manoi rai hkye hkrang la nga ai.

Karai Kasang gaw kadai rai? Atai masum gaw Karai langai sha re ai ngu tsun ga ai hta dai atai masum gara hku shai hkak ai mahtai gaw hkrak n jaw lu nga ai. Anhte chye na lu ai mahtai gaw atai masum rai nga ai Kawa, Kasha, Chyoi Pra ai Wenyi gaw anhte a matu galaw ya ai lam ni hpe sumru la ai lam rai nga ai. Raitim, hkrak tup mahtai hpe gaw anhte n lu htai ga ai. Hkrak tup jaw ai mahtai hpe gaw anhte hkye hkrang la hkrum nna sumsing mungdan du ai shaloi she chye lu na rai ga ai.

Raitim, anhte a prat tup hta Karai Kasang a mau hpa tsawra matsan dum lama ai hpe gaw shani shagu shadan shadawng ra ga ai. Laban shani gaw Karai Kasang tsawra matsan dum lama ai lam hpe shadan shadawng na matu kaja dik htum aten rai nga ai. Shaning shagu na nawku daw jau lamang hte maren nawku daw jau ga ai rai yang, tsaw ai bum de du magang, tsawm htap ai makau gyupyin shingra maka hpe dan dawng ai hku mu magang hkam sha na rai nga ai.

Lai sai laban na Chyoi Pra ai Wenyi yu hkrat wa ai poi n’htoi gaw nawku daw jau shaning a tsaw dik ai bum ntsa du nga ai aten ngu tsun mai nga ai. Nawku Hpung gaw tsaw dik ai bum de du ai shaloi bai nhtang yu na matu anhte hpe saw shaga nga ai.

Anhte hpa yu ra na rai? (1) Matsan dum tsawra myit kaba hte Karai Kasang, Shi a kasha shingtai Yesu Hkristu hpe shinggyim masha ni a hkye la Madu hku hkap la na matu du sa ai hpe myit mada a la nga ai ladaw (Du Sa Ladaw) rai nga ai, (2) Dai hpang, mara hta lai nna anhte shinggyim masha hkum hkrang sa la ai Hkristmas ladaw rai nga ai, (3) Pranwan Ladaw gaw Palestine hta Yesu Madu Kabu Gara Shiga hkaw tsun nna machyi makaw hkrum ai ni, hte shi a chyeju hpe ra kadawn nga ai ni hpe Kawa Karai Kasang hpang de woi sa ya ai lam ni rai nga ai, (4) Lusha gam ladaw hte bai hkrung rawt ai ladaw hta Yesu Madu agung alau hkrum ai lam, nni nkri hkam ai lam, bai hkrung rawt ai lam, Kawa Karai Kasang hang de bai lung wa ai raitim anhte hte matut nga ai lam ga sadi jaw da ai hpe shadum ya ai. (5) Hpang jahtum, Chyoi Pra ai Wenyi yu hkat wa ai poi hta Yesu Madu a ga sadi teng sha byin wa ai rai nna Shi a asak ningnan anhte hta gam garan jaw da ya ai.

Atai masum Karai langai rai nga ai Kawa, Kasha, Chyoi Pra ai Wenyi gaw moi shawng na zawn sha, ya ndai aten ladaw ni hta mung, mungkan ting hpe hkye la na matu hpaji byen-ya, hpung dagu hte matsan dum lama ai lam ni anhte hta shadan shadawng let shi a magam hpe galaw taw nga ai.

Yesu Madu Tsun Dan Ai Atai Masum Karai A Lam

Hkristan ni hta lai nna makam hpung law law matsan dum lama myit kaba ai Karai langai nga ai lam hpe kam sham ma ai. Dai Karai Kasang gaw shinggyim masha ni myit malai lu jang mara dat hkyamsa jaw ya ai rai nna, mungkan ga ntsa hta san seng chyoi pra ai hku nga pra ai rai yang htani htana asak kumhpa hpe jaw ya ai ngu kam sham ma ai. Raitim, Karai Kasang hta Kawa, Kasha, hte Chyoi Pra ai Wenyi atai masum rawng nga ai hpe kadai mung n tsun dan ma ai.

Yesu Madu Gaw Kawa Karai Kasang A Lam Anhte Hpe Tsun Dan Ai.

Kadai mung Yesu Madu na zawn Kawa Karai Kasang a lam n tsun dan lu ai. Mt 11:27 hta, Yesu Madu tsun ai “Nye Wa gaw arai yawng mayawng ngai hpe ap ya ni ai; Wa hta kaga, dai Kasha hpe kadai mung n chye lu ai: dai Kasha hte, dai Kasha shadan dan mayu ai ni hta kaga kadai n chye lu ai.”

Yesu Kawa Karai Kasang a lam anhte hpe lam amyu myu hku lang law law tsun dan lai wa ai.

Yh 20:17 hta, “Nye a Wa ngu ai nanhte a Kawa, nye a Karai Kasang ngu ai nanhte a Karai Kasang hpang de ngai lung wa sana da, ngu nna shanhte hpe wa tsun dan su, ngu nna Maria Madalena hpe tsun dat wu ai,” nga nna ka da ai.

Bai, Mt 6:9 hta mung, “Dai rai nna nanhte ning ngu akyu hpyi mu: Sumsing lamu na anhte a Wa e..., ngu Madu Yesu Shi hkum nan sharin ya ai akyu hpyi ga hta lawm nga ai.

Anhte mung Kawa Karai Kasang a matsan dum lama ai hpe hkam la lu ai ni rai ga ai. Yh 16:27 hta, Yesu gaw “Hpa majaw nga yang Wa shi nan nanhte hpe tsaw ra nga ai,” ngu tsun da ai. Kawa Karai Kasang anhte hpe tsaw ra ai majaw Shi a Kasha shingtai hpe anhte hpang de shangun dat ai. “Karai Kasang gaw shi a Kasha hpe jaw kau ai kaw du hkra mungkan ga hpe grai tsaw ra wu ai,” (Yh 3:16).

Yesu Madu Shi hte Shi a matsan dum lama ai lam hpe shinggyim masha yawng hpe chye shangun ai.

Anhte ni zawn sha shinggyim hkum sa la ai, Nazareth mare hta shaning sum shi (30) nga lai wa ai, masum (3) ning laman sasana magam galaw ai, nni nkri hkam si hkam ai hte bai hkrung rawt ai lam yawng gaw shinggyim masha ni hpe n htum n wai tsaw ra ai lam shadan shadawng ai sakse ni rai nga ai. Dai majaw San Yawhan tsun ai gaw “Yesu Madu anhte hpe jahtum du hkra tsaw ra ai. Tsun mayu ai gaw masat jarit hte shadawn shadang n tawn da ai tsaw ra ai Karai Kasang a tsawra myit rai nga ai.

Yesu Madu gaw anhte hpe Chyoi Pra ai Wenyi a lam tsun dan ai.

Anhte hpe tsun dan ai sha n ga ai, anhte hpe jaw ya ai. Yesu Madu hte Kawa Karai Kasang kaw na lu la ai Wenyi gaw anhte a matu kumhpa rai nga ai. Yesu Madu anhte hpe Wenyi jaw bang ya ai shaloi shi a asak hpe mung jaw bang ya ai.

Anhte Hkristan ni gaw Yesu Madu hte Kawa Karai Kasang a asak hte sak hkrung nga ga ai. Kanu a hkritung kaw gun da ai ma chyangai a asak gaw kanu a asak rai nga ai. Anhte gaw dai hta grau ai Karai Kasang a asak hte sak hkrung nga ga ai. Anhte hta Wenyi shanu nga ai a marang e, Karai Kasang a kashu kasha ni anhte tai nga ga ai.

Chyum mungga daw lahkawng, San Pawlu Roma hpung masha ni hte anhte hpe tsun ai hta Wenyi hpe madu lu ai anhte ni yawng gaw Karai Kasang hpe “Aba” Wa e, ngu shaga na matu rai nga ai (Rom 8:5). Kaja wa nga yang, “aba” Wa e, ngu ai ga gaw Yesu Madu a ga rai nna, kawa hpe shaga ai “wa e” ngu ai lachyum hkrak langai sha gaw n rai nga ai. English ga hku “pa pa” “Awa” ngu ai tsun mayu ai rai nga ai. Ma ni shanhte a kawa majing hpe shaga ai shaloi jai lang ai ga si rai nga ai. Yesu Madu Kawa Karai Kasang hpe shaga ai shaloi dai ga si hpe jai lang ai rai nga ai (Mt 14:36).

Moi shawng na Hkristan ni dai ga si hpe grai ra sharawng ai majaw Yesu Madu a madung ga si hpe sha bai jai lang ai rai nga ai.

Ya tsun dan sai lam ni hpe sumru yu yang atai masum Karai langai anhte hpe tsaw ra ai hpe kam shut na lam naw nga a ni? Nawku Hpung anhte hpe Kawa, Kasha, Chyoi Pra ai Wenyi kaw hkungga shakawn nga u ga law, ngu akyu hpyi shakawn ai n rai ni?

Atai masum Karai langai anhte hpe tsaw ra ai majaw anhte gara hku bai htang tsaw ra nga ga ai rai?

Chyum mungga daw langai hta Karai Kasang gaw Mawshe a marang e, Israel myu sha ni hpe Egutu mung hta mayam prat hku nga ra ai kaw na Shi ga sadi tawn da ai mungdan de gara hku woi wa ai lam shanhte hpe myit dum shangun nna Israel myu sha ni Yaweh Karai Kasang hpe sadi dung na lam hkang da nu ai.

Daini, atai masum Karai langai poi nhtoi hta Nawku Hpung gaw anhte hpe dai hte maren galaw na matu saw shaga nga ai. Mt 28:19-20 hta, Yesu Madu hkrum nan tsun da ai: “Nanhte pru sa nna, shara shagu na masha amyu baw shagu ni hpe nye a sape ni shatai let, Kawa a, Kasha a, Chyoi Pra ai Wenyi a amying n’sang hta shanhte hpe kashin kamun jaw nhtawm, ngai nanhte hpe hkang da mada yawng hte hpe hkan shadik lu mu ga, shanhte hpe sharin shaga ya mu: dai hta kaga, lamu ga aprat htum hkra ngai nanhte hte rau dinggrin anga nga na nngai law, ngu matsun dat mu ai.”

Ndai saw shaga ai lam gaw Hkristan masha shagu a matu hkang da tara rai nga ai. Hkristu hpe garai n kam sham shi ai ni, kam sham sai ni, kun dinghku masha ni, hku hkau manau manang ni, hte shinggyim masha ni yawng hpe Shi hte nihtep shangun na matu saw shaga nga ai. Hkristu Madu a hkang da tara hte maren anhte ni teng man Hkristan prat hta sak hkrung nga ra ga ai. Anhte ni Karai Kasang a tsawra matsan dum lama ai lam kaga masha ni hta garan gachyan ai lam n nga yang gaw hten run mat na rai ga ai.

Chyum mungga daw lahkawng hta San Pawlu tsun da ai hte maren atai masum Karai langai gaw anhte a matu hpang jahtum mau hpa lam hpe mahkawng da ya ai. Sumsing mungdan de du wa ai shaloi, atai masum Karai langai a asak hte ngwi pyaw simsa lam hpe hkam la lu ai made hkam la na rai ga ai. Kasha ni gaw kanu kawa ni a sutgan hpe hkam la lu ai hte maren, Karai Kasang a kasha ni mung Shi a sutgan hpe hkam la lu na rai nga ai ngu San Pawlu tsun shadum da ai.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Chyoi Pra ai Trinita Poi Laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Tara 4:32-34, 39-40

Chyum Mungga Daw (2) – Rom 8:14-17

Kabu Gara Shiga – Mt 28:16-20

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.