Matsan Jam Jau Hkrum Nga Ai Myanmar Mung Shawa Masha Ni Hpe Japan Asuya Kawn Garum Ai Lam

Matsan Jam Jau Hkrum Nga Ai Myanmar Mung Shawa Masha Ni Hpe Japan Asuya Dollor Wan Mali (4) Garum Ya

  Myanmar Hpyendap up hkang ai npu nga ra ai laingthayar mare hte malu masha yak hkak ai mare kaba kaw nga ai mung shawa masha ni hpe garum ya matu “World Food Program” (WFP) mahkrun lam hku American Dollor wan mali (4) garum dat sai lam chye lu ai.

  Ndai alu gumhpraw hpe Yangon mare kata na mung shawa masha seng kru (600,000) a matu garum sa wa na rai nna, malu masha (ration) hpe ra kadawn nga ai kun dinghku nta masha ni a lata kaw du hkra sa du garan jaw na re lam chye lu ai.

  Laingthayar mare de gaw May 13 ya shani kaw nna garum hpang nga sai lam WFP tsun ai. “Ndai garum malu masha (ration) gaw kaja wa ra kadawn ai kun dinghku ni kaw du hkra sa na rai nna, Japan Asuya hte Japan mung shawa masha ni gaw Myanmar mung shawa masha ni hte rau rai tsap rau rai nga na ga ai” ngu Japan-Myanmar mungdan dakkasa Maruyama Ichiro tsun da nga ai.

  Ya hkyak hkyak bying nga ai mung masa mayak mahkak lam hte Covid-19 tsin-yam a majaw Myanmar mung kata hte kaga mungdan du hkawm nga ai Myanmar mung shawa masha wan masum seng mali (wan 3.4) hta n yawm ai masha ni malu masha yak hkak hkrum nga ma ai ngu WFP kawn masam maram da ma ai.

  Ya na zawn Japan kaw nna Myanmar mungdan hta mung masa lam a majaw yak hkak jam jau hkrum nga ai ni hpe matut manoi garum nga ai gaw UN kawn Myanmar mung shawa masha ni hpe garum ai lam hta madi shadaw ding yang re ai la chyum rai nga ai ngu Vatican shiga dap kawn masam maram da ma ai.

  Daining na January shata hta wan 4.7 kalang, wan 7.7 kalang, March shata hta wan 3 kalang garum lai wa sai re lam, ndai garum ningtum ni gaw mungdan kata hpyen man hpaw taw nga ai Chin, Kachin, Shan, hte Rahkine mungdaw ni hpe garum ai re lam chye lu ai.

  Lai wa sai 2005-2017 shaning ni hta garum ningtum law law hpe hkam la lu wa sai rai nna, mung shawa masha ni hta matsan jam jau masha ka-ang hkup hpe madang langai kaw du hkra shatsaw ya lai wa sai rai tim, lai wa sai shata 12 laman hta chyam bra ana Covid-19 tsin-yam a majaw mung rawt jat lam bai hkrat sum ai hta, hpyendap up hkang ai mung masa lam a majaw hkrat sum kaba byin nga ai hpe UN Development Programme (UNDP) kawn shadum shadi jaw da nga ai.

  Myanmar hpyendap kawn mungdan daru magam hpe zingla ai hpang gaw, dai Hpyen Asuya kawn “Official Development Aid” (ODA) hpe hpaw da ai rai tim, hpaw da ai, matsan dum lama myit n rawng ai hpyen hpung a npu kaw na re majaw, dai mahkrun lam hku garum shingtau na hpe gaw Japan Asuya ni koi na ra ai lam, rai ti mung, ODA projects hte seng nna gaw atsawm n sang lang shi ai lam Vatican Shiga Dap kawn masam maram da ma ai.

Source; Vatican News