Covid-19 Ana Tsin-yam Hta India Mungdan Na Kahtawlik Jau 160 Si Mat Sai

Covid-19 ana kap ai majaw India Mungdan kata lai wa sai laban manga (5 weeks) lapran, lani mi hta masha 4,000 daram si htum nga ai madang hta rai nga ai lam chye lu ai.

Kahtawlik Jau ni hta mung dai ana kanu kap bra ai grai sawng ai lam chye lu ai.

Covid-19 ana kap chyam bra ai majaw lai wa sai laban manga (5 weeks) lapran kaw sha Kahtawlik Jau 160 si mat sai rai nna, lani mi hta Jau marai mali (4) si ai madang hta du nga ai. Ndai shadum sadi jaw ai shigaw gaw Capuchin kaw na Jau Suresh Mathew (editor of the Church-run Indian Currents magzine) kaw nna lu la ai re lam Vatican Shiga Dap kaw tsun da nga ai.

Si mat sai jau ni gaw buga Jau (Diocesan Priests) ni hte Sasana Jau (religious priests) ni rai ma ai rai nna, April 10 kaw nna May 17 lapran si mat ai ni a jahpan rai nga ai.

Saradaw masum (3) mung Covid-19 ana kap nna si mat ai hta lawm ai lam chye lu ai. Dai Saradaw ni gaw: Saradaw Kaba Antony Anandarayar (Hkring Sa), Jhabua kaw na Saradaw Basil Bhuriya hte Saradaw Joseph Pastor Neelankavil (hkring sa) ni rai ma ai.

Si mat ai jau 160 hta na Jau 60 a lahta de gaw asak kaba sai Sasana Jau ni rai ma ai lam chye lu ai. Jesuit Jau 24 rai ma ai rai nna law dik htum si mat ai sasana jau hpung jahpan kaw rawng nga ai.

India mungdan hta Saradaw Ginwang 174 nga ai rai nna, dai Saradaw ginwang yawng kaw na si mat ai Jau ni a jahpan hpe n lu la shi ai lam Wa Jau Mathew tsun shana da nga ai.

Ndai zawn India mungdan kata Covid-19 ana majaw si htum wa ai gaw tsi gawk ni n law wa ai, yup ku ni n law wa ai, nsa marawp jak (oxygen) n law ai, tsi lajang ya ai lam atsawm n lu galaw ai majaw re ai ngu India mungdan hkamja dap kawn sang lang da ma ai.

Jau ni hta covid-19 ana kap hpang wa ai kaw nna Jau, Ma Ma ni a matu quarantine centre hpe hpawt hpang da sai lam Saradaw Almeida tsun da ai. Ya ten dai shara hta Jau 14 hte Ma Ma 26 tsi tsi hkam la nga ai rai nna dai ni hpe tsi sara num marai mali aten tup yup lakawn nga ai lam, Tsi Sara Kaba Doctor langai mung shani shagu shanhte hpe sa tsi lajang ya nga ai lam matut tsun dan da nga ai.

Mying n tsun dan shangun ai Jau langai mi tsun ai hte maren nga yang, Jau ni si htum wa ai madung npawt manghkang gaw myit masin hkamja lam hta ningra ai majaw re, ngu tsun dan da ai lam Vatican Website kaw ka da ma ai.

“Jau ni si mat ai gaw Covid-19 ana a majaw gaw raitim, Jau law malawng gaw lockdown aten hta masha ni hte matut mahkai jahkrum ai lam n nga sai sha, tinang tinghkrai nga mat ma ai majaw shingtai hkam sha wa ma ai lam, Jau nkau ni gaw, Asuya kaw nna tara shaja da ai lam ni nga taw ai raitim, Chyoi Pra ai Laban Bat Magam a nawku daw jau magam hpe galaw lai wa ma ai lam, dai ten gaw chyam bra ana, hta, sawng taw sai” ngu dai Jau UCA shiga dap de tsun dan da ai hpe Vatican Shiga Dap kawn shalai ndau da ai.

Translated by Fr. Patrick Gawmaw Hkawng Yae

 (Source: UCA News)

https://www.vaticannews.va/en/church/news/2021-05/india-covid-146-catholic-priests-dead-catholic-church.html