Wa Sarabyin: Shada Hprai Shai Hkat Ai Lam Byin Nga Ai Yerusalem Hta Simsa Lam Shabyin Mu Ga Matu Hpyi shawn Da Ai Shiga

Palestinian masha ni Israel balik dap ni hpe mung shawa n-gun madun ai lam Yerusalem kata hta byin nga ai majaw simsa lam tam na matu Wa Sarabyin Francis, May 9, laban shani “Regina Coeli” akyu hpyi ga tsun ngut ai hpang hpyi shawn da ai.

Party shagu gaw shawa akyu ara mahtai hpe tam na matu dawsa ai lam hpe shawng shazim kau mu ngu hpyi shawn da ai.

“Makam masham hpung law ai hte htung hking lailen myu hkum ai Yerusalem hta dawsa ai lam ni hpe tawn kau da nna shada hkung ga manu shadan hkat let nau na myit majing hte simsa ai hku mahtai tam sa wa na matu marai hkum shagu hpe saw shaga nngai,” ngu Wa Sarabyin hpyi shawn da nga ai.

“Dawsa ai lam gaw dawsa ai lam hpe sha bai shabyin ai; Hpai shai hkat ai lam hpe shazim kau mu,” ngu mung tsun shadum da ai.

Yerusalem na Al-Aqsa wang hta bat manga ya hte kru ya shana ni hta shada gasat gala ai lam byin ai majaw masha marai 139 hkala nba hkrum ma ai lam chye lu ai.

Dai zawn gasat gala byin ai hta rubber pala ni myi kaw hkra nna hkala nba law law byin ai lam mung chye lu ai.

Dai majaw dawsa ai lam ni hpe jahkring kau na matu May 11 ya shani, Patriarch ni hte nawku hpung ningbaw ningla ni ta masat sign htu da ai statement ndau laika hte hpyi shawn da ma ai.

“Al-Aqsa Mosque kaw raitim, Sheikh Jarrah kaw raitim, dawsa ai lam galaw yang gaw simsa ai Yerusalem hpe jahten ai sha tai nga ai. Palestine masha ni a sari sadang hpe hkra machyi shangun ai mung tai nga ai,” ngu ndau laika statement hta tsun da ma ai.

Palestine hkamja dap jahpan hte maren nga yang May 11 ya du hkra rai yang gasat gala byin ai hta masha marai 22 si mat sai lam, dai ni hta ma kaji marai jahku (9) lawm ai lam chye lu ai.

https://www.vaticannews.va/en/pope/news/2021-05/pope-francis-appeal-jerusalem-palestinian-clashes.html

https://www.vaticannews.va/en/church/news/2021-05/jerusalem-violence-patriarchs-heads-churches-appeal-stop-violenc.html