Karai Kasang A Mungga - Paska Ladaw Laban 6, 2021

Hkristu hta tsaw ra ai nu wa hpu nau ni e, ndai laban gaw (6) ngu na Paska ladaw laban rai nga ai.

Paska ladaw htum maw sai. Hpang na laban hta anhte a Madu Hkristu sumsing lamu de lung wa ai poi rai sai. De a hpang laban gaw Chyoi Pra ai Wenyi yu hkrat wa ai poi laban rai nga ai. Chyoi Pra ai Wenyi yu hkrat wa ai poi hte Paska ladaw hpe jahtum ga ai re.

Kanu Nawku Hpung gaw laban bat mi hte bat mi myit dum sumru lam ni hte Yesu Hkristu a bai hkrung rawt ai hpang shinggyim masha ni hpang de gun sa ya ai kumhpa ni hpe hkap la lu hkra sang lang da ya ai.

Bai hkrung rawt ai shani anhte a lapran nga nga ai hpe madun dan ai. Lahkawng ngu na laban hta shi a wenyi hte dai wenyi jaw ya ai laklai simsa lam ni hpe garan ya ai.

Masum ngu na laban hta mara dat hkyamsa lam hpe lu la ai. Mali ngu na laban hta anhte marai hkrum shagu hpe Yesu Madu gaw kaja ai sagu rem wa zawn bau sin makawp maga daw jau ya ai.Manga ngu na laban hta Madu Karai a asak rai nga ai wenyi asak hpe lak lak lai lai jaw ya ai.Ndai laban kru ngu na hta gaw kaga chyeju kumhpa ni a madu madung rai nga ai Yesu Madu a tsawra ai hpe hkap la lu ga ai.

Ndai mungkan hta anhte ni n tsen n hten ai lam ni law law nga chye ai. Raitim, Karai Kasang anhte hpe tsawra ai hpe gaw hkrak sha teng nga ai.Yuda myu sha ni chye na yak ai tsawra ai lamChyum daw langai hta Caleneus mying ai du langai mi a lam anhte hpe tsun dan da ai. Shi gaw Roma up hkang ai npu na mare salang langai madang sha rai nna, rung dung nga ai Syria mare kaba de lit magam hte du wa ai. Shi gaw tara maigan masha raitim shawang tsawra myit nga ai wa rai nga ai.

Madu a lamu kasa langai Caleneus kaw sa dan dan nna Syria ding da maga den 40 daram tsan ai Jahpa mare hta tara hkaw hkawm nga ai San Petru hpang de shiga sa shangun ai. Caleneus mung Lamu Kasa tsun ai hte maren shangun ma lahkawng hte hpyan la langai hpe San Petru hpang de shangun dat ai. Dum nta masha ni gaw teng man tara tam ai ni rai nna hkau chyap chye hkat ai masha ni hpe mahkawng da let San Petru sa wa na hpe ala nga ma ai. Petru hpe mung Madu kaw na du sa ai lamu kasa, shing n rai, Karai Kasang rai na re ngu myit la hkam la ma ai. Dai majaw San Petru du sa wa ai shaloi shi hkum hpe dingyawm dagup da ai. Petru mung shi hpe lawan gang sharawt la nna tsun ai “rawt u ngai mung shinggyim masha ni hta na shinggyim masha langai sha rai nngai,” (Kasa 10:26).

Yuda myu sha ni hta laklai tara langai nga ai. Yuda myu sha n re ai ni a nta de shang na ahkang n jaw da ma ai hte shang manam rau dung rau sha ai hpe pat shing dang da ai. Raitim, Yesu Hkristu du sa ai hpang dai tara ni n ra ai lam shi hkum nan galaw dan ai hte tsun da hkang da ai (Kasa 10:9-16).

San Petru Caleneus dum nta masha ni hte rau hpawng de ai ni hpe sharin shaga nga ten laklai mabyin langai byin pru wa ai. Pentecost poi shani San Petru hte Kasa ni a ntsa Wenyi yu hkrat wa ai zawn shanhte ni a ntsa e mung dai wenyi yu hkrat wa ai.

Yesu Madu du sa ai gaw Yuda masha ni hpe sha n re ai, tara maigan myu sha ni hpe mung hkye la na matu du sa ai re lam San Petru atsawm sha chye na wa ai. Caleneus hte nta masha ni hpe kashin kamun hkam ya ngut ai hpang makam masham lam hpe sharin ya na matu shanhte hte nhtoi kadun mi rau nga lai wa ai.

Karai Kasang gaw shinggyim masha yawng hpe hkye la na masin nga ai hpe Wenyi a marang e Petru asan sha chye na wa ai. Hkristan ni tai wa ai Yuda masha ni a matu Yuda myu sha n re ai ni Hkristu hpe kam sham nna Hkristan tai wa na hpe hkap la ya na matu grai yak ai rai ma ai. San Petru mabyin ni hpe sang lang hkai dan ai shaloi Yerusalem na Hkristan masha ni Karai Kasang a masa hpe chye lu ma ai hte shi a matsan dum tsawra ai hpe shakawn nga ma ai (Ks 14).

Raitim, Yuda Hkristan nkau ni gaw Hkristan tai wa ai tara maigan myu sha ni Mawshe tawn da ya ai tara hpe hkan shatup yang she hkye hkrang la lam lu na re ngu shadut shadang ga tsun ma ai. Kasa ni dai lam hte seng nna Yerusalem kaw zuphpawng saga nna daw dan lai wa ma ai (Ks 15). Yuda masha nkau mi gaw matut shayak ma ai. San Pawlu dai lam a majaw myit ru myit tsang lai wa ai.

Yuda Hkristan ni Karai Kasang a yaw sin ai lam hpe chye na yak shangun ai lam ni gaw hpa ni rai ta? Mahtai gaw asan sha rai nga ai. Shinggyim masha yawng matu Karai Kasang tawn da ai shawang tsawra myit hpe shanhte ni n chye na ma ai. Namukdara hka panlai hta grau ai Karai Kasang a shawang tsawra myit hpe shanhte a kaji kadun la ai myit masa hte shingdaw la ma ai.

Karai Kasang gaw shinggyim masha langai hpra hpe tsawra ai.Caleneus hte nta masha ni Hkristan masha tai wa ai hpe yu yang Karai Kasang a myit masa hpe mu chye lu nga ai. Kadai raitim, Karai Kasang ngai hpe tsawra ra ai daram n tsawra ai ngu n tsun lu ai.

“Shi gaw ndai mungkan ga e nga ai shi a masha ni hpe galoi mung a tsawra nga mu ai rai nna, jahtum n’htoi du hkra shanhte hpe tsawra mu ai,” (Yh 13:1).  Hpang jahtum daw sha poi hta Yesu tsun ai hpe Yawhan ka matsin da ai ga rai nga ai.

Karai Kasang a shawang tsawra myit kaba ai lam hpe shinggyim ga hte shingdaw shadawn ga tsun n lu ai. “Karai Kasang gaw tsawra ai myit rai nga ai,” (1Yh 4:16). Ndai ga hpe anhte ni chyahkring hkring na lu ga ai re. Raitim, de a lachyum sung lai lam hpe kadai mung shadawn n lu ga ai. Dai ga gaw hpang jahtum daw sha poi hta Yesu Madu a lahpyan hta taw nga ai Yawhan langai sha tsun lu ai, (Yh 13:25). Dai majaw mung shi hkum hpe shi Yesu tsawra ai wa ngu tsun la ai (Yh 13:22; 19:26; 20:2; 21:27; 21:20).

Dai ga gaw Yawhan langai sha tsun mai ai ga gaw n rai nga ai. Anhte marai hkum shagu mung tsun mai ai ga rai nga ai. “Ngai gaw Yesu madu hpe galoi mung shadawn shadang n nga kaja wa tsawra ai wa rai nngai,” ngu hkam la ga.

Yesu Madu shi hkum nan tsawra ai myit hte seng ai tara hpe sharin shaga ya ai.Shawng na laban hta Yesu Madu gaw tsabyi ru madun, anhte gaw lakung lakin ni ngu ga shadawn hte na lu saga ai. Shi hte hka mat jang, n matut jang anhte ni hten run mat na re ngu shadum da ai. Dai hte maren anhte ni Yesu Madu hta kahkyin gumding ai lam n nga ai rai yang teng man tsawra myit anhte hta nga na n rai ga ai.

“Wa gaw ngai hpe tsaw ra ai zawn, ngai mung nanhte hpe tsawra made ai; nye wa a tsawra ai hta maju jung nga mu............Ngai nanhte hpe tsawra made ai zawn, nanhte shada da tsawra nga mu, dai gaw nye a hkang da ai ga rai li ai,” (Yh 9:12).

Tsawra ai hpe htap masum hku mu lu ga ai. (1) Kawa Karai Kasang a tsawra myit Kasha Yesu kaw du ai. (2) Yesu a tsawra myit anhte kaw du ai. (3) Anhte shada ni htep ai ni hpe tsawra ai. Lwi nga dingyang rai nga ai mali hka zawn, Kawa Karai Kasang kaw na Yesu; Yesu kaw na anhhte kaw; anhte kaw na anhte shada da de chyam bra nga ai tsawra myit rai nga ai. Dai gaw anhte a Karai Kasang a tsawra ai myit rai nga ai.

“Ngai gaw nye Wa a hkang da ai ga ni hpe madat mara hkan shatup nna, shi a tsawra ai hta maju jung nga nngai zawn, nanhte mung nye a hkang da ai ga ni hpe madat mara hkan shatup myit yang gaw, nye a tsawra ai hta maju jung na myit dai,” (Yawhan 15:10).

Kawa Karai Kasang a sharawng awng ai ai lam gaw shinggyim masha yawng a matu hkye hkrang la lam hpaw ya na matu rai nga ai. Shi sharawng awng ai lam hta hkan sa shatup ai hta asak ap nawng ra ai. Yesu Madu dai hpe hkrak tup hkan shatup lai wa sai.

Yesu Madu tara lam langai hpe sha jaw da ai. “Nanhte shada da tsawra nga mu, ngu nna ndai ga nanhte hpe ngai hkang da made ai,” (Yh 15:17). Yesu Madu hkang da ai shada da tsawra ai hpe shamawn shakyang akyang shatai la ra ga ai.

“Nanhte hpe ngai hkang da ai ga hkan shatup myit yang gaw nanhte nye a jinghku ni rai nga myit dai. Ya kaw nna ngai nanhte hpe mayam n ngu na ni ai; hpa majaw nga yang, mayam gaw madu galaw nga ai amu hpe n chye wu ai; nanhte hpe jinghku she ngai ngu na made ai, hpa majaw nga yang, nye Wa kaw na ngai na la ai hte yawng, ngai nanhte hpe tsun dan ma sade ai. Nanhte ngai hpe lata la myit dai n rai, nanhte pru sa nna asi law law si na hte dai asi grin nga u ga ngu nna, ngai mahtang she nahte hpe lata la nna san da made ai,” (Yh 15:14-16).

Yesu Madu tsun ai, “nanhte gaw nye a manang ni rai myit dai” ngu ai ga hpe na lu ai anhte ni myit dik myit pyaw lam lu la ga ai. Teng ai, anhte gaw Yesu a manang hte kahpu kanau ni rai ga ai. Shi a dinghku masha ni rai ga ai.

Raitim, anhte ni Trinity Karai Kasang hpe ga sadi run nna tsawra ai hta ningra nga ga ai. Dai majaw Yesu Madu anhte hpe n-gun jaw ga tsun ai, “tsawra ai myit gaw galoi mung apu asi pu si ya lu ai.” Kalang marang masha ni hpe akyu ara galaw yang, mai kaja lam galaw ya yang, akyu n pru ai, n kaja ai ngu myit la hkam la chye ma ai. Chyeju n dum chye ma ai sha n ga, ninghkap chye ma ai.

“Nye a kabu gara ai myit nanhte hta rawng nga na hte, nanhte a kabu gara ai gaw hpring tup wa na matu ga ndai ngai nanhte hpe tsun da ngut chyalu rai sai” (Yh 15:11). Tsawra ai myit gaw myit ngwi myit pyaw lam hpe jaw ya ai. Hkristan ni a tsawra ai myit gaw Hkristu a kabu gara ai hpe dang di lu ai made garan kachyan ai lam rai nga ai.

Karai Kasang a dinghku hta shang lawm lu ga ai majaw kabu pyaw ga ai. Karai Kasang anhte a makau nga nga ai majaw hte anhte hkum nan shi hpe madu lu ga ai majaw kabu pyaw ga ai. Karai Kasang madu lu ai lam mahkra hpe anhte hpyi ai hte maren lu la na rai ga ai. “Nye a mying hte nanhte Wa kaw hpyi mahpyi nanhte hpe jaw na marin dai,” (Yh 15:16).

Karai Kasang gaw shinggyim masha ni hpe sha tsawra ai n re; hpan da hkrum nga yawng nga pra hpe tsawra ai. Ndai ningmu hpe mung anhte ni n mai malap ga ai. Ningpawt Ninghpang laika hta Hpan Madu Karai Kasang nga yawng nga pra hpe hpan ai shaloi yawng gaw kaja ai hkrai rai nna dai yawng a matu myit sharawng awng nga wu ai. Tsun mayu ai gaw Karai Kasang shi hpan da mada yawng hpe tsaw ra ai rai nga ai.

Karai Kasang hpan da nga yawng nga pra hpe tsawra ai rai nna, anhte hpe mung tsawra na matu hte yu reng up hkang sung lang na matu hkang da ai hpe myit dum let shi jaw da ai dai chyeju kumhpa ni a matu chyeju dum let Karai Kasang hpe shakawn shagrau sha-a nga ga law.

Akyu Hpyi Saga

Wa Karai Kasang e, Nang Madu a tsawra ai namchyim hpe hkam sha let hpu nau ni hpe mung dai mu la ai namchyim hpe garan kachyan sa wa lu na chyeju anhte hpe jaw ya rit. Hpan da hkrum nga yawng nga pra hpe mung nang madu myit ra ai hte hkang da ai hte maren tsawra makawp maga sung lang sa wa lu ai myit nyan hpaji hte atsam marai anhte hta jaw bang da ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw (6) ngu na Paska ladaw laban rai nga ai.

Hti ang ai Ja Chyum Mungga ni gaw

Chyum Mungga Daw (1) Kasa 10:25-26:34-35, 44-48

Chyum Mungga Daw (2) 1Yh 4:7-10

Kabu Gara Shiga Yh 15:9-17

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.