Nam San Yang Jau Ginwang Hpe  Yu Na Matu Wa Jau Shan Lum Hpe  Lit Shatsam

Hpyen yen ni bai wa nga ai shara, Myitkyina- Manmaw Lam, Nam San Yang Jau Ginwang  hpe matut yu na matu JPC Coordinator rai nga ai Wa Jau Vincent Zinwa Shan Lum  hpe lit shatsam da sai lam chye lu ai.

Wa Jau Shan Lum hpe tara shang Ginwang Up Jau magam lit  ap ya ai lamang hpe  May shata 2, 2021 ya Laban shani Nam San Yang St.Paul Nawku Jawng hta galaw lai wa ai.

Saradaw Kaba Cardinal Charles Bo,  Mitkyina Sasana a Vega General Dr.Peter Hka Awng Tu, Chancellor Fr.Paul Wanghte Lum Dau ni a matsun hte maren  Wa Jau Shan Lum hpe Nam San Yang Ginwang Up Jau langai hku lit la yu nna shi galaw taw nga ai Justice and Peace Commission (JPC) Coordinator magam lit hpe mung ndai laman matut gun hpai let magam bungli lahkawng hpe gun hpai na re lam chye lu ai.

Nam San Yang de 2018 ning kaw na Hpyen Yen ni hpe woi wa let Ginwang Up Jau langai hku hpung masha ni hpe woi awn yu nga ai gaw Wa Jau Joseph Gawlu Yung Wa rai nga ai. Majan a majaw 9 ning ram shakram kau da ai Mare Buga de bai wa nga ya ten du hkra  sari shadang hte hkrak angwi apyaw nga lu ai gaw Karai Kasang a chyeju san san re lam Wa Jau kawn sakse hkam tsun lai wa ai. Wa Jau Yung Wa gaw Myitkyina Sasana a Social Pastoral magam lit hpe gun hpai mat wa na re lam chye lu ga ai.

Ya ten Nam San Yang Jau Ginwang hta Sara Gaiwang 5  nga ai rai nna, Tara Hkaw Sara/Saranum 14 hte Hpung masha htinggaw 40 jan nga ai lam,  KBC hte  Lisu Hkalup Hpung, AG, Hkristu Hpung hte Buddha ni yawng rai yang htinggaw 100 jan nga ai lam chye lu ai.

Ndai Ginra ni hta Mung masa hta hkan nna ginra nga masha ni galaw lu galaw sha ai lam hta yak hkak ai lam nga ai raitim Mare grau grau galu kaba wa lu hkra bai gaw sharawt la lu na matu hte mung masha ni shinggyim sari hte hkrak shimlum ai hku nga lu na matu myit mada ra sharawng shakut nga ma ai re.

Thomas