Karai Kasang A Mungga - Paska Ladaw Laban 5, 2021

 Hkristu hta tsaw ra ai nu wa hpu nau ni e, ndai laban gaw (5) ngu na Paska ladaw laban rai nga ai.

Lai wa sai laban hta “bai hkrung rawt ai Hkristu ngu ai gaw kadai rai ta?” ngu ai lam hpe sumru saga ai. Shi gaw “sagu rem wa kaja rai nga ai” ngu ai mahtai hpe chye la saga ai.

Ndai laban hta mung bai hkrung rawt ai Hkristu gaw asak hpun, asak madu re ngu bai tsun dan da ai. Ndai mungkan ga hta nga pra ai ni anhte gaw dai sak hkrung ai lam ngu ai hpe sung sung chye na ra ga ai. Hpa majaw nga yang ndai gaw Hkristan ni a akri madung makam rai nga ai.

Yesu Madu Hte Nikodimu Yan Shada Tsun Shaga Ai Lam

Nikodimu gaw Yuda salang langai rai nna, Yesu Madu a lam chye mayu ai majaw shani aten Yesu kaw sa du nna ga san san hpang ai. “Rabai e, nang gaw Karai Kasang kaw nna du sa ai sara rai nga ndai hpe, anhte chye ga ai: nang dan ai lamik kumla ni gaw, Karai Kasang n lawm yang gaw, kadai mung n galaw lu ai, ngu nna shi hpe tsun wu ai. Yesu gaw, Ngai nang hpe kaja wa teng teng tsun de ga, ntsa de nna n shangai ai masha gaw, Karai Kasang a mungdan mu lu na n rai,” ngu nna shi hpe htan wu ai. Bai Nikodimu gaw, masha gaw prat kaba sayang, kaning rai bai shangai lu na a ta? kanu a hkritung de bai shang nna shangai lu na a ni?, ngu nna bai san wu ai. Yesu gaw, ngai nang hpe kaja wa teng teng tsun de ga, Hka hte Wenyi e n shangai ai masha gaw, Karai Kasang a mungdan hta shang lu na n rai; hkum shan shaprat ai gaw hkum shan rai nga ai. Wenyi shaprat ai gaw wenyi rai nga ai.” (Yh 3:2-6).

Yesu Madu gaw shangai wa ai prat ningnan a lam hpe tsun dan ai. Dai gaw shinggyim masha ni a matu n nga n mai ai rai nga ai. Yesu tsun ai dai asak gaw kaning re asak hpe tsun ai rai ta?

Shawng ningpawt e Karai Kasang gaw shinggyim masha hpe shi a asak hta lawm nga na yaw sin yaw shada da sai rai nga ai. Karai Kasang gaw shingggyim masha ni hpe shi a asak garan jaw na matu tsang hte tsang lajang da sai lam hpe sumru yu ga.

Karai Kasang gaw Adam yan Eve hpe hpan da ai. Shan gaw shinggyim masha yawng ni a shawng kanu kawa yan rai nga ai. Karai Kasang a wenyi hte bung ai hku hpan da hkrum ai rai nga ai. Yawng hpe chye na lu ai atsam shan hpe jaw da ai. Tsawra chye na hte tsawra hkam la chye ai atsam hpe mung jaw da ai. Shang lawt ai lam hpe mung jaw da ai. Lawt lu ai myit daw dan lam mung jaw da ai. Hkrum hkrang myit masin wenyi atsam kaba hpe mung jaw da ai.

Shawng de tsun mat sai lam ni gaw anhte a shawng kanu kawa yan hkam la lu ai rai nna, dai mauhpa chyeju ni a majaw shan lahkawng kabu pyaw lai wa ma ai. Hpan da hkrum nga yawng nga pra hpe yu reng sung lang lu na ahkaw ahkang mung lu la ma ai hte Karai Kasang a shangun ma ni tai lu ma ai majaw mung aten shagu kabu pyaw lu ma ai.

Karai Kasang shinggyim masha ni hpe tsawra ai gaw htum ngu n nga ai. Adam hte Eve yan a aru arat yawng hpe shi a kashu kasha ni shatai la ya ai. Shi a Karai asak hpe garan kachyan na matu nan rai nga ai. Dai majaw shi a Karai asak wenyi Adam yan Eve hpe manu jahpu n la ai sha kaman jaw da ai.

Anhte marai hkum shagu gaw kanu a kasha ni rai ga ai. Kanu kaw nna asak hkrung lu ai rai ga ai. Adam yan Eve gaw anhte hpe asak hkrung shangun ai kanu kawa yan rai ma ai. Dai hte maren shanhte gaw Karai Kasang a teng man ai kasha ni rai ma ai hte kanu kawa jaw ai asak gaw Karai Kasang kaw na re ai majaw Karai asak nan rai nga ai. Adam yan Eve gaw Karai kasang jaw da ai tara hpe tawt lai ma ai majaw hkrat sum mat ai lam ni mung n kam na daram nan rai nga ai.

Shawng Kanu Kawa Yan Shut Hpyi Ai A Akyu Yawm Lam Ni Gaw Hpa Rai Ta?

Htani htana asak hpe jasum kau ma ai. Wenyi asak hpe tsun mayu ai. Matsan mayan re ai lam hte yak hkak jam jau lam ni hkrum ra ma ai. Karai kasha ni ngu hkam la ai kaw nna shaprai kau hkum ma ai. Karai Kasang shan a ntsa tsawra ai hpe jahten sharun kau ma ai. Raitim shan hpe jaw da ai chye na lu ai lam hte tsawra chye ai lam hpe gaw n la kau ya ai. Shan a shang lawt ai myit hpe mung n shaw la kau ya ai.

Shan a matu myit mada shara n nga mat sai. Shan jasum ai lam ni hpe bai sharai jahtuk la na atsam n lu mat masai. Raitim, chyeju hpe n gawn n sawn di ai shinggyim masha hpe Karai Kasang matut tsawra nga ai majaw shi a tsawra matsan dum ai hpe gaw n dawm la kau ai. Tsawra ding yang rai nga ai.

“Karai Kasang a Kasha hpe kam sham ai ni nlang hte gaw, hten bya n hkrum ai sha htani htana asak lu la mu ga nga, Karai Kasang gaw shi a kasha shingtai hpe jaw kau ai kaw du hkra mungkan ga hpe grai tsawra wu ai” (Yh 3:16).

“Ngai chyawm gaw, sagu ni asak hkrung lu na hte dai asak hpe nhpaw n-ya lu la mu ga ngu nna sa ring ngai,” (Yh 10:10).

Yesu Madu mungkan ga de du sa ai gaw mara a majaw hkrak sum mat ai wenyi asak hpe madun na matu hte dai hpe bai lu la shangun nna Karai Kasang a kashu kasha ni bai shatai ya na matu rai nga ai.

Yesu Madu Gara Hku Galaw Lai Wa Ai Rai?

Shawng ningnan shinggyim masha ni a mara hpe rawt dat hkyamsa ya ai. Nni nkri hkam nna wudang ntsa si hkam ai. Shi a nni nkri hte si hkam ai a marang e, myit malai lu ai ni yawng hpe mara hta na shalawt dat ya ai. Bai hkrung rawt ai a marang e, Adam yan Eve a majaw hkrat sum mat ai wenyi asak hpe bai jaw ya ai. Yesu bai hkrung rawt ai shana “Wenyi hpe hkam la mu” ngu nsa kawut bang ya ai (Yh 20: 22). Anhte Kashin Kamun hkam ai shaloi Madu Karai Kasang a kashu kasha majang bai tai ga ai.

Kashin Kamun hkam ai shaloi San pra ai ni a mying hte shamying ga ai. Kashin Kamun a marang e, lachyum nga dik nna san seng dik ai kumhpa rai nga ai, Chyeju asak, manu jahpu n jaw ra ai asak hpe lu la saga ai. Hkristu a asak, Wenyi a asak, Karai a asak ngu nna mung tsun ga ai.

“Karai Kasang a tsawra myit gaw grai kaba la nga ai rai nna anhte hpe Karai Kasang a kashu kasha ni ngu nna shamying ai hte maren kaja wa mung anhte Karai Karai Kasang a kashu kasha ni rai nga ga ai,” (1Yh 3:1).

“Ngai gaw sabyi ru madung rai nga nngai, nanhte gaw lakung lakying ni rai nga myit dai. Kadai rai ti mung, ngai hta noi nga nna ngai mung dai wa hta noi nga ai rai yang gaw, dai wa gaw asai law law si wa lu ai; hpa majaw nga yang, ngai hte hka jang, nanhte hpa mung n galaw lu myit dai.” (Yh 15:5).

Yesu Madu gaw Kawa Karai Kasang hte langai sha rai nga ai. Kawa Karai Kasang a ra sharawng ai hte maren galoi mung hkan galaw ai. Anhte mung Kaw Karai Kasang a ra sharawng ai lam hpe hkan shatup ra ga ai. Karai Kasang a yaw sin ai lam anhte marai hkum shagu hta nga ai.

“Nanhte sha ti mung, lu ti mung, hpa galaw ti mung, nga manga hta Karai Kasang a hpung shingkang hpe tam let, a galaw nga mu,” (1Kor 10:31). Num, La, kaji kaba, hpaji chye ai, n chye ai, du salang, shangun ma ngu garan ginhka ai lam n nga ai sha yawng gaw apu asi lu la na matu langai sha ra ga ai. Dai gaw, Karai kasang hpe chye chyap hku hkau nna, Shi hpe tsawra daw jau nna, tinang a matu yaw sin da ya ai hkang da lam ni hpe aten shagu hkap la hkan shatup na lam rai nga ai.

Anhte Hkristan prat gaw kabu pyaw lam hte akyu chyeju hpring tsup ai ni rai ra ga ai. Anhte gaw Karai Kasang a kashu kasha ni tai na matu aten law law jaw n ra ga ai.

“Ngai hta asi n si ai lakung shagu hpe gaw, shi krum kau wu ai; asi si ai lakung shagu hpe chyawm gaw asan aseng rai nna asi grau si u ga nga tsan kau ya wu ai,” (Yh 15:2).

Hpun lakung lakin ni hpe tsan kau ra ai gaw anhte chye ga ai. N kaja ai lakung lakin ni hpe atsawm sha tsan kau lu ai hpun gaw apu asi law law pu si ai hpe mung anhte chye ga ai. Dai gaw kaja ai lakung lakin ni hta n-gun grau kaja wa na matu rai nga ai.

Hpun lakung ni hpe tsan kau ai ngu ai gaw nni nkri jam jau hkam ai hpe tsun ai. Anhte hta yak hkak jam jau ai lam ni law law nga ga ai. Dai yak hkak jam jau lam ni gaw anhte hpe kung hpan shangun ai. Yak yak hkak lu la ai gaw manu dan ai rai nna, de a matu kabu pyaw ga ai. Yesu Madu shi hkum hpe tsabyi ru madung hte shingdaw nna, kam sham ai ni hpe lakung lakin hte shingdaw da ai.

San Pawlu tsun ai asi si ai lakung lakyin ni

Ndai laban na chyum laika hta Yerusalem na Hkristan ni San Pawlu hpe hkap la na matu lakyin nga ma ai. Shawng de shanhte hte shanhte kam ai Yesu Madu hpe zingri lai wa ai masha re ai majaw shi hpe hkam la na matu myit hta pyi n bang da ma ai.

San Pawlu gaw karai kasang a matsan dum lama ai tsawra myit hpe mauhpa hkam la lu ai rai nna dai hpe kaja dik sakse hkam ai wa tai wa ai. Yesu hte shi a hpang hkan ai ni hpe jahten sharun ai wa Yesu a kasa tai wa ai gaw mauhpa kaba langai nan rai nga ai.

“Ndai ya e ngai hkrung nga ai asak gaw ngai n rai mat sai, ngai hta rawng nga ai Hkristu rai nga ai” (Gal 2:20). Tsabyi ru madung Hkristu Madu hte matut nga ai ni gaw kaja ai apu asi law law hpe shapraw lu nna tinang hkum nan hte hpu nau ni hpe mung akyu jaw lu na rai nga ai.

San Pawlu gaw shi a prat hta aten shagu ngu na daram zingri hkrum ai majaw ru yak jam jau lam ni hpe hkrum sha lai wa ai. “Nye a mying majaw shi hkrum lu na ra ai matsan tsin-yam ni yawng hpe ngai nan shi e madun na we ai” ngu Anani hku Madu tsun da ai (Ks 9:16).

Raitim, Yesu Madu gaw aten shagu San Pawlu a makau e htep lahti nga ai rai nna, yak hkak jam jau ni hpe hkam jan lu ai n-gun atsam jaw ya nga ai. Yesu Madu gaw anhte ni a makau hta, grau nna, matsan jam jau hkrum ai aten ni hta ni ni htep htep rau nga let rau hkam sha lawm ya ai hte hkam jan lu na n-gun atsam hpe mung jaw ya nga ai. Shi a asak gaw anhte hta mung nga nga ai.

Akyu hpyi saga

Wa Karai Kasang e, Nang Madu jaw ya ai Wenyi asak hpe hkam la lu na matu anhte hkam ra ai nni nkri lam ni hte hkrum ang ai matsan jam jau lam ni hpe hkam jan lu na matu anhte hte rau sa nga ya let hkam jan lu ai n-gun atsam ni hpe mung jaw bang ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Paska Ladaw hta (5) ngu na laban rai nga ai.

HTI ANG AI JA CHYUM MUNGGA NI GAW

Chyum Mungga Daw (1) Kasa 9:26-31

Chyum Mungga Daw (2) 1Yh 3:18-24

Kabu Gara Shiga Yh 15:1-8

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.