Hkristain Langai Gaw Jews Masha Ni Hpe N-Ju N-Dawng Ai Myit N-Mai Rawng Ai, Nga Nna Wa Sarabyin Tsun

“World Congress of Mountain Jews” ngu ai, bum nga Yuda masha u-hpung a dat kasa ni hpe lai wa sai bat langai ya shani Vatican hta Wa Sarabyin Francis hkap la hkrum shaga ai lam galaw lai wa ai. N-dai bum ga masha, Jews u-hpung a dat kasa ni hpe Wa Warabyin kaw nna ya na zawen hkap la hkrum shaga ai lam galaw ai gaw nam bat langai lang ngu na hkrum shaga ai lam re, nga ai.   

N-dai Bum ga masha Jews ni gaw, dai ni Iran Mungdan ngu ai, Persian hta, tsa ban 5 daram kaw nna nga pra hkrat wa ai Persian Jews masha ni rai ma ai. Lai wa sai aten kasat gala lam hta grai kung ai masha ni re, nga ma ai. Caspian panglai grup yin na bum ga ginra ni hta shaning tsa lam hte ru nna nga pra lai wa yu ma ai, raitim mung Soviet Union Mungdan ga a-yai mat wa ai hpang kaw nna gaw buga ginra law law de bra ayai mat wa ma ai, ya yang Russia hte Azerbaijan Mungdan ni hkan law law shanu nga pra nga ma ai rai nga ma ai. 

Wa Sarabyin hte hkrum shaga bawng ban ai aten, Holocaust ngu ai Jews masha ni hpe u-hpung hte nawng nawng wan nat sat sharu kau ai mabyin hpe myit dum ai masat nhtoi ni hte seng nna mung, bai Jews masha ni hpe nju ndawng ai myit lai masa nga nga ai mabyin ni hte seng nna mung tsun shaga bawng ban ai lam ni galaw lai wa ma ai re, nga ai.

Jews masha ni hpe nju ndawng myit rawng ai masa lam hte seng nna Wa Sarabyin tsun ai hta, “Jews masha ni hpe nju ndawng ai myit lai masa dai ni na prat uhpung uhpawng ni tha matut naw mu mada lu nga ai, Hkristaian ni hte Jews masha ni gaw npawt langai sha rai nga ga ai majaw, Hkristain langai gaw Jews masha ni hpe nju ndawng ai myit lai rawng ai masha n mai tai ai, ngu nna law law lang ngai tsun yu ai, Jews masha ni hpe nju ndawng ai myit lai masa ni mat hkoi mat hkra jawm shakut ai lam she anhte galaw ra na rai ga ai” nga nna Wa Sarabyin tsun dat nga ai.

Nazi ni kaw nna Jews ni hpe wan nat sat sharu lam galaw ai, Holocaust ngu ai Crimea hta shanu nga pra ai ndai bum nga masha Jews ni hkying mi jan sat hkrum lai wa ma ai. Ndai masa gaw Nazi ni sat sharu lam galaw ai hta n-dai bum nga Jews ni law law nhkrum lai wa ai ngu ai masa rai nga ai, hpa majaw nga yang ndai masha ni shanu nga pra ai ginra ni de Nazi ni law law n-du lu lai wa ma ai majaw mung, bai kaga lam langai gaw n-dai bum nga masha Jews ni gaw makam masham galaw ai Jews ni she re, amyu baw sang hte seng nna mang hkang shabyin ai ni nrai ma ai, ngu nna Nazi ni myit la lai wa ma ai majaw re, nga nna Vaticans shiga dap kaw nna ka shana dat nga ai.

Fr.Bernard Dashi Tang Ji

Source : Vatican News