Jau Prat (50) hpring chyeju dum Jubali poi galaw lai wa sai shiga

Myitkyina Saradaw Sasana hta na  Wa Jau kaba Msgr.Francis Zukdaw Lum Dau a Karai Magam gun jau prat (50) ning hpring chyeju dum Ja Jubali Poi kaba hpe  Myitkyina jau ginwang San Columban Nawku jawng Aung Nan hta April (20) ya shani galaw lai wa sai.Ndai Wa Jau kaba Msgr. Francis Zukdaw Lum Dau a Karai magam gun Ja jubali poi hta Wa Saradaw Francis Daw Tang hte Wa Jau ni,uhpung shagu na Mama ni,Tara Hkaw Sara/num ni,jinghku jingyu ni hte Nawku hpung masha 700 jan sa du kabu shanglawm lai wa sai re.

Wa Jau kaba Msgr. Francis Zukdaw Lum Dau A Jau prat (50) ning hpring chyeju dum shakawn shagrau Ja jubali poi hta Wa Jau a chyinghku jingyu marai (50) hpe Wa Jau James Zukdaw Zung Ding hte Mama kaba John Paul Bawm Win kaw nna woi awn let Lachid htung hking Nga Wuloi Rung (50) dum shagrau ai lam ni,Sara Nbau bum Sin wa kaw nna Wa jau hpe Ga shagawp hte shakawn hkri awn shagrau ai lam ni Nawku hpung masha ni kaw nna Wa jau hpe kumhpaw kumhpa ni hte shakawn shagrau lai wa sai re.

Wa jau kaba Msgr. Francis Zukdaw Lum Dau gaw  1936 ning april 1 shani  Nat Jaw Sara kaba Slg. Zukdaw Hkawng Lum hte Jan.Maria GAlau Hkaw Nam  yan  kasha Ma la rai nga ai.Wa Jau kaba Msgr.Francis Zukdaw Lum Dau gaw 1971 ningMarch Shata 21 ya shani hta Wa Saradaw kaba John Howe a lata hta Jau ayak hkam la lai wa sai rai nga ai. Wa jau gaw Jinghpaw Wun Pawng amyu sha ni hta mali (4) ngu na jau tai wa ai wa rai nna Lawngwaw (Lhaovo) myu sha ni hta na shawng ningnan jau tai wa ai wa mung rai nga ai.

Wa jau kaba Msgr. Francis Zukdaw Lum Dau gaw Naga bum,Manmaw jau ginwang,Tanghpre jau ginwang,Chyum Jawng,RVA Jinghpaw Nsen Shapoi Dap hte Myitkyina Jau ginwang ni hta magam gun lai wa nna 2014 ning hta Wa Sarabyin rung kaw nna  Wa Jau kaba Msgr.aya hpe hkam ya lai wa sai rai nga ai.

#rvakachinservice

#aungnan

#myitkyina