Wa Sarabyin A April Shata Na Akyu Hpyi Yaw Shada Lam Gaw “Npawt Rudi Ai Shinggyim Ahkaw Ahkang” A Matu Rai Nga Ai

Mungkan ting hta npawt rudi ai shinggyim ahkaw ahkang hpe makawp maga shakut taw nga ai ni a matu akyu hpyi ya na yaw shada let, 2021, April shata na akyu hpyi yaw shada ai lam hpe Wa Sarabyin Francis masat ndau da ai rai nga ai.

Npawt rudi ai shinggyim ahkaw ahkang hpe makawp makawp maga ai hta n hkrit n tsang ai sha atsam marai dat shakut shaja na gaw grai nan ahkyak nga ai.

Ndai zawn npawt rudi ai shinggyim ahkaw ahkang hpe makawp maga ai gaw matsan jam jau ai, rapra lam n nga ai, bungli kata re ai, lamu ga nga shara dum nta n lu ai, shinggyim lam yan hte bungli n lu ai ni a matu npawt rudi ahkaw ahkang nga wa na hkra gasat ai lam rai nga ai.

Wa Sarabyin a Worldwide Prayer Network kawn npawt rudi ai shinggyim ahkaw ahkang a matu akyu ja ja hpyi na matu mungkan ting de ndau ya sai rai nga ai.

Shinggyim ahkaw ahkawng lam hta masat shadang langai, lahkawng, masum ngu nna tsang madan masat ai lam ni nga taw ai mungkan masha ni a matu Wa Sarabyin myit npyaw ai lam, kaja wa nga yang, yawng gaw maren sha rai ra ai lam Wa Sarabyin Francis hpyi shawn da nga ai.

Shara nkau ni hta shinggyim sari sadang hpe makaw maga ai ni tara jawng ni hta jep shagawn ai lam n nga ai sha, hkyuk htawng bang kau hkrum ai ni mung nga ma ai; jahprak hkrum ai mung nga ma ai.

Shinggyim masha shagu gaw rawt jat galu kaba wa na ahkaw ahkang nga ai rai nna, npawt rudi ai shinggyim ahkaw ahkang hpe gara mungdan na kadai mung pat shingdang ya n mai ai.

Dai masa lam hpe myit hta bang da let marai hkum shagu ndai April shata a matu akyu hpyi yaw shada lam hte maren akyu hpyi nga ga ngu Wa Sarabyin n-gun jaw da nga ai.

Npawt rudi ai shinggyim ahkaw ahkang (fundamental human rights) gaw shinggyim masha yawng hte seng ai rai nna, ndai ahkaw ahkang gaw shinggyim masha shagu a matu re ai lam hte 1948 shaning hta ndai ga baw ginlam hte ndau hpang ai re lam labau hku chye lu ai.

By Fr. Patrick Gawmaw Hkawng Yae

#vaticannews

#rvakachinservice

06 April 2021, 17:00

https://www.vaticannews.va/en/pope/news/2021-04/pope-francis-prayer-intention-april-2021-human-rights.html