Bangladesh Saradaw Ni: Myanmar Mung Masa Lam Simsa Wa Lu Na Matu Man Hkrum Bawngban Sa Wa Na Matu N-gun Jaw

Myanmar mungdan ting hta mungdan daru magam zing la hkrum ai aten kaw nna shawa n-gun madun ai mung shawa masha ni hpe Myanmar Hpyen Dap hte Balik Dap ni jahkrit shama rim la hkyuk htawng bang, masha sat amu ni galaw nga ai hpe Bangladesh Saradaw ni (Catholic Bishops’ Conference of Bangladesh- CBCB) kawn ja ja sadi jaw jahprak da ma ai lam April 6 ya shani na UCAN News Website hta ndau da ma ai.

Myanmar mungdan hte seng nna Bangladesh Saradaw ni a ndau laika hta hpyen gumshen ai lam ni hpe kau da na matu hte man hkrum bawngban ai lam galaw nna democracy mung masa lam hpe bai gaw gap sa wa na matu hpyi shawn nga ai Myanmar mung shawa masha ni hte rau tsap nga ma ai lam tsun da ma ai.

Mung masa lam chyam chya nga ai hpe hparan sa wa lu na matu seng ang ai ni shada man hkrum hkrum shaga bawngban na matu Myanmar mungdan daru magam zing la ai Hpyen Dap hpe hpyi shawn da ma ai.

April 6 ya shani, Commission Tingyang Up Saradaw Kaba Gervas Rozario ta masat lamak htu da ai ndau laika hta Myanmar mungdan hte Myanmar mung shawa masha ni a ntsa Karai Kasang a tsaw ra matsan dum lanu lahku ya ai akyu chyeju hpyi ya ai lam, Chyoi Pra Hkum kawan akyu hpyi let mung Myanmar mung shawa masha ni hte rau tsap nga ga ai lam, Bangladesh mungdan na Kahtawlik Sasana gaw Myanmar mungdan na Kahtawlik Sasana hte ni htep dik ai htingbu ni rai nna, Myanmar mung shawa masha ni hpe madi shadaw lawm ai lam, mung shawa masha ni hte langai hta sha jawm pawng nga ai lam, kaga mung masa lam hta democracy mung masa lam hpe grau tsaw ra grau ra marit nga ai ni a machyi kaba hte matsan mayan rai yak hkak jam jau hkrum nga ai lam hta mung rau hkam sham lawm ai lam, mung shawa masha ni myit hkrum kahkying gumding lam hte democracy awng dawm lu na matu seng ang ai ni hte asan brang rai nna man hkrum hkrum shaga bawngban ai ladat hte Myanmar mung shawa masha ni a ra sharawng ai lam hpe lawan ladan rai hkrang shapraw sa wa lu na matu Bangladesh Saradaw ni hkung hkrang myit masin mahkra hte akyu hpyi ya nga ai lam ka da ai.

Myanmar Mungdan Kahtawlik Saradaw Hpung a Hpa-Awn Ningbaw, Cardinal Charles Bo kawn Korea Mungdan na Kahtawlik Sasana hpe garum hpyi shawn da ai hpe mung madi shadaw lawm ai lam mung ndau da ma ai.

Cardinal Charles Bo mung shi a ndau laika hta mung shawa masha yawng myit simsa hkra shakut nga na matu hpyi sawn da ai lam, n tara ai hku rim da hkrum ai mungdan gumsan magam hte rau mungdan hkring mang ni, grau nna Awng San Suu Kyi hpe dat ya na matu hte cyam chya hkrum taw ai mung masa lam hpe man hkrum hkrum shaga bawngban let hparan hpang sa wa lu na matu Hpyan Dap Asuya hpe hpyi shawn da lai nga ai.

“February 8 ya shani, balik ni a shawng kaw hpu di let mara kata mung shawa masha ni hpe gat sat na malai ngai hpe gap sat kau mu ngu hpyi shawn lai wa sai Ma Ma Ambrose Nu Tawng hte rau anhte Bangladesh Mungdan Kahtawlik Sasana Saradaw ni mung anhte Kahtawlik Hpung masha ni a malai hpyi shawn ga ai,” ngu mung tsun da ma ai.

Myanmar mung shawa masha ni yak hkak jam jau hkrum ai rai yang, anhte mung jam jau hkrum ga ai. Myanmar mung shawa masha ni a matsan jam jau ai lam hte roi rip dip da hkrum ai a majaw anhte htingbu mungdan ni a myit masin wenyi hta hkra machyi lawm ga ai lam UCAN News Shiga Dap kaw nna ndau da ma ai.

By Fr. Patrick Gawmaw Hkawng Yae

#ucannews

#rvakachinservice

Source: UCAN News

https://www.ucanews.com/news/bangladesh-bishops-urge-dialogue-to-solve-myanmar-crisis/92007?fbclid=IwAR33r7iRt26KM5kF_vMYWdTExiE0CbVnXb1xz57A2PCZCwxgQ3JNHr9MB34#