Lai wa sai Paska Laban, April 4 ya shani hta Wa Sarabyin Paska Misa Hkungga nawng jau ai aten na Paska mungga hta teng man simsa ai hte tara rapra ai demoncracy mumg masa lam lu la na matu shamu shamawt taw nga ai ramma ni hte rau rai nga ai lam mung tsun shalawm da ai; grau nna myanmar mungdan na ramma ni hte rau rai nga ai lam tsun da nga ai.

February 1, 2021, ya shani kaw nna mungdan daru magam hpe Myanmar Hpyen Dap ni zing la nna Aung San Suu Kyi, Mungdan Gumsan Magam Win Myit yan hte rau, mung shawa ra lata poi hta awng da ai mungdan asuya magam gun law law hpe rim la nna hkyuk htawng sharawng nga ma ai gaw ya du hkra rai nga ai.

Dai aten kaw nna Myanmar mungdan kata, mungdaw shagu hta nga ai mung shawa masha ni hte rau, maigan mungdan kaw du nga ai mung shawa masha ni gumshen ai ladat jai lang nga ai Hpyen Dap Asuya hpe ninghkap ai lam galaw hpang wa ai gaw ya du hkra matut manoi rai nga ai.

Mungkan Rapdaw UN hte Asia Dan kata na mungdan ni, grau nna htingbu mungdan ni mung mungdan simsa lam hte tara rap ra lam hpe bai gaw de sa wa na matu lam tam nna bawng ban sa wa na matu shadut n-gun jaw nga dingyang rai nga ai.

Mung shawa masha ni ra sharawng mung masa lam hpe bai lu la na matu mung shawa masha ni ladat amyu myu shaw nna shakut nga ai hta Committee Representing Pyidawngsu Hkuttaw (CRPH) gaw madung myit mada shara zawn rai wa ai.

Mung shawa masha ni hpe dawsa ai lam n galaw na matu, gumshen ai lam n galaw na matu Hpyen Dap Asuya hpe yawng yawng e jawm sadi jaw nga ai lapran shimlam la gabaw hte mung shawa masha 557 hpe zingri sat kau ma sai lam hte mara kata rim la hkrum ai masha hkying kaba de rai sai lam, Assistance Association for Political Prisoners (AAPP) kawn sawk sagawn da lu ai lam mung tsun da nga ai.

Myanmar mungdan na ramma ni gaw, n ju n dawng ai lam hpe tsaw ra myit hte shaden kau lu na re ngu ai makam hte, democracy mung masa lam hpe bai gaw de sa wa na matu simsa, si mani ai ladat hte shanhte a nsen ni hpe shapraw nga ma ai, ngu shi a mungga hta shalawm da nga ai.

Myamar mungdan kata n simsa, n tara ai lam ni nga taw ai hpe teng man rapra tara hte simsa lam lu la na matu Myanmar mung masha ni ladat amyu myu hte hpyen gumshen ai lam hpe shara shagu hta ninghkap nga ma ai rai nna Hkristan masha ni, grau nna, Kahtawlik makam htung lailen rai nga ai Hkyela Madu Yesu Hkristu bai hkrung rawt ai Paska kumla rai nga ai Paska Udi “Easter egg” ni hta hpyen gumshen ai hpe ninghkap ai kumla madun ai mawn sumli ai lam ni galaw let ninghkap lai wa ma ai.

Paska Udi ni hta hpyen gumshen ai hpe ninghkap ai kumla amyu myu hte hkrang shala da ma ai. Lata yingnu masum sharawt da ai sumla ni hte “save our people” “Democracy” “save Myanmar” ngu ai laika si zawn re ai simsa lam a matu hpyen gumshen ai ni kaw nna lawt lu na kumla hkrang amyu myu hte hkrang shala da ma ai.

“Ngai gaw buddhist she re ai; raitim, shanhte ni dai hpyen gumshen ai hpe ninghkap ai kumla shapraw da ai udi ni lang da nna shawa n-gun madun ai hta ngai mung shang lawm lai wa ai. Ngai hkum nan lang na udi ni hta hpyen gumshen ai hpe ninghkap ai kumla hkrang shala na matu hkying hkum mi daram aten la nna hkrang shapraw lai wa ai.” “Myanmar mungdan democracy lawan bai lu gaw gap sa wa u ga matu akyu hpyi nga nngai,” ngu Yangon mare kaba hta shanu nga ai masha langai mi AFP de tsun dan da ai lam Vatican Shiga Dap kaw nna ndau da ma ai.

San Peter Nawku Htingnu hta nawng jau ai lai wa sai laban bat na Paska Misa Hkungga hta Wa Sarabyin Francis mung Myanmar mungdan na ramma ni gaw, n ju n dawng ai lam hpe tsaw ra myit hte shaden kau lu na re ngu ai makam hte, democracy mung masa lam hpe bai gaw de sa wa na matu simsa, si mani ai ladat hte shanhte a nsen ni hpe shapraw nga ma ai, ngu shi a mungga hta shalawm da nga ai.

Myanmar mungdan na Cardinal Charles Bo mung shi a Twitter hta “Yesu Madu hkrung rawt sai: Alleluia! Myanmar Mungdan mung bai rawt wa na ra ai!,” ngu tsun da ai lam Bangkok Post Website kaw mara da ma ai hpe RVA Jinghpaw Nsen Shapoi Dap kaw nna shalai ndau dat ga ai.

By Fr. Patrick Gawmaw Hkawng Yae

#popefrancis #cardinalcharlesbo #vaticannews #bankokpost #rvakachinservice

Source : Bangkok Post