Myanmar Mung Shawa Masha Ni Hpe Grau Madi Shawa Nga Ai Dingda Korea Mungdan

Asia mungdan ni hta Myanmar Mungdan masa lam hte seng nna grau myit lawm madi shadaw lawm taw ai gaw Dingda Korea Mungdan rai nga ai.Rapdaw salang ni hkum nan mung shawa ni a shawa n gun madun ai hta shang lawm mungga tsun ai lam ni nga ai.

Ndai lam hte seng nna Dingda Korea Mungdan hta Myanmar Mungdan a matu shamu shamawt shang lawm shakut taw nga ai  social influencer Ma Khaing Khaing Moe Htet hpe VOA shiga dap ni san htai galaw da nga ma ai.

Korea Mungdan na Rapdaw salang ni hte hkrum byin ai lam hte seng nna Ma Khaing Khaing Moe Htet tsun ai gaw

Shanhte ni ya zawn Myanmar Mungdan masa lam hta myit lawm ai gaw anhte hku nna hpyi shawn ai madang nrai ra ai,shanhte ni nan myit lawm taw ai re.Shanhte hte hkrum byin ai lam mung anhte hku nna hkrum mayu ai ngu lak san hpyi shawn ai lam n nga ai,anhte ni bat shagu Myanmar Mung sumtsan dat kasa rung shawng kaw zup hpawng ga ai,dai hpe mu ai majaw hpa garum ya ra na kun, anhte hku nna garum ya lu ai lam ni nga ai rai yang garum ya mayu ai,rapdaw salang ni hte hkrum mayu ai rai yang nanhte ramma ni sa hkrum lu hkra lajang ya na nga na tsun nna rapdaw salang shi hkum nan slogan laika pa lang nna anhte hte rau shawa n gun madun ngut ai du hkra sa tsap lawm ai.

 Ma Khaing Khaing Moe Htet hku nna rapdaw salang ni hte hkrum ai ten hpa ni jahkrum bawng ban lu ai kun ngu ai ga san hpe bai htai ya ai hta

Madung gaw CRPH a matu hpyi shawn ai,CRPH hpe madi shadaw hkap la ya na matu,UN de mung Myanmar Mungdan maga hku nna madi shadaw lawm na matu,mungdan a up hkang aya zing la ai hpyen dap hpe mazut dingsa ai hpyen gumsheng hku nna masat ya na matu bai nna Myanmar Mungdan Democracy nlu dingsa Myanmar Mungdan hta hpyen dap hte ta gindun let jawm galaw da ai sut masa bungli ni hpe naw  jahkring tawn da ya na lam ni hpe hpyi shawn da ai.

Korea Mungdan kaw du taw nga ai Myanmar mung masha nkau mi ya ten matut nga na visa htum mat ai majaw Myanmar Mungdan de nhtang wa ra ai ni nga ai rai tim,ndai aten gaw grai yak hkak taw ai ten re majaw matut nga lu na ahkaw ahkang ni hpe mung hpyi shawn ai.Visa hte seng nna hpyi shawn ai hpe bat mi laman lu hkra grai lawan ai hku garum lajang ya ma ai.

Dingda Korea mungdan hta Myanmar Mungdan hte seng nna myit lawm ai masha,mung shawa masha hpe madi shadaw mayu ai masha ni grau law wa na matu Ma Khaing Khaing Moe Htet ni hku nna gara hku matut galaw sa wa na masing ni nga ai kun ngu ai ga san hpe htai ya ai hta anhte hte hkrum ai rapdaw salang wa gaw Catholic nawku hpung masha re majaw Korea Mungdan na Wa Jau ni hte shachyen ya ai,ndai Korea Mungdan hta Catholic nawku hpung masha ni gaw tsawmra mi ahkyak ai hta lawm ai ngu tsun mai ai.Shanhte a hkrang mu sen na shiga dap ni,youtube ni hkan anhte hpe saw shaga ai, Myanmar Mungdan a masa lam tsun dan ra ai, dai majaw Catholic nawku hpung masha ni kaw na hkawt Myanmar Mungdan a masa lam hpe grau chye na myit lawm wa ai, Wa Jau ni hku nna mung Myanmar Mungdan a matu akyu hpyi ya ai sha nrai,shanhte hta kaja wa ra ahkyak ai yak hkak lam ni hpe mung garum ya ga nga nna Myanmar Youth Organization In Korea wuhpung kawn hpaw da ai garum mai ai account hpe ndau ya ai.Catholic nawku hpung masha ni gaw  CDM a matu garum gumhpraw ni account de shalai jaw bang ya ai lam ni nga ai.Dai hpe Myanmar Mungdan na ra ahkyak ai ni a matu matut mahkai lu yang lu ai hku nna garum ya mat na wa re.Myanmar Mungdan a matu shanhte grai galaw ya nga ma ai,matut nna mung shanhte a mungdan masha ni hte matut mahkai ya nna youtube ni,channel ni hkan Myanmar Mungdan a masa lam hpe tsun mat wa na lam Ma Khaing Khaing Moe Htet tsun da nga ai.

Korea Mungdan rapdaw salang ni hku nna Myanmar Mungdan kaw nga ai shanhte a mungdan masha ni a shim lum lam hte sut masa lam ni a matu Myanmar Mungdan de sa na visa shawk ai rai tim Myanmar mung dat kasa rung kaw nna visa n jaw ai. Rai tim mung shanhte nhting nut mat na re,Myanmar mungdan mang hkang lam hte seng nna jahtum du hkra galaw mat wa na,Democracy lu ai du hkra mung masha ni hpang maga madi shadaw tsap lawm na lam nit sun ai.Dingda Korea asuya hte Rapdaw salang ni gaw Myanmar Mungdan hpe garum lu hkra kaja wa shakut taw nga ai,Myanmar mungdan de shang lu hkra mung shakut taw nga ai lam Social Influencer langai rai nga ai  Ma Khaing Khaing Moe Htet VOA shiga dap de tsun da ai kaw na chye lu ai.

Shiga ka gale ai - Julia Ja Ing

Source - VOA