Wa Sarabyin Francis Iraq Mungdan kaw nna March 8, bat langai ya shani Vatican de bai nhtang wa ai shaloi nbung li ntsa shiga dap kaw na ni hte hkrum shaga ai lamang hta du na September shata hta International Eucharistic Congress “Mungkan Mungdan Misa Hkungga Zuphpawng Kaba” ginchyum dat shangut ai Misa Hkungga nawng jau woi na matu Budapest de sa du na lam tsun dan wa ai lam chye lu ai.

Wa Sarabyin Francis Budapest de “the 52^nd International Eucharistic Congress” (52) lang ngu na mungkan Misa Hkungga zuphpawng kaba ginchyum dat Misa Hkungga sa naung jau woi na daw dan ndau da ai hpe Hungary Kahtawlik Saradaw Zuphpawng Kaba (HCBC) kawn kabu gara hkap tau la ai lam tsun da ma ai.

“Wa Sarabyin Francis a Hungary hkrunlam gaw anhte mungdan hte zuphpawng kaw lawm ai ni yawng a matu n-gun tsi kaba tai nna Wenyi atsam jat ai lam mung tai na re ngu myit mada ai”

nga nna  Hungary Saradaw Zuphpawng Kaba (HCBC) a gawng malai Hungary Saradaw ni a hpa-awn daju Cardinal Peter Erdo, Archbishop of esztergom-Budapest hte HCBC hpa-awn Gyor kaw na Saradaw Andras Veres yan htuk shapraw ai ndau laika (statement) kadun hta tsun da ma ai.

International Eucharistic Congress hpawng de na aten gaw September 5-12 ya lapran rai nna, Hungary mungdan kata Budapest hta galaw na re lam chye lu ai.

Wa Sarabyin Francis, Sarabyin lata la hkrum ai aten kaw nna ya du 8 ning laman, shi a daidaw mungdan rai nga ai Argentina de n wa shi ai majaw daidaw buga de wa na, n wa na hte seng nna hkrum shaga lamang hta ga san san ai shaloi, “Dai Hkrun lam teng wa na, n teng na hpe ngai hkrak n lu tsun shi ai” ngu htai da ai. Iraq mungdan hkrunlam gaw kaga mungdan ni hta grau pu ba ai ngu tsun da ai.

Asak 84 ning rai sai Wa Sarabyin Francis Hungary mungdan de sa ai hkrunlam gaw apostolic visit masa lam hku gaw n re ai lam, International Eucharistic Congress zuphpawng ginchyum dat Misa Hkungga nawng jau woi na matu sha sa du na re lam tsun da ai.

Masa htuk jang gaw Hungary mungdan a htingbu mungdan rai nga ai Slovakia mungdan de mung matut hkawm sa na re lam Wa Sarabyin Francis hkum nan tsun ai. Raitim ndai hkrunlam hpe hkrak daw dan da ai lam gaw n nga shi ai lam mung tsun da ai.

“Eucharistic Congress” Misa Hkungga hte seng ai zuphawng kaba hpe Saradaw ginwang madang, mungdaw madang, mungdan madang, mungkan madang ngu masat nna galaw mai ai.

Mungdan madang “International Eucharistic Congress” hpawng kaba hpe gaw Wa Sarabyin hkum nan saw shaga nna galaw ai, shing n rai, Saradaw zuphpawng kaba “Bishops’ Conference” hta Saradaw ni tang shawn wa ai hpe dai Saradaw zuphpawng kaba kawn bawngban daw dan nna galaw mai ai.

“International Eucharistic Congress” hpe Fransik (France) mungdan, Lille hta 1881 shaning hta shawng ningnan hpawng hpang ai rai nna, ya du hkra rai yang, mungdan shara law law hta galaw lai wa sai rai nga ai. Hungary mungdan hta ndai lang galaw ai zuphpawng gaw lahkawng lang ngu na lang rai sai lam chye lu ai. Lai wa sai 1938 shaning hta mung, Budapest kaw sha galaw lai wa sai lam chye lu ai.

Translated by Fr. Patrick Gawmaw Hkawng Yae

#vaticannews #rvakachinservice

09 March 2021, 11:51

Source : Vatican News