Wa Sarabyin: Iraq Hkrunlam Mali Ya Ngu Na Shani, Labau Shang Iraq Hkrunlam Ngut Ai Hpang Iraq Mungdan Hpe Shakram let Vatican De Bai Nhtang Wa

Wa Sarabyin Francis Iraq mungdan de March 5 ya shani hkawm sa hpang ai rai nna praw kru, pru sanit ya nhtoi ni hta mungdan kata na mungdaw law law de hkawm sa let mungdan gumsan magam hte rau mungdaw hkringmang daju ni, bai makam masham hpung shagu na hpung woi hpa-awn ni hte rau mung shawa masha law law hte hkrum shaga ai lam hte nawku daw jau ai lam ni hpe rau galaw lai wa ma ai.

March 8, bat langai ya shani, Iraq mungdan hpe shakram let Vatican de bai nhtang wa ai. Mungdan kata dawsa ai lam ni, jahten shaza ai lam ni, myu hpung garan ginhka ai lam ni n nga u ga matu shadum n-gun jaw, akyu hpyi let simsa rapra lam gaw de sa wa na matu mung shadum n-gun jaw akyu hpyi woi lai wa ai.

March 8, bat langai ya jahpawt Iraq mungdan hpe shakram let Vatican de bai htang wa ai lam chye lu ai. Nbungli daru hta mungdan gumsan magam Barham yan shi a ningrum ningtau hte hkrum shaga ai lam kadun galaw let jahpaw hkying 9:54 AM aten hta rawt nna Roma de shani hkying 12:45 PM aten hta angwi apyaw sha bai du wa sai lam chye lu ai.

Vatican de du ai hte San Mary Major Nawku Htingnu de hkring mi sa du let Kanu Nu Maria hpe chyeju dum akyu hpyi htinglu htinglai lam galaw la ai. Dai hpang shi shanu nga ai Htingnu de shang wa ai.

Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-03/pope-francis-apostolic-journey-departs-conclusion.html

https://www.vaticannews.va/en/pope/news/2021-03/pope-francis-prays-saint-mary-major-returning-iraq-journey.html