Indonesia Mungdan N-bung Li Hkrat Agrawp Mat Ai Hta Lawm Mat Wa Ai Ni Yawng A Matu Myit Npyaw Yawn Hkyen Lawm Nga Ai Lam Wa Sarabyin Tsun 

N-bungli gawt ai ni hte hpawn bu hkawm masha, yawng marai 189 lawm ai Lion Air Indonesia n-bungli langai lai wa sai bat langai ya shani pang lai de hkrat agrawp mat wa ai shiga na lu ai majaw myit n-pyaw yawn hkyen lawm nga ai lam wa Sarabyin Francis tsun shapraw dat nga ai. 

Wa Sarabyin a malai Vatican amu madu Cardinal Pietro Parolin ta masat htu nna Indonesia Mungdan de shagun jaw dat ai Wa Sarabyin a laika hta, “N-bungli hkrat agrawp mat ai shiga na lu ai majaw myit n-pyaw yawn hkyen lawm nga ai, si hkrum mat sai ni hte yawn hkyen hkrum nga ai dum nta masha ni yawng a matu akyu hpyi ya nga ai, Indonesia Mungdan hte, hkye mawoi lam galaw ai hta shang lawm garum nga ai ni yawng hpe wa Karai Kasang n-gun atsam jaw shaman ya nga u ga,” nga nna ka shana dat nga ai.

Lai wa sai bat langai ya jahpawt, Mungdan a mare daju Jakata kaw nna Pangkal Pinang ngu ai zin lawng de rawt pyen mat wa ai Lion Air Indonesia n-bungli langai rawt mat wa ai hpang minute 13 daram sha naw rai yang pang lai de hkrat agrawp mat wa ai rai nga ai.

N bung li ntsa hta, hkrun lam bu hkawm masha marai 181 ht n-bungli ntsa na magam gun ni marai 8, yawng 189 tup re, dai ni hta ma kaji langai hte chyu chyu ai ma chyangai 2 mung lawm ai re, nga ai. Lamu marang mung htuk ai aten re, nbungli mung nnan sha naw re, rawt mat wa ai hpang kade nna yang, jak the seng ai mang hkang ni nga ai majaw nbungli pa de bai ginhtang yu wa na matu, nbungli pa kaw nna matsun nga ai lapran matut mahkai di mat wa ai re.

Nbungli pa hte kilometer 15 daram tsan ai pang lai shara hta nbungli ntsa na arung arai ahkyek alep ni hpe mu mada lu ai, nbungli ntsa lawm nang mat wa ai ni yawng asak hkrung na masa nnga sai, nga nna Indonesia Mungdan lit nga ai ni  tsun shapraw da nga ma ai, nga nna Vatican shiga dap kaw nna shana dat nga ai.

Souce : Vatican News