Karai Kasang A Mungga - Pran Wan Ladaw Laban 6, Shaning B, 2021

Hkristu hta tsaw ra ai nu wa hpu nau ni e, ndai laban gaw Pranwan ladaw hta (6) ngu na laban rai nga ai.

 

Mara galaw ai hpang hkam sha ra ai lam ni

Ana kap masha ni hta na, grau nna, mang gang ana kap ai ni hpe mu mada ai shaloi anhte ni myit n pyaw lawm ga ai re. Mang gang ana gaw dai masha a hkum ting hpe jahten ai grai nan sawng ai rai nga ai.

 

Karai Kasang a Chyeju hte dai ni a prat hta dai zawn re ai ana ni hpe tsi tsi lajang lu ai tsi ni hpe sawk shagawn shapraw da lu sai rai nga ai.

 

Raitim, prat hta hkan nna n myit mada paw pru wa ai ana zingli hpe tsi shamai lu ai tsi hpe gaw ya ju ya hkyen n lu tam shapraw ga ai. Dai ni na aten hta nga yang Covid – 19 ana zingli gaw mungkan ting a matu hkrit tsang dik htum ai ana zingli tai nga ai.

 

Moses gaw Israel myusha ni hpe makam masham lam hte rau shinggyim lailen ni hta lam woi ningshawng lai wa ai. Karai Kasang gaw shi a myu sha ni hpe hkum hkrang wenyi lam yan yawng a matu masin jahkrat ya ai a majaw shi hpe shakawn ra ga ai.

 

Mang gang kap masha ni a matu Karai Kasang a lam matsun ai hte maren Moses jahkrat da ai tara hpe masha shagu hkan nang hkan sa ma ai.

Yuda myu sha ni hta mang gang ana hte rau kaga ana zingli law law byin ma ai. Mara lu ai kumla re ngu Yuda masha ni tsun ai lam hpe mara a majaw rai na re ngu hkam la ma ai.

 

Dai majaw dai zawn ana kanu kap ai lam nga ai ni gaw Myihtoi ni kaw woi sa nna shanhte ni hta mang gang ana kap ai ngu masat shagrin ya nna san san tawn da ma ai. Mare shinggan kaw yi wa kasha ni gap tawn da ya nna dai hta nga shangun ma ai. Shanhte a matu masat da ai shara masat jarit kata kaw sha nga ra ma ai.

 

Shanhte gaw bu hpun palawng dingsa shaje ni hpe sha hpun ra ma ai. Grai nan myit htum myit yawn myit kaji ai ni zawn kara hpe n masit shatsawm ai sha tawn da ra ma ai. Hpa majaw nga yang shanhte a prat tup gaw hkam sha lam kaba hte hpring nga ai majaw rai nga ai.

 

Masha hpyi hta byin ai kaga ana kaji gajaw ni gaw mai wa lu nga ai. Raitim, teng sha mang gang kap ai ni gaw myit mada shara nan nnga ai darem rai nga ai. Ana kap masha langai mai tsai wa ai rai yang Myihtoi kaw sa nna dai Myihtoi sakse hkam ya let Karai Kasang hpe chyeju dum hkungga nawng ngut jang she tinang a kun dinghku nta masha ni hpang de bai wa lu ai rai nga ai.

 

Raitim, mang gang ana kap ai ni law malawng gaw bai mai tsai wa ai lam nnga ai majaw matsan dum na zawn nan rai nga ai. Kun dinghku nta masha ni hte hka nna nga ra ma ai rai nna n san n seng ai ni re majaw mung, kap wa chye ai majaw mung kadai mung shanhte nga ai shara de n sa ma ai.

 

Yesu Madu manggang kap masha langai mi hpe shamai ya ai lam

San Marku masha langai ngai a lam tsun shagu ga si law law hte n-tsun ai. Raitim, shi tsun ai ga si kachyi mi hte dan dan len len chye na hkra tsun dan chye ai. Yesu Madu hte mang gang kap ai yan tsun shaga hkat ai lam gaw myit kahpra na zawn rai nga ai. “Mang gang kap ai masha langai mi Yesu kaw sa nna, lahput hput di let, Madu e, nang hkraw n yang gaw, ngai hpe shamai shatsai ya lu na rai nga ndai,” ngu nna shi hpe hpyi nem wu ai (Mk 1: 40).

Ndai ga hpe na ai ni gaw matsan mayan re ai mang gang kap masha a jam jau lam a majaw matsan dum myit tsang nga na ma ai. Kaja sha nan matsan mayan rai nga ai. Shi a mau hpa shagrit shanem ai lam a majaw Yesu Madu hta sha, shi a matu langai sha re ai myit mada shara nga nga ai hpe shi dum chye nga ai. Masha ni nga ai shara de n mai sa ai ngu ai tara hpe tawt lai ai rai tim, Yesu shi hpe gawt shapraw kau na n re ai hpe shi kam ai masa hta nga ai.

 

“Ngai hkraw nga nngai, san pra wa nu,” ngu shi hpe Yesu Madu bai tsun let shaman ya ai (Mk 1: 41). Shamai ya mayu ai ngu ai sha n ga, shamai ya na matu myit sharawng ai lam tsun ai rai nga ai. Shinggyim masha yawng hpe mara hte mara a majaw jam jau hkam ra ai n kaja ai lam kaw nna shamai shatsai jahkoi kau ya mayu nga ai. Shi a garum ai hpe ra sharawng ai ni hpe Yesu Madu lawan dik ai hku shamai ya na rai nga ai.

 

De a matu Yesu Madu mungkan ga de yu sa wa ai. Shinggyim masha yawng hpe kaja shangun mayu ai majaw mara a majaw mat mat ai wenyi ni hpe htani htana asak hte jahpring ya ai.

 

Shanhte a matu gaw ana zingli mat mat sai lam sakse lakmat hpe madun na hte Moses tara hpe jahten kau na n ra sharawng ai a majaw ana zingli mat mat sai lam Myihtoi kaw sa nna tara shang lakmat la, Karai Kasang hpe chyeju dum hkungga nawng na matu Madu Yesu shi hpe hkang dat ai.

 

Raitim, kaga masha ni hpe sakse hkam madun ai lam n galaw na matu Yesu shi hpe hkang dat ai. Tim, Madu gaw shi hpe shamai shatsai ya ai lam jahtau tsun let Karai kasang a hpung dagu hte matsan dum lama ai lam hpe shakawn shagrau nu ai.

 

Yesu Madu mungga hkaw hpang ai shaloi, shi Mesiah re ai lam hkum ndau na matu masha ni hpe hkang da ai hpe anhte dum chye ra ga ai. Dai lam, tinang a prat jahtum, grau nna, si ai kaw nna bai hkrung rawt ai shaloi hta she yawng chye lu na aten du na ra ai.

Raitim, Yesu Madu gaw mang gang kap ai wa chyeju dum chye ai myit a majaw, shi a ga hpe n madat ai raitim, kabu lai wa ai. Shinggyim masha yawng Karai Kasang hpe shakawn shagrau na hpe Yesu Madu ra sharawng nga ai.

 

Ndai laban na Kabu Gara Shiga Chyum laika a amarang e, mang gang kap ai wa shagrit shanem ai lam, Yesu Madu hpe kam sham kam hpa ai lam hte Madu Karai a matsan dum lama ai lam ni hpe sharin la lu ga ai.

 

Grau nna n mai malap ga ai gaw, mara gaw shinggyim masha hpe shingtai hkam sha ru shangun ai rai nna, yak hkam jam jau lam hpe jaw ya lu ai lam rai nga ai. Karai Kasang gaw dai mara hpe raw dat hkyamsa jaw lu ai wa rai nga ai.

 

Mungkan masha ni hkrum sha ra nga ai mang gang ana, dai ni anhte hkrum sha nga ai Covid -19 ana tsin-yam ni hta mara gaw grau nna sawng ai rai nna, hkrit tsang ra dik htum ai rai nga ai. Mara gaw anhte hkum hpe n mu lu hkra jahten kau chye ai sha n ga, Karai Kasang hte kam sham ai hpu nau ni kaw nna san san pru nga ra mat shangun chye nga ai.

 

Shinggyim masha gaw marai langai sha shingtai nga na matu n rai nga ai. Kun dinghku masha ra ai; hku hkau manang ni ra ai; teng man ngwi pyaw simsa lam jaw ai makau grupyin hpe ra ai re.

 

Masa lam hku yu yang, masha gaw marai langai sha nga nna, jau gawng gawng, nga hkwi, yi sun hkauna galaw let nga lu ai rai nga ai. Raitim, ta tut hta gaw, nihtep ai ni hte tsan gang mat ai; shingtai kau da hkrum ai zawn hkam sha wa ai rai nna, myit ru myit tsang myit kaji wa ai hte si mat lu ai. Hpang jahtum tinang hkum tinang sat si ai ni mung nga ma ai. Shut hpyi mara galaw ai shaloi dai zawn re ai masa de du mat chye nga ai.

 

Mara a majaw Karai kasang kaw nna hka ra mat ai.

Adam hte Eve gaw karai Kasang a ga n madat ma ai shaloi, Edin sun na hpun lap ni lapran makoi nga ma ai (Ningpawt Ninghpang 3: 8).

 

Bai Ningpawt Ninghpang 4: 14 hta “Ca-in gaw, dai Madu hpe, nang gaw ngai hpe ndai lamu ga kaw nna mung, na a man kaw nna mung shaden kau nga ndai. Ngai gaw ginding aga ntsa e nta n lu ai sha brak hkawm ai wa tai wa nna ngai hpe mu tam ai kadai wa mung ngai hpe sat kau na ra ai,” ngu nna tsun wu ai. Ndai gaw Ca-in shut hpyit ai mara a majaw myit tsang kaba hkrum ai lam rai nga ai.

 

Yona hpe Ninewe mare kaba de sa nna masha ni myit malai lu mu ga sa hkaw tsun na matu Karai Kasang shangun dat ai shaloi “Karai Kasang kaw nna tsan ai shara (Spain) de hprawng mat ai (Yona 1: 3).

 

Mat mat ai shadang sha ga shadawn hta kanau wa gaw “grai tsan ai mung de sa mat wa ai” lam mu lu ai (Lk 15: 13).

 

Karai kasang hte tsan gang mat ai rai yang mara kaba galaw hkrup ma ai hte daw hka ra ma ai.

 

Mai Kaja ai lam yawng a ningpawt ninghpang hte madu madung rai nga ai Karai Kasang hte hka mat jang n kaja ai lam hte hkrum katut na sha rai nga ai.

 

Nhtoi yawng a Madu hte ngwi pyaw lam yawng a madu Karai Kasang hte tsan gang mat jang nsin htawng hta hkrat sum mat na, myit kaji ai hte kaya mat na sha rai nga ai. Asak madu rai nga ai Karai Kasang kaw nna hka mat jang htani htana asak hpe jasum kau ra na rai nna, dai gaw ngarai nan rai nga ai.

 

 

Mara gaw Hkristan kahpu kanau ni hte garan hka bra shangun ai.

Ntsa lam mu mada ai hta, laban nawku daw jau lam ni hte kaga nawku daw jau lamang ni hta anhte Hkristan Hpung masha ni rau jawm hpawng de akyu hpyi nga ga ai raitim, mara kaba galaw ai rai yang gaw wenyi lam hta anhte ni kade tsan gang hkat nga ga ai hpe dum chye yang she dum chye na ga ai.

 

Anhte ni Karai Kasang hpe shakawn ai mahkawn ni, akyu hpyi ga ni hte Karai Kasang hpe shakawn shagrau chyeju hpyi nga ga ai rai tim, mara kaba jang gaw kaman tai nga chye ai. Myit malai lu nna Karai Kasang kaw hpyi nem tawng ban let shi hpe shakawn shagrau akyu hpyi chye ra ga ai. Anhte shada da, bai Karai Kasang hte prinem ai lam la nna Karai Kasang hpe chyeju dum chyeju shakawn chyeju hpyi chye nga ga.

 

Akyu hpyi saga

Wa Karai Kasang e, nang hkraw n yang gaw anhte a shut hpyi mara ni hpe raw dat hkyamsa ya nna hkum hkrang myit masin wenyi hkam ja let nang madu hpe chyeju dum chyeju shakawn chyeju hkam la shangun ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Pranwan ladaw hta (6) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Jaw Jau 13: 1-2, 45-46

Chyum Mungga Daw (2) 1Kor 10: 31 – 11: 1

Kabu Gara Shiga Mk 1: 40-45

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.