Wunpawng shadang Deacon Joseph Zau Gun, SJ

Joseph Htingnu Kawng Zau Gun, Deacon aya hkam la sai

Philippines mungdan Manila mare daju, ‘The Society of Jesus’ ngu ai Jesuit Jau uhpung a Jau tai dakkasu jawng hta Karai hpaji sharin hkaja hkam la nga ai, Brother Joseph Htingnu kawng Zau Gun gaw Oct 27, bat kyu ya jahpawt, saradaw Pablo Virgilo S. David, D.D. a lata hta Deacon aya hkam la nna, Jesuit jau uhpung a Deacon langai tai wa sai rai nga ai.

Deacon Joseph Zau Gun, SJ gaw N-gm La mare hta dai daw ai wunpawng shadang langai rai nga ai. Ya Shatapru jau ginwang Kawa Hka mare hta shanu nga ai Tarahkaw sara Htingnu Kawng Zau Awng hte sara jan Nlam Roi Tawng yan a kasha rai nga ai.

Philippines mungdan, Ateneo De Manila University dakkasu jawng kaba kata na Church of the Gesu ngu ai nawku htingnu kaba hta, Oct 27 ya jahpawt hkying 8:30 aten galaw ai Missa hkungga hta, kaga manang 14 the rau shanhte yawng marai 15 tup Deacon aya hkam la lai wa ma ai lam rai nga ai. Deacon aya hkam la sai marai 15 hta, anhte Myanmar mungdan na Deacon marai 3 lawm nga ai, dai ni gaw Deacon Nay Myo Htet, SJ (Yangon sasana), Deacon Than Naing Lin, SJ (Pyi sasana), hte Deacon Joseph Zau Gun SJ (Myitkyina sasana) ni rai ma ai. Kaga Decon ni gaw Thailand, Benin, Korea, Kenya, East Timo, Indonesia, Vietnam hte Philippines mungdan hkan na ni rai ma ai. Deacon nnan ni gaw mungdan law law kaw nna rai nga ma ai majaw, Deacon shatai Missa hkungga hta sa du akyu hpyi shang lawm ai hpung masha law law rai nga ai hte nsam hkum hkra mung mu lu nga ai.

Buga de nna da sang sa du ai Deacon Joseph Zau Gun SJ a jinghku ni marai mali hpe mung Missa hkungga hta mu lu nga ai.

Jau Bernard Tang Ji