Colombia Mungdan Gumsan Magam Hpe Wa Sarabyin Hkap La Hkrum Shaga Lai Wa Ai Lam Galaw

Vatican de du nga ai Colombia Mungdan gumsan magam Iván Duque Márquez hpe lai wa sai bat langai, October 22 ya shani, Vaitican hta Wa Sarabyin Francis kaw nna lak san hkap la hkrum shaga bawng ban ai lam galaw lai wa ai. 

Ndai hkrum shaga bawngban lam hte seng nna Vatican shiga dap kaw nna ndau shapraw ai shiga hta, grai hku hkau ai masa hte hkrum shaga bawng ban ai lam re, Colombia Mungdan kata byin nga ai nang hpam malu masha dut hpaga galaw lam, ja gum hpraw hte seng ai lai kyang hten za lam, mung chying sha ni a lapran na bai htingram hkat lam ni hte seng ai lam ni hpe bawng ban lai wa ma ai re, nga ai.

Mungdan kata byin nga ai yak hkak mang hkang lam ni hpe yan hparan lam ni galaw ai hta Nawku Hpung hte dingrun tsun shaga bawng ban lam ni galaw nna hkawm sa na ahkyak nga ai lam, bai, Mungdan simsa wa lu na matu shakut galaw nga ai magam lam hte, Colombia mung chying sha ni a lapran bai htingram hkat wa lu na lam yan ni hta, Nawku hpung kaw nna shang lawm shakut ya nga ai lam ni hte seng nna mung tsun shaga bawng ban lam galaw lai wa ma ai re, nga ai.

Wa Sarabyin Francis hte tsun shaga bawng ban lam galaw ngut ai hpang gumsan magam Iván Duque Márquez kaw nna Vatican amu madu Cardinal Pietro Parolin hte mung, bai, Mungkan Mungdan ni hte matut mahkai lam hte seng ai Vatican lit hkam, Monsignor Antoine Camilleri hte mung hkrum shaga bawng ban lam galaw lai wa ai. Dingda America Mungdan rai nga ai, Colombia Mungdan de lai wa sai shaning September shata hta Wa Sarabyin Francis sa du gawan lam galaw lai wa ai rai nga ai.

Source : Vatican News