Sarabyin Rung Hte Seng Ai Tara Upadi San Jep Sawk Sagawn Commission Hta Hpung Masha Kaw Nna Shawng Ningnan Lit Shatsam Hkrum

Laiwa Sai January 8, bat manga (5) ya shani, Wa Sarabyin Francis gaw Sarabyin Rung hte seng ai tara Upadi san jep commission hta hpung masha langai hpe shawng ningnan lit shatsam hpang ai lam Vatican Shiga Dap kaw nna January 8 ya shani tara shang ndau da ma ai.

Shi a mying gaw Vincenzo Buonomo rai nna, Roma mare Lateran Dakkasu jawng kaba a jawng up rai nga ai.  Shi a shawng na Saradaw Giorgio Corbellini a tingyang hpe hkam la ai wa rai nga ai.

Ndai rung hpe 1981 shaning hta tara shang gaw da ai rai nna, dai rung a ahkyak ai magam bungli gaw dai rung kata magam gun ai ni a shut shai ai lailen ni hpe sawk sagawn shapraw nna, magam kaw nna jahkring ai lam, shing n rai, shapraw kau ai du hkra tara jeyang na matu rai nga ai.

Ya, dai magam hpa-awn lit ap jaw hkrum ai wa gaw asak 59 ning rai sai lam chye lu ai. Shi gaw mungdan law law hte seng ai Tara Upadi ni hpe sharin ya nga ai wa rai nna, Vatican hpe hpaji jaw ai magam hpe mung 1980 kaw nna gun hpai lai wa sai wa rai nga ai.

Shi gaw Vatican Amu Madu, Cardinal Agostino Casaroli hte 1979 - 1990 shaning du hkra, Cardinal Tarcisio Bertone hte 2006 - 2013 shaning du hkra magam bungli rau galaw lai wa yu sai wa rai nna, Bertone a hkaw tara mungga laika ni hpe mung htuk shapraw lai wa ai wa rai nga ai.

Mying kaja hte sha nga lai wa ai hte hpaji ningtawng ai majaw, Jau ni chyu sha magam gun lai wa yu ai lit magam langai hpe Wa Sarabyin Francis kawn Roma mare Lateran Dakkasu jawng kaba a jawng up Vincenzo Buonomo hpe ndai lit magam hpe ap jaw ai lam chye lu ai.

Ndai Commission na malawm marai (6) hpe manga (5) ning magam gun na matu Wa Sarabyin Kaw nna lit ap jaw ai lam re lam mung chye lu ai.

Ndai Commission hpaw hpang ai kaw nna woi awn wa ai Cardinal ni gaw Venezuela mungdan na Cardinal Rosalio Castillo Lara (1981-1990), Italy na Cardinal Vincenzo Fagiolo (1990-1997), Italy na Cardinal Mario Francesco Pompedda (1991-1999), Spain mungdan na Cardinal Julian Herranz Casado (1999-2010) ni re ai lam mung chye lu ai.

Daining January 8 ya shani magam gun nnan lahkawng hpe ndau ya hta na langai gaw Monsignor rai nna, langai gaw Spain mungdan kaw na hpung masha re ai lam chye lu ai.

https://bit.ly/3sfQ6Nd

Shiga ka,tang madun ai -  Fr.Patrick Hkawng Rae