Wa Sarabyin: Yesu A N-ni N-kri Gaw Karai Kasang Mungkan Hpe Jaw Ai Kumla Re

Wa Sarabyin Francis, Vatican de “Christmas tree” Hkristmas hpun kumhpa jaw ai Slovenia hte Italy, Abruzzo a dak kasa hpe December 11, bat 5 ya shani hkrum shaga ai lam chye lu ai.

“Hkristmas gaw anhte hpe Madu Yesu a simsa kabu pyaw ai, anhte a n gun atsam hte shakut shaja ai lam a kumla rai nga ai.” Ndai gaw bat manga ya shani, Madu Yesu shangai ai kumla Hkristmas hpun kum hpa hpe hkap la ai shaloi tsun ai ga rai nga ai.

Italy, Abruzzo ginra, Castelli kaw na kum hpa ai dai Hkristmas hpun gaw Slovenia mungdan, Rinza hka mayan, Kocevje nam maling kaw na rai nna, San Peter pa hta shingkang ai hku tawn da ai lam chye lu ai.

Hpun hte crib: myit mada lam jaw ai kumla

Hkristmasa hpe shadan shalen ai kumla “icons” ni gaw, grau nna, Roma kaw nga ai ni hte Roma kaw nawku daw jau na sa du ai ni dai kumla ni hpe tsaw ra hkung ga shagrau ai a marang e myit mada lam hkam la lu ai kumla nan rai nga ai.

Madu Yesu shangai wa ai kumla rai nga ai hpun hte kaga kumla arung arai ni gaw Hkye la Madu shangai wa ai a mungsung lam hpe kam sham lu ai makam jaw ai asak rawng Hkristmas Ladaw hte makau gyupyin hpe hpan shalat ya nga ai.

Chyoi Pra Ai Kun Dinghku A Shagrit shanem ai Lam

Anhte ni Chyoi Pra ai kun dinghku a lam myit jung ai hte sumru ai aten hta shanhte a shagrip shanem ai gaw, laknak hpe zing la ai zawn, anhte hpe shalen la ai. Shan nu wa ni gawk kaji sha pyi n lu ma ai raitim, shana yuptung akyu hpyi ai lam galaw ma ai.

Shangai maw ai Nu Maria hte shi a hkritung na Ma yan a matu shara/gawk tam hkawm ai shaloi, Nu Maria gaw shi ma masin salum hta yawng hpe zing kyem da ai.

Simsa kabu pyaw ai hte n-gun atsam marai hte shakut shaja na lam hpe lu la na matu gaw, Yesu shangai ai Hkristmas shana hkrang hpe shala ai “crib” zawn sha, anhte a kaji kadun ai, matsan mayan re ai hte shagrit shanem ai lam hpe hkap la, hkam sha lu ra ga ai.

Ya na zawn chyam bra ana Covid -19 tsin-yam a majaw, Hkristmas poi galaw na matu yak hkam ai lam law law nga nga ai aten, Madu Yesu a kaji kadun ai hte machyu shara n lu ai kumla gaw Karai Kasang mungkan ga hpe jaw ai kumhpa rai nga ai.

Mungga jahtum daw hta Wa Sarabyin Francis lai wa sai shaning Italy, Greccio mare kaba hta sa gawan ai shaloi, shi hkum nan seng htu da ai a Apostolic Leter “Admirabile signum” hta lawm ai Christmas crib hte seng ai lam hpe bai hti na matu n gun jaw da ai.

“Dai ni na nhtoi ni hta dai hpe bai hti ai rai yang kaja ai.”

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-12/pope-francis-amid-suffering-jesus-is-the-sign-that-god-gives.html