Wa Sarabyin Francis Jau Prat (51) Ning Hpring Ladu Hkrum Nhtoi

1953 shaning Septermber 21 ya, San Mahte a poi shani, shaga la hkrum nna, 1969 shaning December 13 ya shani, Jau tai wa ai Wa Sarabyin Francis gaw 2020, December 13 ya shani Jau prat (51) ning hpring sai lam chye lu ai.

1958, March 11 ya shani “the novitiate of Society of Jesus” jau tai jawng de shang hpang wa ai rai nna, Jau tai ai hpang (4) ning na ai hpang 1973, April 22 ya shani shi a “perpetual profession hpe hkam la ai lam chye lu ai.

Shaga La Hkrum Ai Lam

Sarabyin tai wa na Jorge Bergoglio gaw 1953, September 21 ya, San Mahte a poi shani, nawku daw jau lamang langai hta shaga la hkrum ai lam hpang wa ai.

Wa Sarabyin Francis Sarabyin n tai shi ai aten du hka na mying majing gaw Jorge bergoglio rai nga ai.

Asak 17 ning rai sai Jorge Bergoglio gaw shi nga ai jau ginwang na Buenos Aires hta nawku daw jau lamang ni hpe maawn mawn sa lawm ai rai nna, lani mi mara raw sakramentu chyeju hkam la mayu ai majaw, shi n chye ai chyasam jau langai mi kaw mara raw sakramentu sa hkam ai. Dai aten gaw shi a prat hpe galai shai na matu hpang wa ai.

“Ndai mabyin gaw ngai a shaga la hkrum ai lam hpang ai mabyin rai nga ai,” ngu Wa Sarabyin francis 2023, May 18 ya, Pentecost shana na nawku daw jau lamang hta tsun dan da ai.

Nta kaw na Nawku Jawng de hkrun lam galu hkawm sa nna nawku jawng kaw du ai shaloi masha langai mi shi hpe a la nga ai lam; dai aten na mabyin hpe hkrak n matsing ai lam; dai jau gaw hpa rai dai kaw nga taw ai kun hkrak n chye ai lam; shi hpe mu jang mara raw sakramentu hkam la mayu ai myit ni hpa majaw rawng wa ai kun n chye ai lam; masha langai dai kaw la nga ai gaw teng nga ai lam; kaja wa sha nan mara raw sakramentu chyeju hpe hkam la lu ai lam ni hpe Wa Sarabyin Francis tsun dan ai.

“Mara raw sakramentu chyeju kumla hkam la ngut ai hpang ngai hta galai shai ai lam byin wa ai; Ngai mi na hte n bung mat ai; Nsen langai langai ngai hpe shaga ai hpe na taw ai zawn nga hkam sha ai; Ngai Jau nan tai ra sai ngu hkrak myit daw dan hpang wa ai,” ngu Wa Sarabyin Francis shi a shaga la hkrum hpang ai mabyin hpe tsun dan da ai.

Jorge Bergoglio dai aten kaw nna shi a prat hta Karai Kasang shi hte rau nga nga ai; shi a salum hpe hkra ya sai; Karai Kasang a matsan dum lama ai gaw shi hta ru bang ya sai ngu hkam sha wa ai. Grau nna, Loyola na San Ignatius a kasi hpe hkap la hkan sa na myit kaba wa ai.

1969 shaning December 13 ya shani, Jorge Bergoglio gaw Jau tai wa ai rai nna, 1998 shaning hta Buenos Aires na Saradaw kaba lit magam hpe gun hpai wa ai.

2001 shaning hta gaw Wa Sarabyin Yawhan Pawlu II kawn Cardinal tang dat ai.

Wa Sarabyin Yawhan Pawlu II a hpang 2005 shaning kaw nna Sarabyin tai wa ai Wa Sarabyin Benedict XVI hkring sa na mat ai rai nna, 2013, March 13 ya shani Wa Sarabyin Francis hpe bai lata tang dat sai rai nga ai.

Vatican hta gaw shaning shagu Sarabyin ningnan hpe tang ai shani hta holiday nhtoi masat ma ai rai nga ai.

Wa Sarabyin Francis kaw nna Jau ni hpe n gun jaw da ai. “hpaji rawng ai ni tai nga mu; myit mada lam kaba jaw ya lu na matu myit lawm hkum lawm ai hte masha ni a nsen hpe madat ya mu; simsa ngwi pyaw lam jaw lu ai hta ngang kang ai hte dakring dalang rai asum n jaw ai sha shakut nga mu; hkrit tsang ai lam n nga ai sha, atsam marai dat shakut nga mu.”

Dai ni na aten hta Jau ni gaw sagu hpung masha ni hpe bau sin makawp maga ai hta dai ni na aten hta jai lang nga ai telephone ni hte kaga social media lam ni hku nna ra kadawn nga ai ni hpe matut mahkai garum ya ma ai. Shanhte hpe hpone ni hku nna chying hka sa akawk ma ai. Karai Kasang shanhte hpe bau sin nga ai lam n gun jaw ma ai. Shani shagu na myit sumru mungga ni hpe garan gachyan ya ma ai. Machyi masha ni hte matsan jam jau ai ni, hpe n gun jaw ma ai. Ndai lam ni a matu Karai Kasang hpe chyeju dum ra ga ai lam mung Wa Sarabyin Francis tsun shadum da ai.

“Jau ni gaw hpu nau myit majing hte shawng lam yaw sin lam ni hpe masin jahkrat galaw gun hpai na lit nga ga ai ngu Wa Sarabyin shi a mungga hpang jahtum hta n gun jaw da ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-12/pope-francis-celebrates-51-years-of-priesthood.html