Panghkak Jau Ginwang Hta San Columban Hpe Shakawn Shagrau Ai Chyeju Dum Poi Galaw Lai Wa

Hkrisatu Hkawhkam Poi Nhtoi rai nga ai, lai wa wa sai laban shani, Panghkak Jau Ginwang, San Paul Nawku Jawng hta, San Columban Hpe shagrau ai  Chyeju dum Poi galaw lai wa sai lam chye lu ai.

Shaning shagu ndai poi hpe wu wu di di galaw ai raitim daining gaw Covid -19 Ana Zinli a majaw nlu galaw mat sai re. Ginwang Up Wajau mung, Sara ninghtawn, Buga shagu de nmai du gawan mat ai raitim Loije Buga hta  Ginwang Up Wajau Paul Lahpai Awng Dang sa du let Missa Hkungga Nawng Jau ya lai wa sai lam chye lu ai.

“Hkristu Hkawhkam a kyang lai len hte maren sak hkung hkawm sa daw jau lu ai hpung masha ni tai nga ga”

San Columban Poi nhtoi shani, ma marai (8) tup hpe mung  Mara raw Sacramentu nnan jaw ya lu sai nna, mara raw Chyoipra hkum nnan lu ai ma ni hpe Wa Jau kawn, “Hkristu Hkawhkam a kyang lai len hte maren sak hkung hkawm sa daw jau lu ai hpung masha ni tai nga ga” nga nna Mungga hte tsun shadum lai wa sai lam chye lu ai.. 

Wa Jau Awng Dang hku nna, hpung masha ni hpe "hkrisatu hkawhkam poi mung re hte maren anhte Panghkak  Jau Ginwang na hpung masha ni Wajau hpe tsawra hkungga manu shadan let kam hpa ai lam gaw kaja ai, raitim Wajau ntsun yang hpa nchye galaw ai, Wajau a matsun hpe sha ala madat ai hku gaw nnga ga " nga tsun shadum ai hte  Panhkak Jau Ginwang (100) ning hpring Jubilee Poi galaw na hte seng nna  mung myit shajin jahkrum bawngban ai lam ni galaw na matu tsun matsun lai wa sai re.

Bai nna, lai sai ten Panghkak Jau ginwang hta shaning law law Ginwang up Jau magam lit hpe gun hpai lai wa sai, Wajau kaba Partick Jangmaw Tu Shan hpe mung sa du shakram hkrum shaga ai lam galaw  lu sai lam Loije kaw na Teresa Ahbu shiga jaw ai hte maren chye lu ga ai.

Teresa Ah Bu