Yangon Sasana a Matu, Ningtau Saradaw Nnan Bai Lata Dang Dat ai Shiga ( 10 November 2020 )

Yangon Sasana a matu, Ningtau Saradaw Bai Lata Dang Dat Sai Shiga

 Wa Sarabyin Francis kaw nna, Yangon Saradaw Gin Jaw Ginwang a matu, “Auxiliary Bishop” Ningtau Saradaw ningnan lata san dat sai re lam chye lu ai.

Yangon Saradaw Ginjaw Ginwang a matu, Msgr.Wa Jau Noel Saw Naw Aye hpe Ningtau Saradaw hku nna, 2020 ning, November 10 ya shani nhtoi, hta Wa Sarabyin Francis hku nna, lata dang dat sai rai nga ai.

Msgr. Wa Jau Noel Saw Naw Aye hpe, lai wa sai 1969 ning, February shata (14) ya shani, Yangon ninghtawn, Taikgyi Ginwang, Saukwaigyi mare hta kawa Slg. Joachim hte Kanu Jan Romana Ngwe Hlaing yen kaw nna shangai chyinghkai wa ai rai nga ai.

Hpaji sharin hkam la ai prat

Msgr. Noel Saw Naw Aye gaw Sauk Wai Gyi hta lawu tsang jawng, Nyawngdon ninghtawn hte Tawlatee mare hta lapran jawng, Yangon BEHS 6 hte Bago BEHS 4 hta lahta tsang jawng ni hta sharin hkaja lai wa nna, Myit mang hpaji “Philosophy” hpe Pyin Oo Lwin, San Joseph’s Jau Tai Dakkasu jawng; Karai hpaji “Theology” hpe Yangon, San Joseph’s Jau Tai dakkasu jawng ni hta sharing hkam la lai wa ai Jau rai nga ai.

Msgr. Noel Saw Naw Aye gaw myit masin hpaji “Psychology” hpe Yangon Dakkasu Jawng hta B.A. jan mau hpe gup lu sai rai nga ai.

Graduate madang hpaji hpe gaw USA, New York na Yonker hta hpaw da ai San Joseph Jau Tai Jawng hte College hta sharin hkam la lai wa ai rai nna Sacred Theology jawng hta Master’s Degree janmau (2000-2002) gup la lu ai.

Jau Prat

1995 shaning, March shata 18 ya shani, Yangon Saradaw Ginjaw Ginwang, San Mary’s Cathedral jawng kaba hta Jau aya hpe hkam la ai.

Magam gun lai wa ai shara ni gaw,

1995-1997 – Yangon Saradaw Ginjaw Ginwang kata na Kahtawlik nawku jawng ni hta ningtau jau hku magam gun lai wa ai.

1997 -1999 – Kengtung Saradaw sasana na Missionary “Fidei Donum” kaw ap nawng lai wa ai.

2003 - Mawlamyine Saradaw sasana na Missionary “Fidei Donum” kaw ap nawng lai wa ai.

2003- 2007 – Yangon Saradaw Ginjaw Ginwang Rung hta “Secretary” Amu madu magam gun lai wa ai.

2007 kaw nna ya ten du hkra Yangon Saradaw Ginjaw Ginwang a Project Coordinator magam hte Pinya Sanyae hpaji jawng a Director magam ni hpe gun hpai taw nga ai.

2008 – 2009 – Yangon Ginjaw Ginwang, Hlaingthayar na Holy infant Jesu Nawku jawng a lit hkam magam gun lai wa ai.

2009-2013 – Yangon Ginjaw Ginwang, Hpaji Dap daju hte John Paul II a mying hte gaw de da ai hpaji hte seng ai Education Commission of John Paul II a lit hkam magam gun lai wa ai.

2013 kaw na ya ten du hkra, Myanmar mung ting na Saradaw ni a hpawng kaba CBCM a Coordinator magam gun taw nga ai.

2015 kaw nna ya ten du hkra, Yangon Saradaw Ginjaw Ginwang a kun hting (Procurator) magam gun taw nga ai Jau rai nga ai.

2020, November 10 ya shani Wa Sarabyin Francis kaw nna, “Auxiliary Bishop of Archdiocese of Yangon” Yangon Saradaw Ginjaw Ginwang a ningtau saradaw lit magam hpe gun hpai na matu lit shatsam dat sai rai nga ai.

Karai Kasang hpe chyeju dum let shakawn nga ga! Yawng hpe Karai Kasang shaman ya u ga!

#rvakachinservice