Spain Mungdan Na, Hkristu Madu A Matu Si Hkam Lai Wa Ai Joan Roig Hpe “A Lu Ai” Masha Tang Ai Shiga

Spain mungdan kata majan hta makam masham a majaw sat hkum ai Joan Roig y Diggle hpe November 7, bat 6 ya shani, “A Lu Ai Masha” shatai na matu lata san da hkrum ai lam chye lu ai.

Dai shani na Misa Hkungga hpe Barcelona Saradaw Ginjaw Ginwang, Cardinal Juan Jose Omella y Omella kaw nna woi awn nawng jau ai lam chye lu ai.

Joan Roig gaw asak 19 ning hta makam masham a majaw sat hkrum ai rai nga ai.

Joan Roig gaw spain mungdan kata majan hta sat kau hkrum ai masha marai 2000 hta na nawku jawng hta shareng shagrau hkung ga jaw hkrum ai wa rai nga ai.

Iberian zundawn (Peninsula) hta 1936 shaning hta  kam sham ai kanu kawa ni,ramma ni, asak kaba ai ni, jau ni, ma ma ni hte saradaw ni yawng rai yang tsa kaba gaw Hkristu hpe tsaw ra ai ni hpe n ju n dawng ai ni a zingri sat kau ai hkrum ma ai.

Joan Roig gaw 1917, May 12 ya shani, Spain mungdan Barcelona kaw shangai dai daw ai wa rai nga ai. Sut masa lam n kaja wa ai majaw, 1934 shaning hta El Masnou de htaw nga ra mat ai.

Hkam ja lam ningra ai majaw mung; hpaji hpe atsawm sha hka ja n lu ai majaw mung; bungli kaja n lu ai majaw mung, shi gaw nawku hpung sharin shaga ai makam masham hte maren nga shakut ai rai nna, myit sumru akyu hpyi shakut ai hta, Misa Hkungga man man lawm ai hta katsi kaja madun ai wa rai nga ai.

Shi a lam chye ai Jau ni hte shi a manaw manang ni gaw wenyi lam hte shinggyim kanawn mazum lam ni hta shi a shakut shaja ai lam ni hpe bai tsun dan ma ai.

Dai shani Misa hkungga nawng jau ai Cardinal Omella gaw shi mungga hta A Lu ai Joan Roig sakse hkam ai lam gaw Hkristan sak prat hku hkawm sa ai ramma ni hpe shadum jahprang n gun jaw ai tai nga ai ngu tsun dan da ai.

“Karai kasang hte manang tai ai; akyu hpyi shakut ai; Misa Hkungga man man lawm nna sak hkrung ai A Lu Ai Joan Roig gaw anhte ni hpe Madu Yesu hte Shi a Kabu Gara Shiga hte grau ni htep ai hku hkam la na matu pawng hpawm shangun nga ai” ngu mung tsun da ai.

Cardinal Shi a mungga jahtum hta A Lu Ai Joan zawn Madu Hkristu hta sak hkrung nga lu ai; tsaw ra myit hpe Atai masum Karai langai Karai Kasang hta ap da nna nihtep ai nau na ni hpe tsaw ra garum shingtau nga let apu asi law law pu si nga ga, ngu saw shaga da ai.

Ndai shiga hpe Vatican Shiga Dap kaw nna ndau da ma ai hpe RVA Jinghpaw Nsen Shapoi Dap kaw nna bai ndau dat ga ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/vatican-city/news/2020-11/juan-roig-martyr-of-the-fight-for-christ-beatified-in-spain.html