Buga Shiga (Oct 14, 2018)

Myitkyina Saradaw Sasana hta nambat langai lang hku nna galaw ai Ramma ni a Ga tsun shingjawng poi (Debate ) hpe 2018 ,October shata 13 ya shani 10:00 AM ten hta Myitkyina San Columban Nawku Jawng Wang, htap masum mungbawng htingnu hta galaw lai wa ai.

Shingjawng poi hta Myitkyina Jau Ginwang Ramma ni, Shatapru Jau Ginwang Ramma ni, San Luka Kawlik Chyum Jawng ma ni hte  Maina St.Joseph hpyen yen Ramma ni sa du shingjawng ma ai.

Hpang jahtum final hta  ‘Jinghpaw Mungdaw a matu htuk manu dik mung masa lam gaw jet ai Ferderal re (shing nrai) Awm Dawm re’  ngu ai ga baw hpe Shatapru Jau Ginwang ramma ni ga shawn (affirmative)  hte San Luka Kawlik Jawng ma ni hku nna ninghkap (Negative) hku  shingjawng mat wa ai hta Tara agyi ni amat jaw ai hte maren Shatapru  Jau Ginwang Ramma (Affirmative ) ni dang ai majaw numbat langai kumhpa hpe lu la ma ai.

Myitkyina Sasana kata na Ramma ni Chyoi Pra san Seng wa nhtawm, Mung masa,myit masa lam ni grau myi hpaw dumhprang wa nna hkaw tsun hpaji lam ni hta kung kyang wa lu na matu yaw shada let galaw ai n dai lamang hta ya she numbat langai lang galaw ai re majaw shang lawm shingjawng  ai ni hta ra rawng gawng kya ai lam ni law law nga ai raitim tinang dang lu ai daram shakut nna shingjawng mat wa ai hpe mu lu ai.

Dai shingjawng poi hta No (1) lu ai  Shatapru Jau Ginwang Ramma ni hpe Lap Sen Masum (300,000) ,No (2) lu ai San Luka Chyum Jawng Ma ni hpe Lap Sen mi Mun Manga (150,000) shagrau nna ngam ai wuhpung ni hpe shang lawm kumhpa lap mun kyu (60,000) hpra shagrau ya sai lam chyu lu ga ai.