Wa Sarabyin: Anhte Ni Myihtoi Elijah Zawn Nden Marai Rawng Ai Hkristan Ni Tai Ga

Wa Sarabyin Francis gaw October 7, bat 3 ya shani, Sarabyin Pawlu VI mying ai hkaw hta, shawa masha ni hte hkrum shaga ai shaloi, chyambra ana zingli a majaw machyi hkrum nga ai Mungkan ga hpe tsi shamai la na matu akyu hpyi ga ngu n gun jaw da ai.

Ndai laban bat hta “Myihtoi Elijah a myit masin hpe bang gun ga ngu mung n gun jaw da ai. Myihtoi Elijah gaw chyum laika buk hta mying dan hkrung ai ni hta na marai langai rai nga ai.

Myihtoi Elijah gaw, Chyum laika hta, Madu Yesu ahpraw nsam galai ai shaloi Moses hte rau dan pru ai wa; Shi gaw shi a prat hta lai jan nna nga nga ai wa; mau hpa mung sung hku dan pru ai wa; Sumsing lamu ntsa de asak hkrung let lung wa ai wa rai nga ai.

Myihtoi Elijah gaw agun alau hkrum nna, yak hkak jam jau hkrum ai lapran makam masha hta ngang kang ai hku sak hkrung hkawm sa lu ai katsi la grin ai wa rai nga ai.

Akyu Hpyi Ai Hte Sak Hkrung Ai Wa

Myihtoi Elijah gaw yak hkak jam jau ai lapran akyu hpyi shakut ai wa rai nna, myit sumru ai lam hta mung grai shakut ai wa rai nga ai.

Elijah a wenyi lam gaw daini na nhtoi ni hta mung anhte a matu katsi kamang kaba tai nga ai.

 Tinan a lit magam bungli hpe gun hpai gwi ai Myihtoi Elijah zawn nden marai rawng ai Hkristan masha law law ra ga ai.

Elijah gaw Tsaw htum Karai Kasang a myihtoi masha rai nga ai. Karai Kasang a magam gun ai shaloi shi hta gawng kya ai lam nga tim, Karai Kasang hpe kam hpa chye ai wa rai nga ai.

Akyu hpyi ai gaw htingbu wa hpe tsaw ra ai lam hpe madun dan nga ai. Karai Kasang a shawng kaw sa ai wa gaw shi kaw sa shangun dat ai nau na ni kaw sa ai lam rai nga ai.

Myit lawm hkum lawm ai hte akyu hpyi shaja ai, bai Karai Kasang hte jawm pawng hpawm ai lam gaw masha kaga ni a ra kadawn ai hpe ahkyak la madi shadaw garum ya ai hte jahka da n lu ai lam hpe Myihtoi Elijah sharin ya nga ai.

Akyu hpyi a ngu gaw Karai Kasang hte hkrum ai rai nna, nau na ni hpe garum shing tau na matu Karai Kasang shangun dat ai lam rai nga ai.

Shi a akyu hpyi ai hta Myihtoi Elijah gaw Karai Kasang a ra sharawng ai hpe myit sumru ai hte n tara ai lam ni hpe jahprak nna kau da ai lam rai nga ai.

Akyu hpyi a hta Myihtoi Elijah gaw Karai Kasang nga ai hpe hkam sha lu ai. Karai Kasang shi kaw sa du ai gaw n bung laru kaba hte n nang nawn nawn ai hta n rai nga ai, wan hta mung n rai nga ai; akya sha nga nna kahte ai nsen kaw she rai nga ai.

“Ndai gaw Elijah a maumwi rai nga ai; raitim anhte yawng a matu ka da ai rai nga ai”, ngu Wa Sarabyin tsun shadum da ai.

Shana daw maga aten nkau ni hta anhte gaw akyu n rawng ai zawn zawn, shingtai hkam sha ai zawn zawn byin chye ga ai. Dai gaw anhte a masin lasum hpe sa akawk ai akyu hpyi ga rai nga ai.

Anhte ni shut shai ai lam lama ma galaw ngut jang, shing nrai, anhte ni jahkrit shama ai hkrum nna hkrit kajawng nga ai ai rai jang, akyu hpyi let Karai Kasang hpang de sit shang ga ai rai yang simsa ai hte ngwi pyaw ai lam hpe bai lu la na ga ai, ngu Wa Sarabyin Francis hkaw tsun shadum da ai mungga hpe Vatican kaw nna ndau da ma ai.

Translated by Fr. Patrick Gawmaw Hkawng Yae

#vatcannews

#rvakachinservice

Link

https://www.vaticannews.va/en/pope/news/2020-10/pope-francis-we-need-courageous-christians-like-elijah.html