Msgr.John Saw Godric Hpe Taungngu Saradaw Lata Tang Dat

Taungngu Saradaw Sasana lit hkam Saradaw lit magam lahpa galai, Saradaw (Coadjutor Bishop) aya hkam la na matu Msgr (Monsignore) John Saw Godric hpe San Petru yan Pawlu a poi shani, June 29,2020 bat langai ya shana maga Myanmar Mung ahkying (5:30 )hta Wa Sarabying Francis kawn tang dat sai lam Bankok kaw nga ai Myanmar Mungdan ting a Vatican dat kasa rung kawn ndau shana laika htuk shapraw dat ai. Msgr. John Saw Godric gaw 1955, October 27 hta shangai daidaw wa ai rai nna, shi a daidaw buga gaw Littoo jau ginwang rai nga ai.

Jau aya hpe 1985, April 9 ya shani hkam la ai rai nna, 2017 kawn 2020 march shata du hkra Loikaw Saradaw Sasana kaw hpaw da ai San John Vianney Jau tai dakkasu jawng hta sharin Sara lit magam gun hpai lai wa sai . Dai kaw na hkring sa mat ai hpang, ya ten gaw Taungngu Saradaw Sasana a hpaji jaw ning hpum hta lawm ai rai nna, (financial) nawku hpung sut gan hting hkang hparan hpung hte (tribunal) nawku hpung tara rung ni hta magam gun nga ai "My Lord" ngu lachyum pru ai "Monsignore" hking htawng mying hkam la da ai Jau rai nga ai.