British hte US Embassies (sumtsan dak kasa rung) ni hta Sasasa galaw ai Mama hpung ni hpe shagrau ai laika bawng ban lamang galaw na shiga

Sasana shawng lam ni hta magam gun taw ai sasana mama hpung ni a ta tut magam hte seng ai laika bawngban hpawng n-hpang shi yang, Sarabyin a up hkang ginwang hta nga ai US hte British sumtsan dak kasa ni gaw nawku hpung hta dan dan len len nmu mada lu ai (share shagan) share ninghkrin sasana mama hpung ni a n hkring n sa shakut shaja nga ai lam ni hpe myit dum masat masa hpe June 23, bat 2 ya hta galaw ya na re lam chye lu ai.

Sarabyin a up hkang ginwang hta nga ai US hte Briptish sumtsan dak kasa rung ni hta magam gun ai ni yawng jawm hpawng de nna, ndai zawn galaw hpang wa ai gaw nawku hpung a sasana magam hta matsan mayan rai nga ai ni hte n-gun naw kya taw nga ai sasana hpung ni hpe garum lu na matu re ai lam chye lu ai.

Sasana magam hte seng ai Laika bawngban hpawng a matu gabaw hpe “Shawng lam na Sasana num ni” ngu jaw da ai rai nna, ndai ga baw hte seng nna ka lajang da ai laika hti bawngban ai lam hpe June 23, bat 2, hkring 11 hta hpang na rai nna, hkying hkum mi aten la na galaw sa wa na re lam chye lu ai. Bawngban mahkun lam gaw internet online ntsa hta galaw na re.

Sarabyin a daru magam hkaw ( the Holy See) hte matut mahkai ai US Hkring mang dak kasa, Callista Gingrich hte Sarabyin a daru magam hkaw (the Holy See) hte matut mahkai ai British Hkring mang dak kasa, Sally Axworthy yan gaw ndai lam hte seng nna, Vatican shiga dap hte san htai ai lam galaw da magang da sai rai nga ai.

Shan lahkawng yan gaw Sasana num ni a magam hpe shakawn da ma ai. Hkring mang kasa Gingrich gaw shanhte hpe “Kahtawlik Nawku Hpung kata n mu mada lu ai share shagan ni,” ngu shamying da ai. “Shanhte gaw kadai mung ndum ya ai hte masat masa galaw ya lam nnga ai lapran n-gun atsam dat sasana galaw shakut shaja ai ni rai ma ai. Sasana shang mama ni gaw hpaji lam hta, ladat nnan shaw hkrang shapraw ai hta, hkam ja lam jaw ai hta, shinggyim nau na shada garum shingtau madi shadaw ai lam ni hta, mungkan shara shagu na shinggyim wuhpung ni a shawng lam ni hta kaja wa nan shakut taw ai ni rai ma ai.” Chyam bra ana Covid – 19 tsin-yam hkrum aten hta matsan jam jau hkrum nga ai shingyim wuhpung ni grau law jat wa ai majaw ndai zawn laika bawngban hpawng hpe galaw ai lam rai nga ai. Hpa majaw nga yang, Sasana shang mama ni gaw bungli nlu, matsan mayan rai nna, malu masha yak ai ni hpe garum ya na matu matut shakut taw ai ni rai ma ai” nga nna, sumtsan dak kasa Gingrich matut tsun dan da ai.

“Sasana shang mama ni gaw matsan jam jau dik re ai shinggyim hpawng ni hpe bau sin ya nga ma ai re. Shanhte gaw mungkan hta garum pahtau nlu dik ai ni rai ma tim, bau dum marawn ai lam nnga ai sha, shanhte hta nga ai n-gun atsam arang bang nna daw jau nga ma ai. Ndai laika bawngban ai lam hpe akyu rawng dik masa nga wa hkra galaw na matu myit bang da ga ai. Sasana magam galaw ai mama ni gaw anhte hte ta gintun na akyu pru akyu rawng dik, masan sa dik ai ni rai ma ai. Shanhte nga ai buga shinggyim nga sat nga sa lam yan ni, mung masa lam yan ni hte sut masa lam yan ni hta chye na hkawn hkrang ai ni rai ma ai. Ra ahkyak ai lam ni hpe lawan ladan rai nna, tam sawk sagaw galaw shapraw lu ma ma ai,” ngu sumtsan kasa Axworthy mung matut tsun dan da ai.

June 23, bat 2 ya shani laika bawngban ai hta, ahkaw ahkang hte shinggyim nau na shada dut sha ai, roi rip zingri ai lam ni hte seng nna mahkrum madup nga yu sai nu num marai masum a machye machyang hpaji jaw, garan gachyan ai lam mung galaw sa wa na re lam Vatican kawn ndau shana da ya nga ai.

https://www.vaticanne ws.va/en/vatican-city/news/2020-06/women-religious-symposium-us-uk-holy-see-gingrich-axworthy.html

\

#churchnews

#rvakachinservice