Nawku Hpung Shiga / Local Church News ( 03 June 2020 )

Myitkyina  Sasana kata shata shagu galaw ai (monthly recollection) myit sumru kyu hpyi hpawng galaw lai wa sai shiga.

Myitkyina  Sasana hta Saradaw Francis Daw Tang woi awn nna, shata shagu shawng laban bat a bat (3) ya shani galaw ai (monthly recollection) myit sumru kyu hpyi hpawng hpe June shata praw (3), bat (3) ya jahpawt na misa hkungga hpe Wa Saradaw Francis Daw Tang kawn woi awn nawng jau ai. Misa Hkungga hta Covid – 19 tsin-yam hkrum masha ni a matu ap nawng akyu hpyi ya ai.

Jahpawt daw hkying (9) hta Wa Sarabyin Francis a matsun laika “Laudato Si” hte seng nna Wa Jau Kurt Pala, SSC. kawn garan gachyan ya ai. “Laudato Si” laika hpe 2015 ning hta Wa Sarabyin Francis kawn matsun da ai laika buk rai nga ai. “Laudato Si” laika buk a yaw shada lam gaw hpan da hkrum ai, nga yawng nga pra hpe, grau nna, anhte a mungkan ga hpe makawp maga shatsawm shahtap na matu rai nga ai. “Anhte ni yawng hte seng ai mungkan dum nta kaw shinggyim kun dinghku masha ni zawn arau sha nga pra nga ga ai re” ngu Wa Sarabyin tsun da nga ai.

Lamu ga hpe anhte hkum nan awu asin galaw ai; ntsawm hkra galaw ai; dai zawn galaw ai a marang e anhte a sak hkung lam hpe anhte hkum nan dingbai dingna jaw ai lam re. Dai majaw Wa Sarabyin gaw “lama na anhte ni hkamja nga pra lu hkra madi shadaw ya nga ai makau grup yin shing ra maka hpe jahten ai rai jang anhte ni a matu shawng lam ngu nga na nre, anhte a lamu ga nta hpe yu reng na matu koi yen ai rai yang, anhte ni lamu ga ntsa mara shut na; htingbu ni hpe mara shut na; grau nna Hpan Madu a ntsa mara kaba na re.” ngu tsun da ai.

Wa Saradaw Francis Daw Tang kawn mung Myitkyina Saradaw Sasana hta magam gun Jau, Mama, Tara hkaw sara ni hte hpung masha kaji kaba yawng hpe “anhte a lamu ga hpe anhte makawp maga ga” ngu n gun jaw dat nga ai. Shi tsun ai hta “Laudato Si” a matsun hpe hkan shatup ai hku anhte a makau grup yin hta taw nga ai maza mi hpe anhte hkum nan, jai lang mai ai hte n mai ai, shing nrai, dut mari mai ai hte nmai ai ni hpe garan ginghka nna, jasan jasen la ga. Anhte hkum nan gasi madun hpang let mungkan ga hpe makawp maga ga” ngu saw shaga n gun jaw ai.

Wa Sarabyin a matsun laika “Laudato Si” hpe Jinghpaw laika hte mung gale da sai re lam mung Wa Jau Kurt kawn tsun dan nga ai. Dai laika hpe Edin Chyum jawng up Wa Jau Leo kawn woi awn ka gale laika htuk shapraw da ai re. Mungkan ga hpe makawp maga na hte seng nna, Wa Sarabyin a matsun laika “Laudato Si” (Jinghpaw) hku ra ai ni Edin chyum jawng hte San Columban, Awngnan nawku jawng wang kata kaw san sagawn mari la mai ai.

Bai, Wa Jau Joseph Gawlu Yung Wa mung ya na zawn anhte jinghpaw ga hte laika ka shapraw ai nlaw la nga ai. Grau nna, kahtawlik nawku hpung makam masham hte sharin shaga lam ni hpe anhte a ga hte ka shapraw ai n gun grai naw ningra nga ai majaw ya na zawn shakut ap nawng ka lajang da sai laika buk ni hpe n gun jaw la na matu tsun ai.

Matut nna Chyum laika garan gachyan ai lam galaw ngut ai hpang (Benidiction) Chyoi Pra hkum gawan, Shani ka ang na, Madu lamu kasa akyu hpyi ga tsun let wut sawk hpe ginchyum dat shangut la lu sai hte, Anhte Myitkyina Saradaw Sasana hta lai wa sai shaning law law ten, Ramma Hpa Awn (Youth Director) tai let woi awn lai wa sai Wa Jau Hpu Hkwa hpe chyeju dum shakram ai lam hpe du hpawng ai jau ni hte rau Wa Saradaw Francis Daw Tang kawn shakram lamang kadun mi galaw la lu sai lam, yawng hpe kabu hpa shiga jaw dat ga ai law.

Ka Lajang ai  - Fr. Patrick Gaw Maw Hkawng Yae

                         Coordinator Of RVA Kachin

                         Myitkyina.