Wa Sarabyin Coronavirus Ana Zinli Machyi Hkrum Nga Ai Ni Hpe Garum Matum Alu Gaw Sharawt Dat Ai Lam

Wa Sarabyin Coronavirus Ana Zinli Machyi Kaba Hkrum Sha Nga Ai Ni A Matu Garum Matum Alu Gaw Sharawt Dat Ai Lam

Wa Sarabyin Fracis gaw, Coronavirus Ana Zinli chyam bra nna nachying wa tsin yam hkrum sha nga ai hpu nau ni hte wuhpung wuhpawng ni hpe garum shingtau la lu matu hkyak hkyak garum matum alu hpe gaw sharawt dat sai. Hkyak hkyak garum matum alu ni hpe Sasana shang nga ai mungdan ni hta na ana tsin yam hkrum sha nga ai wuhpung wuhpawng ni hta jai lang mat wa na re lam chye lu ai. Wa Sarabyin gaw shawng nnan lang hku nna American dollars 750,000 hpe garum mat wa na rai nga ai.

Wa Sarabyin mung Catholic wuhpung wuhpawng (Catholic institutions) ni hku nna mungdan shagu de Pontifical Mission Societies hku nna garum matum la na matu hpyi lajin dat ai. Pontifical Mission Societies (PMS) gaw (network) masha hkum ngau shagu hte hting let ya lu ai, magam bungli langai rai nga ai. Dai (PMS) hku nna Wa Sarabyin gaw Saradaw ginwang 1,110 jan de garum nga ai re. Madung garum nga ai mungdan ni gaw, Asia, Africa, Oceania, hte Amazon ginra kau chyen ni hta rai ma ai.

Source;Vatican News