Lashio Sasana Ginwang,,” Kawng Hka Jau Aseng Gawdin Ninggang Kashun Ginsup Poi” galaw

Lashio Sasana Saradaw Ginwang, Kawnghka Jau Aseng,Ginwwang up Wa Jau Rev.Fr. Joseph Jangmaw Din a lam matsun madun ai hte maren, Nawku Hpung Ginsup Komiti kaw nna woi awn galaw ai Kaung Hka Jau Aseng  Gawdin Ninggang kashun Ginsup Poi hpe 2018, August shata 20 ya shani shana de 2:30PM aten hta  Kaunghka Kahtawlik Nawku Jawng Wang Ginsup Pa hta akyu hpyi ap nawng let hpaw poi lamang galaw lai wa sai.

Kawng Hka Mare kata kaw nga ai Makam masham hpung n- gin hka, Gawdin ginsup  ninghkring ni yawng shang lawm ai  dai gawdin ginsup poi hpaw hpang lamang hta KDA, KPMF Dap na Du Kaba ni, Kawng Hka Jinghpaw Wunpawng Hkalup Hpung Hpung up Sara Kaba ni, Jau Ma Ma,Tara hkaw Sara Sarama ni hte Mare kata na Kanu Kawa ,Ramma ni law law sa du shang lawm  ma ai.

Ndai Gawdin Ginsup Poi a yaw shada ai lam gaw, Nanghpam Malu Masha ninghkap ia lam hpe madi shadaw garum lu na matu, Nanghpam Malu Masha tsin yam hkrum sha nga ai ramma ni hpe hkye mawai la lu na matu, Ginsup poi galaw ai a marang e Ramma ni a shawnglam hta hkrit hpa nanghpam malu masha hpe n lu sha hkra, pat shingdang makawp maga ya lu na matu hte Kawnghka Ginwang Kata kaw rau shanu shingbyi nga ai Amyu baw sang , Makam Masham Hpung ni yawng shada hku hkau kanawn mazum kahkyin gumdin wa lu na matu re ai lam,N dai ginsup poi a hpang jahtum shingjawng poi Final  hpe August shata 31 ,2018 shana maga hkying 4:00 PM ten hta galaw na re ai lam chye lu ai.

Kawng Hka Jau Ginwang  Kahtawlik Sasana Ginsup Komiti kaw nna woi awn let , 2016 ning hta Kut Hkai Sasana Ginwang Kahtawlik Jau Aseng , 2017 ning hta Lashio Saradaw Ginwang ting shanglawm ai “Nang Hpam Malu Masha Ninghkap Ginsup Poi” lamang ni galaw lai wa sai rai nna, dai ning 2018 hta gaw “Kaunghka Jau Aseng Gawdin Ninggang” ngu ai ga baw hte galaw ai re lam, Kaunghka Jau Ginwang, Lithkam Sara, Mai Joseph Thein Awng tsun ai hte Maren chye lu ai.

Thomas Mung Hpan