Nawku Hpung Shiga ( Church News ) 21 January, 2020

2020, dai ning na Hkristian ni a galung gahkyin akyu hpyi lam galaw ai laban bat hta, bu htawt hkawm masha ni hpe madung da myit sumru akyu na matu ga baw lata san da nga ai shiga   

2020, dai ning na Hkristian ni a galung gahkyin akyu hpyi lam galaw ai laban bat laman hta, bu htawt hkawm tsin yam hkrum masha ni hpe madung da myit sumru akyu na matu ga baw lata san da nga ai.

Hkristian ni galung gahkyim wa na matu akyu jawm hpyi ai laban bat galaw nga ai hta, dai ning 2020 ning a matu gaw January shata 18 ya shani kaw nna 25 ya shani du hkra masat galaw nga ai rai nga ai.

Hkrisitan ni galung gahkyin wa na matu yaw shada let shaning shagu Hkristian ni jawm hpawng akyu hpyi lam galaw ai ndai bat laman hta mungkan ting na Hkristian nawku hpung ning baw ni Vatican hta jawm zup hpawng nna akyu hpyi lam galaw ai. Akyu jawm hpyi ai laban bat shangut ai shana akyu hpyi hpawng lamang hpe Roma mare na San Pawlu nawku thing nu hta galaw ai. Shangut ai shana akyu hpyi hpawng lamang hta sarabyin Francis mung shawoi na zawn sha sa du shang lawm akyu na re, nga ai.

Dai ning na Hkrisitan ni galung gahkyin wa na matu akyu jawm hpyi ai laban bat laman hta Kasa laika hta na “Anhte hpe lak lai ai matsan dum lama ai lam shanhte madun dan mi ai” nga ai ga baw san la nna tsin yam hkrum bu htawt hkawm masha ni a matu lak san myit sum ru lam ni galaw na matu Hkrisitian nawku hpung dat kasa ni kaw nna jawm myit hkrum masat da nga ai.

Malta zin lawng mungdan hta galaw ai zup hpawng hta Hkristian nawku hpung dat kasa ningbaw ni miyt hkrum lata san da ai ga baw hpe, Pontifical Council for Promoting Christian Unity ngu ai Hkristian ni galung gahkyin lam the seng ai Kahtawlik nawku hpung ginjaw magam dap hte, the International Committee of the Faith and the Order Commission of the World Council of Churches ngu ai uhpung lahkawng kaw nna jawm shagrin dat ai ga baw rai nga ai, nga nna Vatican shiga dap kaw nna shana dat nga ai. 

 Fr. Bernard Dashi Tang