Vatican sumtsan hkring mang rung hta amyu shayi num langai hpe ningtau sumtsan hkring mang lit shatsam dat. ( 16 January, 2020 )

Wa sarabyin kaw nna Vatican sumtsan hkring mang rung hta amyu shayi num langai hpe ningtau sumtsan hkring mang lit shatsam, dat ai shiga

Wa sarabyin Francis kaw nna Vatican sumtsan hkring mang rung hta Dr. Francesca Di Giovanni ngu ai amyu shayi num langai hpe ningtau sum tsang hkring lit shatsam dat nga ai.

Dr. Giovanni gaw Vatican sumtsan hkring mang rung hta shaning 27 ning magam bungli galaw nga ai ahkyak ai myitsu langai rai nga ai. Dr. Giovanni hpe Vatican ningtau sumtsang hkring mang lit shatsam dat ai the rai yang, Vatican sumtsan hkring mang rung hta ningtau hkring mang lahkawng rai wa na rai nga ai.

Ya na zawn ahkyak ai lit shatsam hkrum ai lam the seng nna Dr. Giovanni kaw nna Vatican shiga dap de tsun shana wa ai lam hta, “Ndai Vatican sumtsan hkring mang rung hta magam  bungli ni law law nga nga ai majaw ningtau hkring mang langai bai san da na ra nga sai ngu ai lam hpe tsun kajai nga ai gaw ram ram na sai, raitim mung Wa sarabyin kaw nna ndai magam lit ngai hpe ap ya wa na re ngu ai hpe gaw tsep kawp myit mada da ai lam nnga ai. Wa sarabyin ra sharawng ai lam nib yin tai wa hkra atsam nga ai the shakut galaw na re. Ratimmung ndai lit magam gaw ngai langai chyu gun hpai la ra na lit lamang nre ngu ai hpe myit mada ai, uhpung uhpawng masa the rau jawm ta gin dun galaw sa ra ai magam bungli rai nga ai. Mungkan mungdan ni the matut mahkai mahkri shawn lam ni galaw ra ai magam bungli, mungdan langai the langai lapran myit hkrum ta masat htu magam bungli galaw shachyem lam ni the seng nna lajang shachyip ai, mungkan mungdan yawng the seng ai majan mang hkang, tsin yam hkrum masha the seng ai mang hkang, amyu shayi ni the seng ai lam, ndai zawn re ai ahkyak ai magam bungli law law hpe lit la ra ai magam bungli rai nga ai majaw ahkyak ai lit lamang nan rai nga ai. Ndai zawn Vatican sumtsan hkring mang rung a ahkyak ai shara hta amyu shayi num langai hpe lit shatsam ai lam gaw nam bat langai ngu ai mabyin rai nga ai, raitim mung ahkyak ai gaw lit la nga ai wa gaw amyu shayi num langai re ngu ai laam nrai, galkaw ra ai lit magma madaw she madung rai nga ai. January praw langai ya, shaning nnan mungga hta Wa sarabyin Francis tsun ai mungga hpe mung myit dum nga ai, dai gaw, ‘amyu shayi num ni gaw lapran tsap nna simsa lam hpe gaw gap ya lu ai masha ni rai ma ai, dai re majawamyu shayi num sha ni a lit lamang hpe manu shadan la ra ai, ahkyak ai daw dan hparan lu ai lit lamang ni hta amyu shayi num ni hpe grau shalawm la ra ai, shaloi hse shanhte hta nga ai chyeju atsam hpe lang nna shakut galaw ai a marang e grau ngwi pyaw simsa ai mungkan ga hpe anhte gaw gap lu na ga ai’ ng anna Wa sarabyin hkaw tsun lai wa ai yu ai, nga nna, Vatican sumtsan hkring mang rung hta ningtau hkring mang lit shatsam hkrum ai  Dr. Giovanni Vatican shiga dap de tsun shana dat nga ai lam, Vaticasn shiga dap kaw nna shana dat nga ai.

Fr. Bernard Tashi Tang Ji.