Shapawng Yawng Singhpo Hpunggyi/ Jau Kaba Myitkyina Kahtawlik Sasana De Sa Du Hkrum

India Mungdan, Arrunachar kaw na Shapawng Yawng Singhpo Amyu rai nga ai, Hpunggyi Kaba Urang Zau Hkawng/ Rev.A Pannasara gaw Myitkyina Kahtawlik Sasana de 2019 December 20 ya shana maga sa du jahkrum lai wa sai rai nga ai.

Atsam ningtawng Nsang Awng La a kawa Sutdu Nsang Tu Awng hte rau sa du ai Rev.A Pannasara gaw Sasana sagurem wa Wa Saradaw Francis Daw Tang, Nawku Hpung a Chancellor Wajau Paul Wanghte Lum Dau, Myitkyina Ginwang Up Jau Wajau Dr.Peter Hka Awng Tu ni hte hkrum let makam masham n lata ai sha Wunpawng amyu sha shada da myithkrum kahkyin gumdin lam, Simsa lam hte Hpaji lam yan hte seng ai lam ni tsun jahta lai wa ma ai.

Sa du hkrum shaga ai shaloi Mungkan Mungdan shara shagu hta Kahtawlik Nawku Hpung galaw taw nga ai sasana magam bungli lam, Hpaji sharin ai lam ni, shinggyim nau na garum kahtau magam lam ni gaw grai lam lada ai nga nna Hpunggyi kaba Urang Zau tsun jahta lai wa ai lam, Shi Myanmar Mung Jinghpaw Mung na Kahtawlik Nawku Hpung de mung ndu nmai ngu myit da ai hte maren ya na zawn sa du jahkrum ai re lam, Amyu makam masham hpung n lata ai sha, htunghkring hte myit hkrum lam hpe madung da nna Jinghpaw Wunpawng amyu sha ni yawng kahkyin gumdin wa na hpe myit mada ra sharawng ai nga nna Singhpo hpunggyi Kaba Urang Zau tsun jahta lai wa ai lam Chancellor Wajau Paul Wanghte Lum Dau tsun lai wa ai.

Jinghpaw Hpunggyi Kaba Urang Zau gaw Europe hte America Mungdan, Russia Mungdan ni hta Hpaji sharin lai wa nna, ga hpan 15 hpe atsawm chye hti chye ka ai hte ga amyu hpan yawng 28 ram hpe chye shaga ai rai nna, Arrunachar Dakkasu Jawng kaw na Programme Coodinator galaw let Mungdan sumtsan hkringmang rung law law hta ga gale ya ai magam bungli ni galaw lai wa sai lam chye lu ai.

Hpunggyi kaba Urang Zau Hkawng hku nna RVA hte hkrum shaga ai hta ‘ shi a mahkrum madup ni hpe garan kachyan nna Wunpawng amyu shani a ntsa yaw shada ai lam ni hpe mung tsun lai wa sai hte Mungkan Mungdan shara shagu hkan nga ai Jinghpaw Wunpawng amyu sha ni yawng hpe myit hkrum kahkyin gumdin nga na lam tsun sadi jaw lai wa sai rai nga ai. Buddah makam masham rai nga lai wa sai ten Wa Sarabyin Paul 2 gaw Buddah ni a masat nhtoi du jang galoi mung ‘Happy Buddah Day‘ nga nna galoi mung shakram ai lam galaw ai, ndai christmas ten hta yawng machyi makaw nhkrum ngwi pyaw hkam kaja nga mu ga nga nna tsun lai wa sai rai nga ai.

Myitkyina Sasana kaw nna mung ndai zawn India Mungdan na Shapawng yawng Singhpo Hpunggyi kaba sa du hkrum ai lam hpe masat masa sakse laika pa shagrau jaw dat sai re lam chye lu ga ai.

Thomas