Nawku Hpung Shiga (18 December, 2019)

Maw daw ni hpe Hkrismat mawn sumli lam galaw nna simsa lam a matu yan hkawm ai lam India mungdan hta galaw lai wa ma ai shiga

India mungdan na Hkristian nawku hpung shagu shang lawm let maw daw ni hpe Hkrismat mawn sumli lam ni galaw nna simsa lam a matu yan hkawm ai lam December 15 ya shani galaw lai wa ma ai. Hkrismat aten ladaw hta myit hkrum galung gahkyin ai lam ni hpe madun shapraw ai hku nna galaw ai ndai Hkristmat mawn sumli lam ni the mawn shakya da ai maw daw ni hte yan hkawm ai lamang hta Hkristian nawku hpung shagu na hpung masha ni marai 500 jan shang lawm lai wa ma ai re, nga ai.

India mungdan ka-ang, Madhya Pradesh mungdaw, Bhopal ngu ai saradaw ginwang a, saradaw Leo Cornelio mung ndai yan hkawm ai lam hta shang nlawm lai wa ai re, nga ai.

Hkristmat mawn sumli lam ni hte mawn shakya da ai maw daw 58 lawm ai ndai yan hkawm ai lam hpe Jesuit jau ni a dakkasu jawng wang kaw npawt sharawt nna pru hkawm hpang wa let myu kata na ahkyak ai lam nmaw kaba ni hku lai di yan hkawm lam ni galaw lai wa ma ai. Ahkying hkum 3 daram na hkra yan hkawm ai ndai lamang hta, Hkristmat mahkawn shangwi shapyaw ai lam, ka manawt ai lam ni mung lawm ma ai, mawn sumli da ai maw daw ni ntsa hta, Madu Yesu shangai wa ai shara hpe shaleng ya ai dumsu lawng nta kaji, Hkaw hkam 3, Santa Clause, bai Hkristmat hpun ni hpe mara shatsawm da ai maw daw ni mung 20 daram lawm ma ai re, nga ai.

“Hkrismat aten ngu ai gaw grau kaja tsawm htap ai prat de galai shai lam galaw na matu anhte yawng hpe saw shaga shadum nga ai aten rai nga ai, anhte a kun dinghku ni sha nrai uhpung uhpawng ting hku nna mung grau mai kaja ai lam ni hpe yawng hkam la lu hkra galaw na matu anther hpe saw shaga nga ai aten rai nga ai. Anhte hkum shagu tinang a kun dinghku ni hpe makawp maga lakawn la lam galaw ai zawn sha anhte a makau grup yin hpun kawa ni hpe mung lakawn la lam, makawp maga lam ni anhte galaw ra ga ai. Shing gyim masha a prat hta ahkyak ai lam hpan masum nga nga ai dai ni gaw, Karai kasang, shinggyim masha, bai makau grup yin shingra masa ngu ai lam rai nga ai. Karai kasang hte shinggyim masha ngu ai daw lam hpe ahkyak shatai ai lam ni anhte hta nga ga ai raitim, makau grup yin shingra tara masa hpe anhte malap mali di da chye ga ai, dai re majaw grau mai kaja ai simsa tsawm htap ai prat nil u la hkra makau grup yin shingra tara masa hpe tsawra makawp maga ai lam ni mung nhprai kau nga ga, Hkrismat atern hta ndai lam ni hpe mung myit dum ra ai” nga nna ndai yan hkawm ai lamang hta shang lawm nga ai ni hpe Saradaw  kaba Cornelio tsun shadum ai lam ni mung galaw dat nga ai, nga nna Ucan shiga dap kaw nna shana dat nga ai.    

Ga gale;

Wa Jau Bernard Dashi Tang Ji