Pran Wan Ladaw Laban 34: Hkristu Hkawhkam Laban Nhtoi

Chyum Laika Ni

Daw I          - 2 SAMUELA 5:1-3

Daw II         - KOLOSE 1:12-20

Daw III        - LUKA 23:35-43

Tsawra ai Nu Wa Hpu Nau ni, Nawku hpung a Nawku daw jau ai ladaw shaning jahtum laban de du nga saga ai hte maren hpawt ni na laban gaw Hkristu Hkaw Hkam Poi laban rai nga ai.

Anhte na la lai wa sai kabu gara ai shiga hta, myit yu mai ai ahkyak ai masha naku mi hte seng nna madi madun da ai lam ni hpe mu lu na ga ai. Dai masha ni gaw, Yuda ning baw ni, Roma hpyen la ni, Madu Yesu a pai hkra hta jen da hkrum nga ai lagut damya yan rai nga ai bawng masha lahkawng, bai Madu Yesu hpe ala mada yu nga ma ai shawa masha ni rai nga ma ai. Yuda ning baw ni, Roma hpyen la ni hte Madu Yesu a pai maga de jan da hkrum ai lagut damya ndai ni gaw Madu Yesu gaw hkaw hkam re ngu ai lam hpe nhkap la ma ai sha n-ga Madu Yesu hpe asawng asang nga nna tsun jahpoi kau ni rai ma ai.

Yuda ning baw ni tsun jahpai ai ga ni hta

“masha kaga hpe shi hkye la ga ai, ndai wa gaw Karai Kasang a hkristu ngu ai Karai Kasang lata la ai wa rai yang gaw shi hkum dai shi hkye la u ga”

nga ma ai. Roma hpyen la ni mung “nang Yuda ni a hkaw hkam rai n yang gaw na a hkum dai nang hkye la u” ngu nna tsun roi ai lam galaw ma ai. Dai hte maren sha pai maga de shi hte rau jen da hkrum ai lagut damya wa mung, “nang gaw hkristu nrai nni? na a hkum dai hte an hpe mung hkye la mi” nga nna shi hpe roi ai ga tsun lai wa ai.

Dai Madu Yesu hpe jen da ai shara hta yu maya shawa masha ni mung nga ma ai. Dai ni gaw hpa ni wa byin wa na rai kun ngu nna ala mada yu nga ma ai ni rai ma ai. Ndai shawa masha ni hte seng nna gaw kabu gara ai shiga hta shanhte Madu Yesu hpe hkawm hkam langai hku nna hkap la ai nhkap la ai ngu ai lam hte seng nna hpa mung ntsun da nga ai, shanhte hte seng nna tsun da ai gaw “mung masha ni gaw mada yu let tsap nga ma ai” nga nna sha ka da nga ai.

Raitim mung, Madu Yesu gaw hkaw hkam re ngu ai hpe ndai mung masha ni hkap la lai wa ma ai ngu ai masa hte anhte chye na da ga ai. Shanhte a n-gup kaw nna Madu Yesu gaw hkritu re ngu nna ntsun shapraw lai wa ai lam gaw, dai madu gaw hkaw hkam re ngu nna ndau lai wa ai lam a majaw shi hpe si ari jaw lai wa ai Yuda up hkang du ni hte Roma hpyen la ni hpe shanhte hkrit ai majaw shahnhte a n-gup kaw nna shi gaw hkaw hkam re ngu nna ntsun lai wa ai rai na rai ma ai, ngu nna anhte myit la ai lam ni nga mai nga ga ai. N-gun ja ai ahkang aya lu ai ni a man hta ndai hpa mung ahkaw ahkang nlu ai masha ni hku nna shanhte a myit hta rawng ai lam ni hpe tsun shapraw lu na matu  nbyin mai ai lam mung rai na rai nga ai. Ndai masha ni Madu Yesu gaw hkawm hkam re ngu ai hpe kaja wa nhkap la ma ai rai yang shanhte nhkap la ai lam hpe tsun shapraw lai wa na rai ma ai. Dai zawn rai tsun shapraw dat ai a marang e dai madu hpe si ari jaw lai wa ai ni rai nga ai yuda ning baw ni hte arawng aya lu ai amsha ni a man e shanhte myit man pa shara mung nga na nrai nga ma ai.

Madu Yesu hpe hkawm hkam hku nna yin la lai wa ai ni hta dai shawa masha ni chyu sha nrai Madu Yesu hte rau jen da hkrum ai hkra maga na damya wa mung lawm nga ai. “an gaw tinang a mara majaw hkrum ging hte maren daw dan ai hkrum ga ai, ndai wa chyawm gaw nsun n-ang ai lam hpa mung galaw wu ai nrai” ngu nna Madu Yesu hpe tsun jahpoi ai damya wa hpe pyi daru kau ai lam galaw lai wa ai rai nga ai. Madu Yesu hpe mung hkaw hkam hku nna yin la let, “Yesu e nang na a mung dan de du wa yang, ngai e dum la rit law” ngu nna hpyi shawn lai wa ai rai nga ai.

Madu Yesu gaw madu hte hkaw hkam re ai lam hpe chyoi laika ni hta mung asan sha anhte mu lu mai nga ga ai. Shi gaw Madu hte hkawm hkam rai nga ai majaw nhkru ai nat ni pyi shi hpe madat lai wa ai. Shi gaw Madu hte hkawm hkam nrai yang si mat sai Lazaru wa hpe rawt wa u ngu nna tsun ai shaloi Lazaru bai rawt wa na nrai nga ai. Dai hte maren sha shi gaw Madu hte hkaw hkam nrai yang gaw nbung hte hka leng ni hpe zim mat u ngu nna shi tsun ai hpe mung hka leng ni nbung ni shi hpe madat lai wa na nrai ma ai. Shi Madu gaw nga yang nga pra ma hkra a Madu hte hkaw hkam nan shi rai nga ai.

Madu Yesu gaw madu hte hkaw hkam re ngu nna anhte tsun nga ga ai shaloi, shi a Karai ngu ai masa hpe sha tsun nga ga ai nrai. Shi hta nga nga ai shing gyim atai hte mung seng nga ai. Hpa majaw nga yang Madu Yesu hta karai atai hte shing gyim masha atai ngu ai atai lahkawng nga nga ai ngu ai gaw anhte a makam masham nan rai nga ai. Karai Kasang a hkawm hkam hkaw seng aya ngu ai npu hta nga yawng nga pra ma hkra lawm nga ai. Nga yang nga pra ma hkra ngu ai hta shawng de nga lai wa sai ni, ya nga nga ai ni hte matut nna naw nga wa na ni ma hkra lawm nga ai. Karai Kasang a hpan da ai hpung shing kang npu kaw nna lawt lu mai ai ngu ai arung arai hpa mung nnga mai nga ai. Dai re ai majaw Karai Kasang gaw hpan da hkrum ai arung arai ni ma hkra a hkaw hkam nan rai nga ai.

Madu Yesu a shing gyim masha atai ngu ai gaw dai Karai Kasang hta jawm pawng kahkyin nga ai rai nga ai. Ndai jawm pawng kahkyin nga ai lam gaw Trinity karai kasang a lahkawng ngu na atai rai nga ai, kasha Karai Kasang g ngu ai atai rai nga ai. Ndai masa hta,Trinity karai kasasng a lahkawng ngu na atai rai nga ai Madu Yesu a shing gyim masha langai hku nna shamu shamawt galaw gun hpai ai shamu sharawt lam ni ma hkra gaw dai Trinity Karai Kasang a shamu shamawt lam ni nan rai nga ai. Dai re ai majaw, Trinity karai kasasng a lahkawng ngu na atai rai nga ai Madu Yesu shat sha ai, ga shaga ai, nni nkri hkrum ai, si hkrum ai, si ai kaw nna bai hkrung rawt wa ai tht sum sing lamu de lung wa ai rai nga ai.

Ya lahta de tsun lai mat wa sai lam ni hpe npawt shanat da nna tsun ga nga yang, shing gyim  masha rai nga ai Madu Yesu gaw hkawm hkam ni ma hkra a hkawm hkam rai nga ai zawn, Karai Kasang rai nga ai Madu Yesu gaw nga yawng nga pra ma hkra a hkaw hkam mung shi rai nga ai.

Madu Yesu a Hkaw Hkam aya hte seng nna ndai bat anhte hti ai lahkawng ngu ai chyum laika rai nga ai Colose ni hpang de shagun dat ai laika hta Kasa Pawlu hku nna lawu na hte maren tsun sharin da nga ai, Col 1: 15-16

“shi gaw Karai Kasang a hkrang sum la rai nga ai hte, hpan da ai arai yawng mayang hta alat rai nga ai,  kaning rai nme law, sum sing lamu hte gin ding aga hta yawng mayawng hte gaw, mu lu ai hte nmu lu ai hte hpe rai timmung, hpa hkaw hkam tinyang, du aya hte ahkang aya hte hpe rai timung, shi hta e hpan tawn da nga sai, arai yawng mayang gaw, shi ajaw e mung, shi a matu mara mung hpan tawn da nga ai”

nga nna sharin shaga da nga ai.

Tsawra ai nu wa hpu nau ni, anhte kashin kamun hkam la ai shaloi anhte a baw hta chyoi pra ai sau chya ya let “Karai Kasang a chyoi pra ai amyu masha nang tai wa sai majaw, jau myit htoi hte hkawm hkam aya lu ai hkritu a daw shan ding grin rai nga nna, htani htana shi hta rau nga nga lu u ga” nga nna jau tsun shaloi anhte gaw dai kashin kamun Sacramentu a marang e Madu Yesu a hkaw hkam aya hta shawng lawm lu saga ai, rai nga ai. Shi a hkawm hkam aya hta shang lawm lu sai ni anhte mahkra gaw Madu Yesu ding hta ga ntsa gun hpai lai wa ai lit magam ni hpe matut gun hpai na ra ga ai. Dai lit magam ni gaw, da kring da krang re ai, ngang kang ai  tsawra myit hte Karai Kasang hte hting bu wa hpe tsawra ai, bai ap nawng daw jau ai ngu ai magam lam ni hpe galaw let ding hta ga ntsa hta Karai Kaasang a Mungdan hpe gaw gap na matu ngu ai lam rai nga ai.

Madu Yesu gaw tsawra chye ai, mahkra dang chye ai anhte a hkawm hkam rai nga ai majaw, shi hta kam hpa kam sham ai myit hte tut e sit shang nga lu hkra shakut nga ga, n-gun atsam kaba dik ai hte tsawra chye dik ai hkawm hkam wa rai nga ai majaw anhte ra sharawng ai lam ni mahkra hpe shi teng sha jaw ya lu na rai nga ai.

Akyu hpyi saga: Wa Karai Kasang e, nang gaw tsadan a daru magam hpe jahten kau nna nga yang nga pra hpe nnan bai shatai da nit dai, nga yang nga pra ma hkra a hkaw hkam rai nga ai nsha hkristu hpe sum sing lamu hte gin ding aga nga yang nga pra mahkra tut e hkung ga shagrau nawku nga mu ga anhte madu hkristu a marang e hpyi nem nga ga ai.

   
 Wajau Bernard Dashi Tang Ji

(RVA Program Director, Quazon City, Phillippines)