Karai Kasang A Mungga -Pran Wan Ladaw 32, 2019 (C)

Chyum Laika Ni

Daw I - 2 MAHKABI 7:1-2, 9-14

Daw II - 2 HTESALONI 2:16-17, 3:1-5

 Kabu Gara Shiga - LUKA 20:27-

Anhte hkum shagu hkye hkrang la ai de du wa lu u ga matu, Karai kasang a wenyi gaw anhte a myit masin salum kata hta n-gun atsam kaba hte galoi mung magam bungli shachyen nga ai rai nga ai. Anhte a dinghta prat ngut mat wa ai aten Madu Yesu Hkristu lajang da ya ai hkye hkrang la ai de du shang wa lu na matu anhte galaw ra ai lit gaw anhte a myit masin hta shanu rawng nga ai dai Madu hte jawm pawng nna magam bungli shachyen nga ra ai ngu ai lam nga ai.

Ndai bat na ja chyum mungga ni hku nna, anhte a ding hta prat ngut ma wa ai hpang lu la na prat hte seng ai lam hpe sumru dinglik yu ai lam ni galaw na matu nawku hpung anhte hpe shadum ya nga ai. Lachyum gaw, anhte a makam masham hte myit mada shara rai nga ai, si ai ni bai hkrung rawt wa na, si ai hpang htani htana asak lu la na ngu ai lam ni hpe sumru dinglik yu ai lam ni galaw na matu nawku hpung shadum ya ai lam rai nga ai.

Hparishe ni hte laika ka ai sara ni ngu nna tsun dat yang, dai ni gaw Madu Yesu sharin shaga ai hpe nkam madat ai ni, Madu Yesu hpe ning hkap ai uhpung ni ngu nna anhte asan sha chye na ga ai. Raitimung, ndai bat na kabu gara ai shiga hta gaw shawoi anhte naw nna yu ai masha uhpung langai a lam hpe na la lu nga ga ai, dai ni gaw Saduke ngu ai ni rai nga ma ai. Ndai Saduke ni hte Madu Yesu hkrum kadup ai lam ndai bat na kabu gara ai shiga hta mu lu nga ga ai. 

Ndai Saduke ngu ai uhpung hta lawm ai masha ni gaw sut hpaga galaw sha ai sut hpaga masha ni, lamu ga law law madu da lu ai lamu ga  madu ni, rai ma ai majaw Madu Yesu a prat hta sut su nga mai dik ai masha ni ngu nna tsun lu mai ai masha ni rai ma ai. Ndai masha ni hku nna ka da ai chyum laika ni hta rawng ai lam ni hpe sha hkap la nna tsang hte tsang sharin sumhting hkrak wa ai makam masham lai htung masa ni hpe nhkap la ai ni rai ma ai. Grau nna si ni bai hkrung rawt wa na ngu ai lam hte, lamu kasa ni nga ai ngu ai lam hpe nhkap la ai ni rai ma ai. Kasa 23: 8 hta “kaning rai nme law Saduke ni mahtang, hkrung rawt ngu ai nnga ai, lamu kasa hte wenyi mung nnga ai, nga nna tsun ma ai” nga nna ka da ai hpe mung mu lu mai nga ga ai. Shanhte a baw hta rawng nga ai langai sha re ai lam gaw shanhte a sut su nga mai lam sha rai nga ai. Dai re ai majaw shanhte a sut hpaga lam hte seng nna matut awng dang ai hte galaw nga lu na rai yang Roma ni a up hkang ai npu hta taw nga ra na raitim, hpa myit nru ai ni rai ma ai.

Lahta de tsun lai mat wa sai shanhte a myit lai ni a majaw Madu Yesu hkaw tsun ai tara ni gaw shanhte a matu tsep kawp hkap la nlu mai ai lam ni rai nga ai hte Madu Yesu hpe ja ja ning hkap lai wa ma ai ni mung rai ma ai. Chyum laika ning hkring nkau mi ka da ai hta, Madu Yesu si hkrum ai lam hte seng nna ndai masha ni hta lit nga ai nga nna mung tsun da ma ai. Madu Yesu a hkaw tsun ai lam ni gaw shanhte a sut hpaga galaw ai lam ni hte seng nna ja ja ahtu hkra ya lu ai lam ni re ngu ai hku myit nna Madu Yesu hpe hpyen langai hku mu mada lai wa ma ai ni mung rai ma ai.

Madu Yesu hte shanhte hkrum ai shaloi Madu Yesu hpe shanahte san lai wa ai lam ni gaw aku aka nkyet nhkaw re ai ga san ni rai nga ai. Si ai masha ni bai hkrung rawt wa na re ngu ai lam hpe asawng asang jahpoi ahpyak kau lu na matu ngu ai gaw shanhte san ai ga san a yaw shada ai lam madung nan rai nga ai.

Bai ndai shara hta anhte myit shalawm da mai ai lam langai mi gaw, dai shaloi na Isaela masha ni hkap la da ai lai htung masa hta kashu kasha matu mara nlu ai sha si mat wa ai ngu ai lam gaw mala la gam maka nkaja ai lam re ngu nna myit la hkap la da ai lam ni nga nga ai. Dai re ai majaw Tara Jahprang laika 25: 5 hta “nta langai sha na shan hpu shan nau ni hta langai wa mi matu mara nnga ai si mat yang, dai si wa ai wa a gaida hpe masha kaga hta lu na nrai, shi a karat gaw shi hpe hta kahkyin la nna karat hpe lashum ang ai hte maren lashum na rai wu ai, shing rai Israela amyu hta kahpu a amyu matu nmat hkra shawng shangai ai kasha gaw si mat wa sai kawa di a matu mara tai na rai nga ai” nga nna matsun da ai tara nga nga ai.

Saduke ni hku nna Madu Yesu hpe sa san ai ga san gaw shanhte a myit hta majoi shi chyu shi prut pru wa ai ga san nrai, nju ndawng ai myit ni kaw nna pru wa ai ga san she rai nga ai. Lahta de anhte tsun lai mat wa sai ga shaka dingsa na chyum laika hpe madi madun let san pru wa ai rai nga ai. Dai re ai majaw Madu Yesu kaw nna mung Moshe hte lakap nna npawt gaw let shanhte a ga san hpe htan ya lai wa ai rai nga ai.  Hpa majaw nga yang Moshe hte seng nna shanhte nhkra gwi ai ni rai ma ai. Madu Yesu tsun ai hta “Ndai ding hta masha ni gaw thinggaw rawn ai hte num la num ya rai ma ai, wu ra hkran prat hte si ai ni kaw nna bai hkrung rawt wa de du gying ni chyawm gaw htinggaw rawn ai hte num la num ya nnga ma ai. Dai ni gaw lamu kasa ni zawn rai wa ai hte bai hkung rawt ai a kasha ni rai ma ai majaw Karai Kasang a kasha ni rai ma ai, Moshe dai Madu hpe Abraham a Karai Kasang Isak a Karai Kasang, Yaku a Karai Kasang nga nna tsun ai ga hte, si ai bai hkung rawt ai lam, dai sum wum hte seng nna ka da ai hta madun da nga ai. Karai Kasang chyawm gaw si nga ai ni a Karai Kasang nrai, hkrung nga ai ni a Karai Kasang she rai nga ai, yawng mayang hte gaw shi man e hkrung nga ma ai” nga nna htan ya lai wa ai rai nga ai.

Saduke ni mung matut nna kaga nsan gwi mat ma ai, makau e ala madat nga ai Pharishe ni hte laika ka ai sara ni chyawm gaw ta lahpawk dum nna “Sara e nang gaw rai la ai hku tsun nit dai” nga nna tsun lai wa ma ai lam Lk 20:39 hta mu lu nga ai.

Tsawra ai nu wa hpu nau ni, si ai kaw nna bai hkrung rawt wa na re ngu ai hta, kabu gara ai shiga hta mu lu ai si ai kaw nna Madu Yesu sharawt dat ya ai Nain gai da jan a kasha zawn, shing nrai Lazarus zawn, si wa ai hpang ya anhte lu la nga ai prat de bai nhtang wa lu na re ngu ai masa chyawm gaw nrai na rai nga ai. Si ai kaw nna sharawt dat hkrum ai gai da jan ai kasha hte Lazarus mung bai si wa masai rai nga ai. Anhte a htani htana asak hkung ai de shang wa na ngu ai lam gaw, asak madu rai nga ai Madu Karai Kasang a asak hta jawm pawng lu nna sumsing mungdan hta shi Madu hte rau htani htana hkrung nga lu na ngu ai lam rai nga ai. 

Dai anhte lu la na prat gaw kaning re ai prat re ngu ai hpe tsun shaleng dan na matu chyawm gaw yak la nga ai. Anhte tsun lu ai lam ni gaw, si ai hte rau dai shaloi jang htani htana asak anhte lu na ga ai. Si ai ngu ai gaw htani htana asak de shang bang wa lu na matu lai di ra ai chyinghka langai zawn sha rai nga ai. Dai ahkying hta anhte a wenyi gaw mau hpa atsam kaba hte gaup ya hkrum nna Karai Kasang anhte hpe tsawra ai zawn anhte shada da tsawra lu na ga ai. Anhte a wenyi sha nrai anhte a hkum hkrang mung sharawt la ai hkrung lu na ga ai. Si chye ai anhte a hkum hkrang hten mat nna ga yun bai tai mat wa na rai tim, hkum hkrang nnan anhte lu na ga ai hte dai hkum hkrang nnan gaw hkrung rawt sai Madu Yesu a hkum hkrang zawn rai na rai ga ai.

Tsawra ai nu wa hpu nau ni, htawm hpang prat hte seng ai lam ni hpe sumru nga ga ai aten, Madu Yesu tsun ai ga ni hpe mung malap kau nmai nga ga ai, dai gaw Karai Kasang a mau hpa hpung shing kang hpe kadai dang chye lu na rai ta? ngu ai ga rai nga ai. Ndai dinghta prat hta anhte naw hkawm sa nga ga ai aten htawm hpang prat ngu ai hpe azin ayang chye lu na matu nbyin mai ga ai raitim, nshut nshai anhte chye da lu mai ai lam gaw, dai anhte lu na prat gaw anhte myit mada da ai hta ndang tsun hkra hkum zup ai prat rai na re ngu ai lam rai nga ai.

Akyu hpyi saga: Wa Karai Kasang e, hkrit hpa lam ni kaw nna anhte hpe makawp maga la ya rit, ndai ding hta ga ntsa hta nang myit ra ai lam ni hpe galaw gun hpai nga lu u ga, anhte a hkung hkrang hte myit masin hpe mai hkam kaja ai chye ju ni jaw ya rit anhte a madu hkristu a marang a hpyi nem nga ga ai.

Wajau Bernard Dashi Tang Ji